Search Results

04 Iulai 2022 Ua fa'alauiloa nei le lagolago a le Ofisa o Tagata Maimoa mai Fafo po’p o le ofisa o Turisi i le 'au fa'avaomalo a Samoa le Manu Samoa, o lenei lagolago o se Pa'aga Aloa'ia a le au lakapi a Samoa mo le Lakapi a le Lalolagi i le Ipu ale Pasefika (PNC) o lenei tausaga 2022 e pei ona amatalia i le fa'ai'uga le vaiaso ua te'a. O lenei fa'apa'aga o le'a mafai ona fa'apipi'ina ai le fa'ailoga o le ofisa o Turisi ma le igoa o le toe tatalaina o tua'oi fa'avaomalo a Samoa i le masina o Aukuso i luga o toniga ta'alo aemaise o mea ta'alo uma a le 'au. O lenei fa'apa'aga na fa’alauiloa ina o se vaega o le tapena atu o Samoa e toe tatala ana malaga ma tua'oi fa'avaomalo i le masina o Aukuso. Na ta'ua e le sui ofisa sili o pulega le susuga ia Kitiona Pogi o lo’o taumafai le Ofisa o Turisi ina fa'alauiloa atili Samoa e fa'aaogaina ai le tatou au lakapi fa'avaomalo ina ia mafai ona tala'i atu se tala fiafia i tagata maimoa fa'avaomalo i le toe tatala ai o Samoa ise taimi ua le'o toe mamao. Na fa'afetaia fo'i e le Ofisa Sili o le Lakapi Iuni a Samoa le afioga ia Faleomavaega Vincet Fepulea'i le lagolago a le Ofisa o Turisi aemaise o le taua le fa’alauiloaina o Samoa e fa'a-auala atu lea ile tatou au lakapi fa'avaomalo. E talitonu le ofisa o Turisi Samoa o le lagolagoina o le 'au lakapui a le atunuu o se avanoa lelei lea e lagolagoina ai le fa’atupulaia o turisi ma tagata tafafao mai i Samoa aemaise lava o atunuu e iai Niu Sila ma Ausetalia. O le ta'aloga muamua a le Manu Samoa male au malosi a Ausetalia A ile fa'aiuga ole vaiaso na matua fa’amo'amo'a ai ele Manu Samoa ia Ausetalia A i 'ai e 31 i le 26.

1 Iulai 2022 O le aso 1 Iulai 2022 ua fa’amamaluina ai le toe fo’i ai lea ile Ofisa o Felaua’iga i le Lauele’ele o nisi o auaunaga sa i lalo nei o le Matagaluega o Leoloe e pei ol e Resitaraina o Ta’avale, Pasiina o Ta’avale ma le faia o laisene ave ta’avale. O le tausaga e 2019 na fa’ame’i ane ai i le Matagaluega o Leoleo lenei auaunaga e feagai ma i latou po’o le auaunga lea tau i taavale afi, ae peita’i o lea ua aga’i mai le faigamalo fou ua iai nei ma manatu ua tatau ona toe fa’afo’i i le Pulega o Felaua’iga i le Lauele’ele (L.T.A). Saunoa le afioga i le Minisita o galuega tetele a le malo ia Olo Fiti ‘Afoa Va’ai i le fa’atalanoaga ma le BluTV o lenei fuafuaga ua o se tulaga ua manatu le malo e le tatau ona fa’atinoina e le matagaluega o leoleo ae e tatau lava ona fa’atino e le pulega o felauaiga i le laueleele ae ia fa’amalosia pea e le matagaluega o leoleo ia le tulafono mo ta’avale afi. O le nofoaga i Fagalii i le mea sa iai le malaeva’alele na faaaogaina e le Ofisa o Leoleo e fai ai fa’ataitaiga mo ave ta’avale(test driving) ma pasi ai ta’avale ua toe fa’ase’e