Search Results

24 Iuni 2022 O le talosaga a le sui faipule o Lepa ma le faipule o le itumalo o Faleata numera 3 o lo’o fa’amaloloina nei le tumau ina ia vave se taimi e fa’agasolo ai taualumaga o le la faamasinoga, ua te’ena nei ele fa’amasinoga maualuga e le afioga i le faamasino Sili ia Satiu Simativa Perese. O le talosaga a le afioga ia Tuilepa Sailele Malielegaoi ma le tofa ia Lealailepule Rimoni Aiafi na fa’aulu atu i le fa’amasinoga e tauala atu i le alii loia o lo’o tula'i mo la'ua le afioga ia Aumua Ming Leung Wai. O nai vaiaso ua tuanai na fa’auluina ai se talosaga a sui faipule nei ile fa’amasinoga sili e lu'i ina ai se fa’aiuga a le kapeneta e tauala mai ile fautuaga a le Komiti o Tulaga aloaia ma amio tauoloa ina ia fa’amalolo nei sui faipule mai i fonotaga a le palemene ma galuega fa’atino a le malo se'ia iai se taimi. O le talitonuga a sui faipule e toalua ua fa’amalolo nei ua iai se afaina o laua aia tatau ina ua faia lenei fa’aiuga a le kapeneta. O le afioga ile tamaitai loia o lo’o tulai mo le fofoga fetalai ia Taulapapa Heather Latu o lo’o te’ena lea tagi, ona o le talitonuga o le tamaitai loia e le feaiaa'i le faamasinoga ma le palemene, e le mafai ona aiaina e le faamasinoga le faaiuga a le palemene. O le mafua’aga o le toe talosaga ai o le itu tagi ona e taua le fonotaga o lo’o fa’agasolo e tatau ona auai ai mo le talanoaina o le tala ole tupe, ae peitai e leo mafai ona fa’anatinati ai se faaiuga ale fa’amasinoga ona e taua ona ona tu’uina atu e itu uma e lua ni mau e faavae ai ni finauga. Ua tu’uina mai nei o le aso 8 o Aukuso e suesue ai lenei mataupu ae o le fa’amoemoe o le masina o Iulai e tatau ona tapena ai loia o itu e lua mo mau e lagolago ai finauga nei.

23 Iuni 2022 O lo'o fa'agasolo le fa'atalanoaina ma le toe iloiloina o le tulafono o Faigapalota ma le Fa'atinoga o faiga palota e pei ona feagai ai ma le komisi su'esu'e fa'apitoa na tofia ma filifilia e le Kapeneta. O se tasi o fa'amoemoe o lenei fa'atalanoaga o le toe iloilo lea o le vaega o le tulafono lea o lo'o iai le tulafono o le 10% e saofaga ai tamaitai i nofoa ole palemene ina ia fa'amalieina le iai o nofoa e pei ona faatulaga mai ile faavae ma le tulafono na toe teuteu ale faigapalota lea e tatau ai ona 5 nofoa mo sui tamaitai i le palemene o Samoa. I le fa'atalanoaga ale Komisi su'esu'e ma le itumalo o Vaimauga na lilifa ai finagalo o le itumalo i le tatau ai ona toe aveesea lenei vega o le tulafono ile 10%. O le faamoemoe ma le fa'avae o finagalo o le itumalo, ona e fete'enai ai finagalo ma le maua ai se to'a lelei o itumalo aemaise o le oi iai lea o faiga filifiliga a itumalo taitasi. E talitonu Vaimauga o le mea lava ia e tatau ona iai, ia faamalosia pea le agai o tamaitai e fia tauva mo le palota ina ia tavava faatasi pea ma alii ae ia aveese le 10% e ono fa'atuai ai ni fa'aiuga ose faigapalota. Ua mafua ona fulia manatu o le toatele ile tatau ona aveese ai o le 10% mo sui tamaitai ona o nisi o fa'afitauli lea na tula'i mai ile tausaga ua tuana'i ile maea ai o le palota tele a Samoa i le le mautonu ma le faatuai ona maua ose faaiuga sa'o. O lo'o fa'aauau pea ona fa'atalanoa i itumalo ma afioaga le toe iloiloina ai lea o le vaega lea o le tulafono o faigapalota ona ole tele ose vaega o lo'o i lea tulafono o lo'o fa'aali ai ni atugaluga a le lautele aemaise o itumalo ma tagata palota. O le Aso Tofi 23 Iuni 2022 lea ua fa'amoemoe e o'o atu ai lenei fa'atalanoaga ile itumalo fa'apalota o Faleata numera 2 e aofia ai nuu o Vailoa, Tulaele, Talimatau, Vaiusu, Elise, Vaigaga.