atu nei i le ofisa autu o le LTA i Vaitele. Tapena le L.T.A e fa’ao’o atu i tua pāsiga o ta’avale . Ua fa’amanino e le afioga I le ali’i Minisita o Galuega Tetele ale Malo ma Felaua’iga ia ‘Olo Fiti ‘Afoa Va’ai i le BluTV le fuafuaga ua iai nei le matagaluega ma le Pulega o Felaua’iga i le Lauele’ele po'o le L.T.A e tu’uina atu ai i tua le pasiaina o ta’avale afi i isi lala o le Pulega e aofia ai ma Savaii. O le manatu o le alii Minisita o le matagaluega, ona o le tulaga faigata ma le mamao o le tau aga’i mai o le atunu'u ma ii nu’u i tua ma Savaii i ne i Upolu e fa’atino ai nei auaunaga mo le pasiaina o ta’avale afi lea na a’e ai se manatu ina ia mafai ona auina atu i tua le pasiina o ta’avale e fa’afaigofie mo tagata uma. “O lea ua tapena le L.T.A e tu’uina atu le auaunaga o pasiga o ta’avale i tua, e pei la ona ou ta’ua i luma o le palemene, e mamao tele le agai mai foi lele o le mamalu o le atunuu mai nu’u i tua”. E le gata i lena , ae ua manatu fo’i le Minisita o se avanoa taua lea e mafai ai ona fa’aogaina Inisinia Ta'avale o lo'o iai tomai ma agava’a i lea matata e mafai ai ona latou fa’atinoina lea auaunaga mo le atunu'u i nu’u i tua ma e mafai ai fo’i ona fai ai ni latou pisinisi faapea mo le pasiina o ta’avale ae ia galulue fa’atasi ai ma le L.T.A. E le’i mafai ona mautinoa mai se aso e fa’ataunuuina ai lenei fa’amoemoe po'o lea fuafuaga mo le pulega o felaua’iga le lau’ele’ele (LTA).

1 Iulai 2022 Ua fa’amaonia mai nei e le Kapeneta le filifilia ai ma le tofia ai le o Auapa’au Logoitino Filipo e avea ma Komesina Fou o le Matagaluega o Leoleo. Ua savalia nei i le tausaga talu ona avanoa pea lea tulaga mo le matagaluega o leoleo, o se tasi nei o mataupu sa laga foi i le fono a le palemene ona o le tuai lea ona tofia o se Komesina o le Matagaluega o leoleo e na te mataituina galuega fa'atino a le matagaluega. O le susuga ia Auapaau ua 51 tausaga o le soifua e mai i le afioaga o Vaimoso, Falevao, Salimu Fagaloa ma Manono, ua silia ma le 20 tausaga o tautua le afioga ia Auapa’au i le matagaluega o leoleo o se alii malu o le malo. O le tausaga e 2020 na si'itia ai lona tulaga i le tofia ai lea e avea ma sui Komesina mo le matagaluega o leoleo a'o avea le afioga ia Fuiavailiili Eagon Keil ma Komesina o leoleo i lena tausaga. O Auapaau sa a’otauina i le vaega a le US Defence Resources Management Institute, Australia Management ma New Zealand Police College aemaise o le a’oga o le Asia Pacific Center mo suesue i tulaga tau i Saogalemu i totonu o Hawaii. O le susuga ia Auapa’au sa a’otauina i le Kolisi o Samoa. Sa maua fo’i lona avanoa e aga’i ai i galuega lavea’i poo le misiona a leoleo Samoa sa faapena ona malaga atu ai i totonu o Solomona lea na fa'amaeaina i le tausaga e 2017.

30 Iuni 2022 Ua mae’a ona fa’alauiloa nei e le Komiti Faatonu ma le pulega o le Fa’alapotopotoga o fa’aputuga Tupe mo le Lumana’i manuia o Samoa le NPF se meaalofa mo ana suifaisaofaga uma i le masina o Iulai 2022. I le taeao o le aso Tofi 30 o Iuni 2022 na feiloa’i ai le vaega o tuistala ma le pulega a le NPF, pulega fa’atonu aemaise o le tama’ita’i Minisita o Tupe ma le NPF ia Mulipola Anarosa Ale Molio’o e faalauiloa le fuafuaga ua fa’ata’oto nei mo le au faisaofaga uma a le Fa’alapotopotoga o Fa’aputuga Tupe mo le Lumana’i Manuia o Samoa. I le saunoaga a le tama’ita’i Minisita na ia fa’ailo ai le fa’amanuiaina o sui faisaofaga uma a le atunuu i le NPF ina ua mae’a ona pasia le tala fa’atatau autu o le tupe 2022/2023. Ua manino ai i le folasaga a le tamaitai Minisita e tusa ma le 8.2% pe $66.7 miliona tala le tupe maua mai a le fa’alapotopotoga i le tausaga fa’aletupe sa iai le 2021 i le 2022 i le aoina mai o saofaga uma a sui faisaofaga a le NPF, mai i lenei aofaiga ua manatu ai le pulega o se matati’a fou lea ua mafai ona fa’amauina i le talafa’asolopito a le NPF i le atoa ai lea o lona 50 tausaga o le auaunaga i Samoa. O le fa'amoemoe fo’i lea ua manatu ai le tamaitai Minisita aemaise o le pulega fa’atonu ina ia fa’asafua atu se fesoasoani tau pasene ma ii tupe fa’asili ua mafai ona maua mai e le NPF i saofaga a tagata fai saofaga a le atunu’u. O le 3.2% lenei pea fa’atupeina e $26 miliona tala, ma o lenei foi pasene o le’a mafai ona tala uma i tua e tagata faisaofaga. E agavaa uma lava tagata o lo’o iai a latou saofaga i le NPF, e aofia ai ma i latou o lo’o iai ni fa’aletonu i nonogatupe. O le ta o le 7 i le taeao o le aso Faraile 1 Iulai o le’a mafai ona fiti ai lea pasene, ma o lo’o mafai lava ona fa’aaogaina upega o fesoota’iga e faatino ai lea faiga e tala ai le pasene i tua. O le masina o Aperila na mafai ona fa’amatuu mai ai le isi 3% o se vaega o le 5% na fa’ameaalofa mai mo le aufai saofaga uma e fa’amanatu ai le atoaga ole 50 tausaga o le Iupeli Auro a le NPF, ona totoe ai lea o leisi 2% lea ua fa’amoemoe o le’a mafai ona talaina i tua ile masina o Tesema o le tausaga lenei 2022. Na fa’afetaia e le Minisita aemaise le alii pule ole NPF ia Pauli le atunuu ona o le onosai ao feagai ai pea Samoa ma lu’itau ona o le fa’ama’i ole Koviti 19.

29 Iuni 2022 O avanoa mo agava’a tutusa o le sini autu lea ma le fa’amoemoe o se feagaiga toe fa’afouina i le va o le a’oga fa’amatata ese’ese a Ausetalia i le Pasefika ma le fa’alapotopotoga o le Nuanua o le Alofa (NOLA). O le aso Lua 28 o Iuni sa faia aui se sauniga fa’apitoa i le faletalimalo o le Taumeasina e sainia ai le toe fa’afouina o le feagaiga lea mo le APTC ma le NOLA e ala lea i polokalame mo aoga fa’auau e mafai ona maua ia ma avanoa e aoga ai ma fanau ma i latou uma e iai manaoga tumau o le soifua. I lenei polokalame ua molimauina le agai pea i luma o le manuia o taumafaiga e pei ona sa ta’ua e le pule sili o le NOLA ia Mata’afa Faatino Utumapu i lana lauga fa’apitoa. O le fa’amoemoe maualuga o le malo o Ausetalia e tauala mai i le polokalame a le APTC ina ia mafai ona maua avanoa talafeagai ma avanoa tutusa mo i latou e iai a’afiaga tumau o le soifua, e maua ai ni agavaa tutusa ma i latou o lo’o atoa manaoga o le soifua. O nisi o fanau o lo’o ua fa’aauau pea ona maua nisi agava’a fou mai i le aoga lenei a le APTC e pei ona iai le lua tausaga talu ai, o nisi foi o fanau e iai a’afiaga tumau o le soifua ua mafai ona maua avanoa faigaluega ma siitia fo’i o latou tulaga i falefaigaluega ina ua maea nisi o polokalame fa’aleaoaoga na a’o’oga ai i le aoga lenei ale APTC. Na auai le matagaluega o Tina ma tamaitai Atinae o Nu’u ma Agafeso’otai, aua o le matagaluega lenei o lo’o fitoitonu ma mataupu nei. Ma na momoli le faafetai a le matagaluega e tauala mai i le tamaitai ofisa sili ia Dr Mema Motusaga i le malo Ausetalia, ona o le fa’atupeina o lenei a’oa’o ma le fa’aauauina pea ona faia o lenei polokalame mo fanau e fia fa’alautele malamalama i tomai ma agava’a eseese. E le gata i lena, ae ose avanoa fo’i ua mafai ai ona fa’alautele lenei polokalame mo i latou e iai a’afiaga tumau o le soifua. O le molimau a le matagaluega, o se tasi nei o fa’afitauli o lo’o feagai ma i latou nei o le utiuti o avanoa faigaluega mo i latou, aemaise o le faigata ona sa’ilia o galuega ona o le tulaga o le lava o le tomai ma agava’a e tatau ona iai. Ae ua aoga lenei polokalame a le malo o Ausetali i le fa’apaga ma le Malo o Samoa ua maua ai nei avanoa aua i latou nei o lo’o iai a’afiaga tumau o le soifua.