22 Iuni 2022 E le'i 'alo lava saunoaga a le sui faipule o Faleata Numera 4 ia Ale Vena Ale ina ua maua le avanoa e fa'asoa ai se manatu o lona itumalo i le lauliliuina lea o le tala fa'atatau autu o tupe ile faitauga lona lua i le palemene i lana fonotaga ile Aso Lulu 22 Iuni 2022. O le saunoaga siisii a le suifaipule a le itumalo o Faleata numera 4 le afioga ile igoa matua ia Ale Vena Ale na faailoa ai sona teena o nisi o tulafono ina ua o'o lana saunoaga i se tasi o tulafono na pasia i le faigamalo talu ai le tulafono lea o faiga palota 2021 i lona toe teuteuina. I le tulafono o faigapalota 2021 lea na pasia ai le noatia ai o se sui faipule e le mafai ai ona toe alu ese mai ma lana vaega faaupufai sa iai. "I lo'u manatu a ia lau afioga, e le afaina pe afai lea ole'a e defect pe ua e mana'o ete alu ise isi itu" O le manatu o le sui o Faleata numera 4 ia Ale Vena Ale, e nate teena le filifili o se sui e toe fo'i e tutoatasi ae toe manao le tulafono fou lenei ina ia toe fo'i lea sui faipule e toe fai lana faiga palota. "E tatau ona e alu e te independent pe afai ua iai se mea ete le fiafia ai i lau pati" ole saunoaga lea le afioga ia 'Ale. "Lea mea ole'a e fia nofo ai fua lau pati pe'a e va'ai atu o le oti le mea 'ae e fia nofo ai a?" O le talitonuga o le sui faipule o Faleata 4, e faailoga lanu lenei tulafono ma olea noatia ai le sui faipule mai i lona aia tatau e filifili ai ma ua ia fa'aleoina ai lona teena o lea tulafono ma ua tatau ona aveese.

22 Iuni 2022 Na fa’atautaia e le Iunivesete Aoao o Samoa se sailiga seleni po’o le Radio-thon & TV-thon i le Aso Toonai 18 Iuni, 2022 i nofoaga e lua; o le nofoaga autu sa i le maketi i Salelologa i Savaii lea sa i ai le Sui Pule ma le toatele o le Komiti Saili Tupe a le NUS, ae o le isi sa faia i luma o le maota o le Malo i Matagialalua. Sa fa'asalalau tuusa'o lea polokalame i luga o le NUS TV8, NUS Facebook ma leitio fa'alotoifale nei: 91.1 FM ma le 107.4 FM mai le 8 i le taeao se'ia o'o i le 3 i le afiafi. O le sauniga amata sa taitaia ele Afioga Mulipola John Lafaele - Pule o le NUS Campus mo Savaii ma le tatalo amata sa taitaia e le Susuga Pou Tuigamala (Susuga i le Toeaina, Sui Ta'ita'i A.O.G i Samoa) faatasi ai ma le O le saunoaga autu a le Afioga Peseta Dr Desmond Lee Hang – Sui Pule. Fa’aalia e le Sui Pule, “O le fa’amoemoe autu o lenei sailiga seleni ina ia lava se seleni e faatau ai se pasi mo fanau aoga o lo’o lesitala nei i le lotoa i Savaii mo le saogalemu ma le felauaiga. O le mea lea, o le leitiofoni o se talosaga mo tamaiti aoga muamua, lumanaʻi ma le taimi nei o le NUS ma o latou aiga faʻapea o tatou nuʻu ma atunuʻu i fafo ina ia foaʻi soʻo se mea latou te gafatia e foaʻi atu i lenei faʻamoemoe". E tusa ma le SAT$30,600 le aofa’i ose seleni na maua i totonu o le atunu’u. Na auai atu ai le Sui Ao o le Iunivesite Polofesa Aiono Alec Ekeroma i le NUS Fundraising Community i Niu Sila i le latou lava Talisuaga sailia ai le pasi a le NUS Savaii i le po lava lea na fai ai le Radio-thon; lea sa faia i le Talimana’o Function Centre i Aukilani, Niu Sila. I le faaiuga na maua ai e le mafutaga a Aukilani le seleni e $NZD$14,000.