29 Iuni 2022 Ua fa’alauiloa nei le pepa fa’avaomalo mo tui puipui a’o tapena ai Samoa mo le toe tatalaina o ana tua’oi fa’avaomalo i le masina o Aukuso ole tausaga nei 2022. O lenei pepa tui fa’avaomalo (International Covid-19 Vaccination Certificate) e mafai ai ona malaga so’o se isi o tagatanu’u o Samoa e fa’amaonia ai le mae’a ai ona fai o tui puipui ole Kovit 19 i so’o se malaeva’alele fa’avaomalo. O lenei pepa tui fa’avaomalo o le’a mafai fo’i ona fa’apipi’i ai se CODE (QR Code) i le pito i luga i le itu taumatau o le pepa, o le fa’amoemoe ina ia mafai ona vave le faatinoina o galuega i nisi o malaevaalele o lo’o fa’aaogaina ai ni masini fa’aonaponei e mafai ona iloa ai le tulaga ua o’o iai le faia o tui puipui o se tagata malaga. O lenei CODE ua mafai ona faia e tusa ai ma aiaiga o le malu puipuia o faigamalaga ma i aafiaga o le Koviti 19 ma o lo’o mafai ona galulue fa’atasi ai le matagaluega o le Soifua maloloina a Samoa ma ana pa’aga fa’avaomalo. O tagata ta’ito’atasi uma ua mae’a ona faia tui puipui i totonu o Samoa e mana’omia ona lafoina atu ni talisaga e faatalosagaina ai nei pepa tui fa’avaomalo mo faigamalaga i le imeli a le matagaluega o le Soifua Maloloina vacc.cert@health.gov.ws ma ia tatau ona fa’apipi’i iai ma nisi nei o vaega mana’omia: Pepa tui masani (itu uma e lua) Le itulau o lo’o iai ou fa’amatalaga i luga o le tusifolau. E tatau i so’o se tagata e fia talosagaina nei pepa tui fa’avaomalo e tatau ona tuuina atu lenei talosaga i totonu ile 5 aso a’o le’i oo atu i lea aso o le’a malaga ai, o le fa’amoemoe ina ia mafai ai ona maua se taimi ile matagaluega e faamaonia uma au faamaumauga.

28 Iuni 2022 Ua toe lua masina o totoe ona taunuu lea i le masina o Setema lea e faamoemoe e fa’amanatuina ai le Teuila i Samoa, ae o lea o lo’o fa’agasolo pea le fa’atalanoaina o fuafuaga a le Komiti fa’afoe mo tapenaga o le Teuila ini polokalame o lea fa’ataunu’uina i lea aso atofaina. O le tulaga mautinoa, o le’a fa’ataunu’uina Tuuga fautasi aemaise o le sailiga o se tausala o Samoa e pei ona masani ai. Taua e le komiti fa’afoe, o lenei tausaga o le’a le pei ole tele o tausaga i le faamanatuina o le Teuila, ae o lea iai se suiga e pei o lea fa’amanatuina fa’atasi lava fa’afiafiaga ma polokalame a le Teuila ma le fa’amanatuina o le tutoatasi o Samoa i lona 60 tausaga. O le’a fa’ataunuu lava fa’afiafiaga masani ma polokalame ae ole’a le fa’amamalua pe aloa’ia ose fa’amanatuina o le teuila. Mo tuuga fautasi lava ia, ua fa’amautinoa mai nei e le taimaitai Komesina o Leoleo ia Papalii Monalisa Keti, e fitu fautasi ua maea ona faamautinoa lo latou tausinio ai i fa’agatama i le tai o lenei tausaga 2022. O nei fautasi e fitu o le’a toe va’aia ai nisi o faautasi iloga i fa’agatama o le tai ile tele o tausaga ua mavae, o va’a ua fa’amaonia e aofia ai le 1). Avi’ivi’i mai Toamua, 2) & 3). Don Bosco(lua latou va’a), 4). Marist Old Boys, 5). Telefoni ole Vainuu, 6). Manono ma le 7). Salelologa le Tolotolo o Tamauli. E tasi le afe tala $1000 le resitara o le fautasi mo lea faamoemoe, ma o lo’o faagasolo pea lava fa’atalanoaga ma afioaga o ni isi o fautasi.

28 Iuni 2022 I le taumafaiga a le Malo mo nuu ma afio’aga ina ia pulea lava e latou ia latou lava fa’atoaga ma atinae o faigafaiva, ol ea o lo’o fa’agasolo ai pea polokalame mo fa’aaliga a le aufai fa’atoaga po’o le talamua lea o lo’o taulamua ai le matagaluega o fa’atoaga ma faigafaiva. E tolu Talomua sa faia i le Aso Faraile 24 male Aso To’ona’i 25 Iuni, mo alalafaga eseese e tolu i Upolu e aofia ai Satapuala, Aleisa Sisifo ma Magiagi. I le avea ai ma sui o le Malo, na fai ai le Afioga i le Minisita mo Faatoaga ma Faigafaiva ia Laaulialemalietoa Leuatea Polataivao Fosi Schmidt e fa’afetaia le komiti fa’afoe o Talomua na fa’ataunu’uina i le vaiaso ua te’a i nu’u nei e tolu mo le fa’ataunu’uina ma le manuia o le latou fa’amoemoe e ala i fa’aaliga mo atinae o fa’atoaga, lafumanu ma faigafaiva. Na saunoa le Afioga i le Minisita, e fa’amanatu le taua o le lotogatasi i totonu o nu’u taitasi ma nu’u ina ia maua ai ni taunu’uga lelei mai a latou galuega fuafua mo atinae. Na saunoa le alii Minisita e fa’amanatu atu i afioaga e tolu le taua o le atiina a’e ole eleele mo le fa’atinoina ai o fa’atoaga ma lafumanu ina ia maua le sapalai faifaipea o fua o fa’atoaga. Na o’o foi le saunoaga a le Minisita i le tatau foi ona latou silafia o fa'ama'i 'ese'ese e ono a’afia ai atina’e tau fa’atoaga fa'atasi ai mani faiga fa'atonutonu talafeagai e mafai ona fo’ia ai nei fa’afitauli. Sa ia una’ia fo’i nu’u ma alaalafaga e lagolago ai taumafaiga faifaipea a le Matagaluega ina ia tafiesea le manu ma iniseti lafua e pei o manu ainiu lea o lo'o avea pea ma fa'amata'u tele i la tatou atinae o niu. I le saunoaga a le Minisita i Talomua taitasi, sa ia taua ai e faapea “O se vaega o le taulai a le Malo i le fa'amalosia o atina'e tau fa'ato'aga ma faigafaiva i totonu o nu'u o Samoa, e iai lea ile fesoasoani tuusa'o e $1 miliona mai i le tala tupe o le a fa'aavanoaina mo le taumafaiga le ao atinae faaitumalo.” O le susuga ia Vaili Mimita o Satapuala, na saunoa e fai ma sui o le afioaga ma talosagaina le malo fesoasoani i le tu’uina atu o uta mo a latou fa’atoaga ma seleselega mo le auina atu i fafo. Na ia fa’aopoopo mai le mana'omia ai lea e le nu'u le tele o fanua mo atina'e fa'ato'aga ma o lea ua fa'aogaina se vaega o le fanua o le Malo i Satapuala mo lea fa’amoemoe. Na momoli mai e le sui o le Komiti a Tina o Aleisa le latou talosaga mo le fa’aleleia o auala e aga’i atu ai i totonu o nofoaga faifa'ato'aga i Aleisa. Na ia fa’amamafaina le taua o le iai o auala talafeagai ona ua fa'atupula'ia le aofa'i o le aufai fa’ato’aga ma le tele o fa'ato'aga i totonu o Aleisa. O le Talomua mulimuli na faia i Magiagi i le Aso Toonai i le aoauli. Na fa’afetaia e le pulenu’u o le afioaga o Magiagi le lagolago a le malo ma faafetaia le lagalaga i mea lelei lea ua toe taumafai ai atinae itumalo ma nu’u e tauala mai lea i le galuea’ina o ele’ele mo fa’atoaga ma lafumanu.