22 Iuni 2022 I le mae'a ai ona fa'alauiloa o le Team Samoa i Saipan i le Aso Faraile 18 Iuni 2022, SASNOC ua toe maua le avanoa e toe maua ai se isi tala lata mai i le 'au a Samoa ao faagasolo ai nei taaloga laiti i Saipan. Na auai le 'au a Samoa ma isi au e 19 o atunuu ole Pasefika ile sauniga aloaia e tatala ai le ta’aloga lona 11 a le Pasefika i le afiafi o le Aso Faraile na te’a nei. I le maea ai o aso muamua e lima ole taamilosaga tenisi, ua sao atu ai nei le tamaitai o Eleanor Schuster i Quartefinals i le vaega o Tamaitai lea o lea ta’aalo i ma le tamaitai o Vilet Apisah o le au a Papua Niu Kini. O le vaega o le doubles i tamaitai ua saofaga atu ai foi le 'au a Samoa ile quarterfinals lea ole'a taaalo ai fo'i male 'au a Northern Marianas. O le aso ananafi na amata ai ta'amilosaga Siisii ​​Uamea mamafa ma le Beach Volleyball, ae o taaloga Afeleti ma le Tapolo e amata i le aso, Aso Lua 21 Iuni 2022. Na fa’amaonia uma a tatou siisii ​​uamea ua filifilia i le fonotaga fa’amaonia a le Au Siisii ​​Uamea na faia i le Aso Toonai 19 Iuni 2022. O lo’o manuia uma le Team Samoa i Saipan, ma o lo’o fa’aauau pea le fa’afetai i tagata uma o Samoa mo le tatalo ma le lagolago faaauau.

21 Iuni 2022 Ua mata'ituina nei e le matagaluega o Pisinisi Alamanuia ma Leipa le tele o faitioga e fa'asaga i ni isi o lo'o faia ni galuega taufa'asese mo ni auala fa'asolitulafono e maua ai se tupe. I le manatu mase tofa ua a'e i le matagaluega ona ole maitauina o le fa'atupulai pea o mataupu ua fa'ao'oina atu i nisi o tagata ua taumafai e fa'aaogaina le igoa o le matagaluega e fai ai ni auala saili tupe ma aoina tusifolau faapea foi ni folafolaga mo avanoa i galuega fa'avaitaimi. E tusa ai ma nei amioga e ono o'o atu ai i le tulafono, ma o lo'o fa'amauina ose solitulafono ogaoga le taumafai o se tagata e faatino ni gaioiga fa'asolitulfono mo le fa'amoemoe ina ia maua ai se tupe. I le fa'asilasila a le matagaluega o lo'o toe fa'amanatu mai ai i le atunuu i le e ao ona fa'afeso'otai le Ofisa o Galuega Faavaitaimi i le fogafale 4 o le fale ole fa'alapotopotoga o taui o fa'alavelave faafuasei, pe afai o loo manaomia se malamalamaaga i tulaga tau i galuega faavaitaimi i Niu Sila poo Ausetalia. Ua faailoa foi e le matagaluega, e leai ni tupe e totogiina mo ni resitara i le ofisa. O nai masina talu ai na manu ai se tala i nisi foi o i latou i atunuu i fafo ua latou faia ni folafolaga i tagata galulue i galuega faavaitaimi ma folafola iai ni galuega e mafai ona ofoina atu iai latou faatasi ai ma o latou aiga. O le naunautaiga lava a le matagaluega o Pisinisi ina ia aua nei fa'aseseina finagalo o tagata o le atunuu i nei tagata o lo'o faia ni gaioiga taufa'avalea.