27 Iuni 2022 PC: Facebook O le mafuaaga lea sa taua e se tasi ua molia na mafua ai ona ia fa'aaogaina ai se laau malosi ma fanaina ai le tama lenei ma lona atalii na soligatulafono, ise fa'amatalaga sa tu'uina mai e le matagaluega o leoleo, na faailoa mai ai o lenei feseeseaiga e foliga mai e mafua mai ini feteena’iga i tulaga tau fanua. O le vaiaso ua tuana’i na tula’i mai ai lenei fa'alavelave ina ua toe agai ane se tama o lo'o ua molia i le ofisa o leoleo ma fa'ailoa ai lana soligatulafono, i se fa'amatalaga sa tu'uina mai e le matagaluega o leoleo, na faailoa mai ai o lenei feseeseaiga e foliga mai e mafua mai ini feteena’iga i tulaga tau fanua. O le mafuaaga lea sa taua e se tasi ua molia na mafua ai ona ia fa'aaogaina ai se laau malosi ma fanaina ai le tama lenei ma lona atalii. E ui olea ua maea ona faailoa ele tama sa faatinoina le soligatulafono le mafuaaga ae oloo faatino pea galuega suesue ale matagaluega o leoleo ina ia mautinoa le mautu lelei o mau. Ua maua fo’i o lea ua mae’a ona faatinoina le ifoga a le ‘aiga ole ua molia ile aiga o le tama ma lona atalii ua maliliu ma olea fo’i sa taliaina e le ‘aiga. O le’a tuliloaina pea lenei tala e le tatou BluTV.

27 Iuni 2022 Ua se’i nei ‘e le ‘au lakapi ale Tolotolo o Tamauli mai Salelologa le siamupini o le ta'amilosaga taito’afitu fa’avaomalo a Malisi 2022 ina ua ia fa’ato’ilalo ai le ‘au malosi ale B.B.E Vaiala ile sa’ili ga siamupini sa faataunuuina ile malae ale Apia Park i le Aso To’ona’i 25 Iuni 2022. O se ta'aloga finau na maitauina i ‘au nei e lua e pei ona maitauina mai le amataga o minute ‘amata ole ta’aloga. Na muamua la’asia e le ‘au ale B.B.E Vaiala le laina sikoa ma na avea fo’i lea ose tulaga sa taumafai malosi ai le ‘au a le Tolotolo o Tamauli ina ia lelei lana puipuiga aemaise ole sa’iliga ose ‘ai mo le ‘afa muamua ole ta’aloga. E ta le malologa i le ‘afa muamua o lo’o sili ‘ai ale Tolotolo ile 7 ile 5 mo Vaiala. O se itu na mata’ina i lea taaloga finau o le tau fai lelei uma o puipuiga ma le osofa’i i le pu’e ma meatotia eseese e puipuia ai le la’asia ai e se tasi o ‘au o le laina sikoa mo le isi ‘au. O le tama ta’alo o le ta’amilosaga sa mauaina lea e Elisapeta Alofipo o le ‘au a le Tolotolo o Tamauli ‘ai e 14 i le 12 a le B.B.E Vaiala. O le tama ta’alo o le ta’amilosaga sa mauaina lea e Elisapeta Alofipo o le ‘au ale Tolotolo o Tamauli.