21 Iuni 2022 Ua maea nei ona fausia le ofisa tutotonu o le itumalo o Faleata 2 mole poloketi 1 miliona tala i itumalo e 51 faapalota o Samoa. O le poloketi lenei o se tasi o faiga fa'avae a le vaega fa'aupufai ua tulai mai nei i le Malo le vaega faaupufai o le Faatuatua ile Atua Samoa ua Tasi. O le fa'amoemoe o lenei poloketi e mo le atinaega o itumalo uma o Samoa mo le soifua manuia o tagata uma. I lona sini autu lava ia fa'alelei le soifua manuia o tagata i itumalo ma nu'u taitasi, o le faamoemoe lava ia fa'amatuu atu lava i tagata o le atunuu seleni nei e 1 le miliona tala e tapena ai lava e le itumalo ni ana lava ia poloketi mo le itumalo. O se vaega o nei atinae ina ia fa'aaogaina le eleele poo laufanua aemaise o punaoa fa'alenatura e aofia ai ma le sami ina ia mafai ona maua ai ni alagatupe aua le tausiga o le soifua ma manaoga o tagata uma o Samoa. O le faamoemoe ua fa'ataoto ile taiala lenei, ina ia mafai ona tau titina le ola mativa ma le le tagolima aemaise o galuega maua mo tupulaga ma tagata uma i totonu o nei itumalo uma faapalota e 51. O le vaega muamua o lenei poloketi e aofia ai le $200,000 ua maea ona fa'amatuu atu e tapena ai ofisa ma saili ai tagata faigaluega ina ia faatino ai poloketi mole itumalo atoa,. O lo'o ua faatalanoaina nei ile tala ole tupe faatatau autu 2022-2023 lenei poloketi mole 1 miliona. O le faatinoga o le poloketi lenei o lo'o mafai ona galulue faatasi ai le matagaluega o tina ma tamaitai aemaise ole pulega a alii ma Faipule o itumalo uma o Samoa.

21 Iuni 2022 Ua momoli aloa'ia le sui faipule a le itumalo o Gagaifomauga numera 2 le tofa ia Foisala Tuu Ioane e avea ma sui faipule mo le vaega fa’aupufai o le Faatuatua i le Atua Samoa ua Tasi. O Foisala na tauva o se sui tutoatasi i le faigapalota laitiiti a le itumalo na fa’ataunu’uina i le aso 3 ole masina o Iuni 2022 e saili ai se sui mo le itumalo ina ia sui tulaga i le afioga ia Vaele Paiaaua Iona Sekuini ua fai i lagi le folauga e pei ona tuua ai le malo i le masina o Mati ole tausaga nei 2022. Na agai mai le itumalo o Gagaifomauga e molimoli mai lo latou sui ile vaega fa’aupufai i lona nofoaga autu i le Maota o Samoa i Vaitele, na auai sui ole kapeneta ma faipule e faapena foi i le au lagolago. Na fesiligia le tofa ia Foisala i fa’amuamua o lea ave mo manaoga o lona itumalo, peitai na ia ta'ua ole'a ave lava lana faamuamua i galuega ua maea ona faataoto e le sui ua fai i lagi lana folauga. "Ia olea ua maea ona faataoto e Vaele fuafuaga mole itumalo, ia o lea fa’apena foi la ona ou taumafai ina ia fa’aauau taumafaiga a le afioga ia Va'ele" I le silasila a le Tofa ia Foisala, ose vaega o lo’o maualuga ai lana silasila mo le itumalo o le atinae ina lea ona laueleele e ala lea i faatoaga ma atinae tau i lafumanu. O lona talitonuga e pau lea ole tulaga o lo’o manaomia ona toe lalaga mai e tua iai lona ia itumalo. E o’o mai ile aso ua faatautoina ai le tofa ia Foisala, na ia faailoa e lei iai lava se tagi e fa’asaga ia te ia talu ona mae'a le faigapalota. O le taeao nei ole Aso Lua 21 o Iuni 2022 ua iai le faamoemoe o lea faia ai le sauniga e faatauto ai lana afioga i le alii faipule ma aloaia ai loa ose sui usufono o le maota ma le palemene o Samoa.

20 Iuni 2022 I le faigamalaga fa’avaomalo a le tamaitai palemia o Samoa ia Hon Fiame Naomi Mataafa i Niu Sila mo le uluai taimi talu ona pale mai ile avea ai ma taitai o Samoa. Na ia maua ni avanoa e mafai ona auai ai i nisi o nofoaga eseese i Niu Sila, e le gata i lea ae ole mafai ona auai atu i ni isi o sauniga eseese na mafai ona valaaulia ai e faapotopotoga o tagata Samoa ma tagata Pasefika i totonu o Aotearoa. I lenei malaga fa’avaomalo a le tamaitai palemia o Samoa na maua ai foi se avanoa e feiloai atu ai ma asia nisi o nofoaga po’o le aoga sa a'otauina ai i Niu Sila e pei ona feiloai atu ai i lana aoga ole Samuel Marsden Collegiate School. Ole tausaga e 1975 na avea ai Fiame Naomi Mataafa ma sui taitai ulu o teine(Deputy Head Girl). I le maea o se sauniga na faia ile vaiaso ua tuanai na mafai ona aua ane nisi o tamaitai o lenei aoga ma o latou tauaaoina atu iai se meaalofa e fa’aaogaina ai le gagana Peretania male gagana Samoa e latou te fiafia ai e aloaia le tofia ole latou teine tuai ile avea ai ma uluai Palemia Tamaitai mo Samoa. I le fonotaga a Fiame naomi male malo o Niu Sila na talanoa ai tulaga eseese e pei ole tali atu i fesuiaiga eseese o le tau, o fefa’atauaiga, ole saogalemu, aoaoga, soifua maloloina, soifua manuia o tagata aemaise ole tali atu ile faamai oloo pipisi ole Koviti 19. E iai le fa’amoemoe e auai atu le tamaitai palemia i nisi o fonotaga o taitai ole Pasefika ile masina o Iulai 2022.

20 Iuni 2022 O lo'o fa'aauau pea le fesoasoani a le Malo o Iapani i le motu tele i Salafai i le atinaeina o aoaoga i ona lava tulaga. Na patipatia e le nuu o Samalaeulu le latou falea'oga fou na fausia i lalo o le fesoasoani fesoasoani a Iapani mo Grass-Roots Human Security Projects (GGP). O le Afioga ia Senta Keisuke, o le Amapasa o Iapani i Samoa, na tauaaoina atu potu aoga ua toe fa'afou ma se hall fou faatasi ai ma le maota o le pulega a le Komiti o le Aoga i luma o le Afioga ia Hon. Tuala Tevaga Iosefo Ponifasio, Sui Palemia ma o le Faipule foi o Gagaemauga Numera 1, o le ia Afioga Hon. Seuula Ioane, Minisita o Aoga, Taaloga ma Aganuu, sui o le Matagaluega o Aoga, Taaloga ma Aganuu, fanau aoga, matua, puleaoga ma faiaoga. O lea galuega sa tele lava le faatupeina i se fesoasoani e oo atu i le USD $203,876 e tutusa ma le SAT $522,491.03. O lenei poloketi i le toe fausiaina o lenei faleaoga e sui tulaga ai le faleaoga tuai sa fausiaina i i le tausaga 1996 lea na faʻaleagaina i tausaga ua tuanaʻi ona o fa'alavelave fa'alenatura. O le fesoasoani a Iapani e ala i lenei poloketi ua fa'ailoa ai lona naunautaiga e ave le fa'amuamua i le atinaeina o aoaoga fa'avae e ala i le fa'aleleia o faleaoga o nisi o aoga i Samoa. E iai le fa'amoemoe o lenei fesoasoani o le a atili fa'amalosia ai le mafutaga fa'aleuo i le va o Malo ma tagata o Iapani ma Samoa.