24 Iuni 2022 I le tulaga faigata o lo’o iai le tau ole suauu i le lalolagi atoa o lo’o aofia ai ma Samoa ua lagalaga ai manatu o le au fai ta’avale ma pasi lau pasese ina ia siitia pasese mo le latou auaunaga. Ua maitauina le siitia ai o le tau o le penisini, tiso ma le karasini ona o fua faatatau o lo’o tu’uina ma i atunuu o lo’o auina mai ai le suauu. Ua tele ni finagalo ua lagalaga, ua le gata o tagata taitoatasi ae o manatu foi ua lagalaga ma fa’amaite mai e le au faitaavale laupasese, o le mau a i latou nei ua fai si taugata o le penisini ae ua le talafeauga lea ma le tau o lo’o mafai ona totogi e tagata feoa’i e fa’aaogaina nei auaunaga. “Ia mea lea iai a uma age le aso kasi saka pasese i le kaulaga gao le $3 laka kupe e maua, ia e makua le lava ai a se kau o se penisini ia” ose finagalo lea o le afioga ia Tofilau Felanuai Penisula o se ave taavale laupasese laitiiti mai Vaitele Fou. I se tasi o finagalo fa’aalia o se tasi o tamalii ave ta’avale o lo’o fa’aaogaina le taavale a le isi tagata e faigaluega ai, na ia faailoa ai le ma’imau o lona taimi e fealuai ai ae leai se meaai a lona aiga e maua ona ole faigata o le taimi o lo’o ua iai nei tau o pasese mo tagata. “O au ia oute fealuai i le taavale a leisi ulugalii, ia e $300 le turn in tatau na iai ile vaiaso, ia e uma ane …e lelei pe afai e uma le vaiaso e atoa se $300, ae afai uma ane e le atoa le turn in, ia ua leiloa po’o lea le uiga lata galuega lea e fai. E fai o le ave kupe a le ulugalii, ae leai se kupe fafaga ai lau fanau koe sau ma le kau o le penisini ua alu i luga” O nisi ia o finagalo eseese ua faaalia ni isi o le atunuu o lo’o galulue i lenei auaunaga ona o le taugata ua iai le suau’u ae ua le talafeagai lea male tau o pasese mo tagata femalaga’i. I se faamatalaga mai i le pulega o felauaiga i le laueleele(L.T.A) , o lo’o ua fa’ailoa mai ai, olea ua amata ona taumafai e fa’atalanoaina lenei mataupu ina ia mafai ona maua mai se tali mo le atunu’u aemaise o le au fai taavale laupasese.

24 Iuni 2022 O le aso le aso Faraile 24 o le masina o Iuni 2022 ua afa aso ai le NZHC Samoa ma malolo uma ai galuega ma auaunaga uma lava i Niu Sila e o’o i aoga, ma so’o se pisinisi ua tapunia uma. O le uluai taimi lenei ua aso malolo ai Niu Sila ile faamantuina o le tausaga fou o Maori ua faaiogoaina o le Matariki . O lenei aso e faapea, a o’o ina vaaia se fuifui o fetu (star cluster) i le taeao i le vaitau o le tau malulu (winter) ile aso 24 o Iuni i tausaga taitasi ona faamanatu loa lea e Aotearoa ole latou tausaga fou. O ni isi o vaega taua e faamanatuina ma manatua ai lenei aso o le tausaga fou i Aotearoa: E feala tagata uma i le taeao po ina ia mafai ona vaavaai ile fetu ua taua ole MATARIKI ao lei oso le la. Ia maua se taimi e manatua ai e ua pele ua maliliu-faasoa ni mea taua e faagalo gata sa tupu ile faigamalaga ole tausaga tuai. Toe tepa i mea sa tutupu o tausaga ua tuanai ma fuafua ni mea taua mole lumanai. Maua le taimi e mafuta ai ma aiga, uo ma e pele i agaga. O le aso lenei o le Matariki ose aso e toe faatasitasi ai 'aiga ma 'a'ai faatasi, talatalanoa ma malolo faatasi. Ae ose tasi o itu taua ose taimi foi e tusitusi ai ma faamaumau i lalo ni faamoemoega tupito ole tausaga fou.