17 Iuni 2022 Ua tu'uina atu le Poloketi mo le Fausiaina o le Hall o le Kolisi o Palauli Sisifo i lalo o le FESOASOANI FA'AATUNUU A IAPANI MO POLOKALE FA’AVAE (GGP); Na fa’afeiloaia e le fanau aoga a le Kolisi o Palauli Sisifo i Savaii ia le taua’aoina atu o le latou HALL fou o lo'o faatupe e le Malo o Iapani. O le afioga i le alii amepasa o Iapani ia Keisuke, na faia se saunoaga faapitoa e molimoli ai lenei galuega fou mo le Kolisi o Savaii i Sisifo, i le sauniga sa auai ai le afioga Hon. Mulipola Anarosa Ale Molioo, Minisita o Tupe ma o le faipule foi o Palauli Nu.1, o le Afioga Hon. Seuula Ioane, Minisita o Aoga, Taaloga ma Aganuu, sui o le Matagaluega o Aoga, Taaloga ma Aganuu, fanau aoga, matua, puleaoga ma faiaoga. Na maua e le Kolisi o Palauli Sisifo se fesoasoani e oo atu i le USD $209,903 e tutusa ma le SAT $526,732.75 i lalo o le polokalame faifaipea a Iapani o le Fesoasoani mo Grass-Roots Human Security Projects ia Mati 2021. A'o le'i fa'atinoina le poloketi, sa feagai le a'oga ma fa'afitauli ma le le lava o alagaoa i le fa'atinoina o galuega a le a'oga i tausaga a'oga ua tuana'i. O lo'o iai le fa'amoemoe o lenei fesoasoani o le a mafai ai ona maua ni alaga'oa talafeagai ma fa'aleleia atili e maua ai a'oa'oga lelei mo le Kolisi o Palauli Sisifo e taumafai ai mo le tulaga maualuga tau a'oa'oga. E o’o mai i le taimi nei, e 215 poloketi ua lagolagoina e le GGP i Samoa talu mai lona amataga i le 1991.

17 Iuni 2022 I le taeao o le Aso Tofi 16 Iuni 2022 i le itula e 5am i le vaveao na amatalia ai ta'alolo mo paolo ma gafa aua le faamoemoe mo le fa’aulufaleina o le falesa o le Ekalesia Metotisi i Vaimoso. Na molimauina le tele o ta’alolo ma fa’aaloaloga masani mo aso fa’apenei o fa’aulufalega ose maota tapua'i ole Atua ile nuu o Vaimoso, e mae'a ta'alolo i le aso Tofi ua lata i le itula e 3pm ile afiafi. O le taeao nei la o le Aso Faraile 17 2022 lea ua tatala ina ma fa’aulufale aloa'ia nei le falesa ole Ekalesia Metotisi i le nuu o Vaimoso. O le tausaga 2019 na tu’uina ai i lalo le falesa tuai a le Ekalesia ma amata ai i le tausaga na soso’o ai i le 2020 le galuega fou ae peitai ona ole Koviti 19 na taofia ai le toe fa’aauauina o le galuega se'ia o’o mai ile 2021 na maua ai loa le avanoa e toe fa’aauauina ai se'ia oo lava ina fa’aulufale e pei ona iai nei ile masina o Iuni 2022. O le falesa tuai na amata lona fausiaina ile tausaga e 1974 ae na fa’aulufaleina i le tausaga e 1977. I le tulaga faigata ma le le toe saogalemu ole falesa na afua ai loa ona tuu i lalo ma faamoemoe ai e toe fausia se isi falesa fou aua le Ekalesia i Vaimoso. O le tala o le tupe o lenei falesa fou e $1,519,208.07, i le faatupeina o le galuega na mafai ona fesoasoani mai ai alo ma fanau o le afioaga i atunuu i fafo e pei o Niu Sila, Ausetalia ma Amerika lea na maua ai le seleni e $330,099.00. O le tau ole ata na tusia e le afioga ia Tagiilima e $1,300,170.00 Na momoli le faafetai ale failautusi alo ma tamafanau o le nuu o lo’o alala ma nonofo i atunuu i fafo ona o le fesoasoani male veloma’a ua mafua ai ona tu lenei maota tapua'i i Vaimoso. E fa’aulufale le falesa ale Ekalesia ua talafeauga ma le vaitau ole fono tele po’o le Koneferenisi a le Ekalesia Metotisi aoao i Samoa ma le lalolagi lea ua iai le fa’amoemoe e usu mai i Samoa nei ile masina o Iulai. O le aso muamua o Iulai o lea amatalia ai lenei koneferenisi i le fono a tina po’o le fono a le au uso fealofani.