Search Results

17 Iuni 2022 E 5 tausaga ma masina e 6 ua fa’asala ai le ali’i 42 tausaga le matua o Afele, ona o le maliu o le tama a lona tuafafine e 14 tausaga le matua. O lea faalavelave na tulai mai i Gataivai i le aso 01 o Aukuso 2021 ma molia ai Afele i le fasioti tagata paivalea. I le tu’uina atu o le faasalaga, na silasila ai le Faamasino o le Faamasinoga Maualuga ia Leiataua Daryl Clark i tulaga ogaoga e aofia ai: -O le fa’ao’olima lea na i'u ai i le maliu o lē na aafia ose fe'eseesea'iga lava fa’alotifale o lona 'aiga. -E faalua ona osofaia e le ua molia le na aafia, fa’aaoga ai se fafie e fai ma au’upega e fa’ao’olima ai i le ua maliu. I le taimi na lau ai le fa’asalaga i le aso 9 Iuni 2022, o lo o i ai pea le tino maliu o lē na aafia i le fale maliu ona e le o avanoa se foma’i i fafo e sau i Samoa e faia se taotoga fa'afoma'i faapitoa. "O le mafatia i le maliu o si a la tama aemaise o le faavauvau o lo’o feagai pea ma matua o le nei alii ona ole to'esea ai o ia, o le tuai lava ona faataunu’uina ose taotoga faapitoa o le umi foi lena ona mafatia pea o lenei aiga aemaise lava o matua ona o mafutaga ma fanau" o le tala lea a le faamasino ia Clarke. O le tuai ona faatino o le taotoga o le tino maliu, o se popolega tele lea i le Faamasinoga lea e masani ona laga ai le mataupu i leoleo ma le Ofisa o le Loia Sili. O lenei faalavelave sa tula'i mai i le Aso Sa 01 Aukuso 2021, sa fai ai le taumafataga o le aoauli a le ua molia, o lona tina, ma ona tuafafine e aofia ai ma le tina o i latou na aafia. Na otegia e le tina o le ua molia le na aafia ,ma na fa'ali'i le ua aafia ma tau'ai i lalo ana mea'ai, ona tu lea i luga o le tina ma savali ese mai i fafo. Na faalogoina e le ua molia ma ia aga’i atu ai i le na aafia ma fa’ao’olima ia te ia ma togi le ulu ile fafie. Na tagi le alii 14 tausaga ua maliu ma pau i lalo ma na maliu ai lava i le 3 aso mulimuli ane. Ma o le faaiuga a le faamasinoga ua faa falepuipuiina ai lenei tama i le 5 tausaga ma masina e 6.

17 Iuni 2022 O le po o le aso Tofi pe tusa i le lata i le itula e 9pm ile afiafi na tulai mai ai se faalavelave tau taavale i le nuu o Saina i Faleata. O ni fa’amatalaga a nisi o molimau e lei mananao e faailoa o latou suafa ina ua fesiligia e le BluTV ile po anapo, na fai mai miliga a taavale mai i le agai mai i Faleolo i Apia ina ua o’o mai i le vaega o lo’o iai le pi'oga i le tuaoi o Saina ma Vaitele na faafuasei ona o'o mai le isi taavale e malaga atu i Apia i le agaia i Faleolo i lona itu sa'o ae peitai o lea o lo’o taumafai le taavale pa'epa'e e tipi le taavale sa la'ua mili mai. O ina tonu na tulai mai ai loa le faalavelave ina ua faigata ona toe faatonutonu e le ave taavale lana taavale ma fetoai ai loa mase susuki ma taavalevale ai luga o le auala tele. O lo’o auina atu ia nisi o i laua na aafia i lenei faalavelave tau taavale i le falemai i Motootua ona o manuaga tuga. Na taunuu atu le matagaluega o leoleo ma faatinoina le latou galuega mo le saogalemu. I lenei tausaga 2022 ua faamauina ai le faatupulaia o faalavelave tau taavale afi ua lavevea ona ole ave taavale saosaoa, faatamala ma le tagofia o le ava malosi ma le tagofia o nii fualaau fa’asaina.

16 Iuni 2022 Ua mae'a nei ona faaulu se talosaga a le faipule o le Itumalo faapalota o Lepa o ia foi o le taitai o le vaega fa’aupufai e Puipuia aia Tatau a Tagata(HRPP) le susuga ia Tuilaepa Sailele Malielegaoi fa’apea le alii faipule o Faleata 3 le tofa ia Lealailepule Rimoni Aiafi ia le faaiuga a le Komiti faapalemene o Amio Tauoloa ma Tulaga Aloa'ia o le Palemene lea na mafua ai ona faamalolo le tumau nei. O le susuga ia Tuilaepa Sailele Malielegaoi ma le tofa ia Lealailepule Rimoni Aiafi na faamalolo mai i le palemene ina ua taunuu le suesue ale komiti faapitoa i sana faaiuga ona ole faamaonia ai o le solia ai e faipule nei o nisi o tulafono tumau ale maota aemaise o tulaga aloa'ia. E lei mafai ona fa’amautinoa mai se aso ole'a amata ai toalaulauga mo le nei mataupu i luma ole faamasinoga sili a Samoa. O sui faipule nei e toalua o lo’o faamalolo mo se taimi e aunoa ma ni totogi ma nisi faamanuiaga fa’alemalo e maua. O le umi ole fa’amalolo ai o laua nei mai ile auai i fono a le Palemene e le'i mauatinoa e pei ona ta'ua ile faai'uga," E faamalolo le tumau se'ia iai se taimi".

16 Iuni 2022 O lo’o faagasolo ile faamasinoga sili i Mulinuu tolaulauga ole faamasinoga o lo’o tulai ai ni alii se toafa i ni moliaga e 18 a le itu a leoleo o lo’o molia ai ini tauplepulega e fa’ao’olima i se taulealea o le afioga o Faleasiu i le tausaga e 2018. O le ta’aloga volipolo na fai i le malae ta’alo a le Ekalesia a Iesu Keriso o le Au Paia o Aso e gata ai na tulai mai ai lenei vevesi ina ua fautuaina e nei aualii e toafa ua molia nei le taulealea ua maliu i sona mitiafu sa fai ona e le faataga i tulafono ale Ekalesia. Ae peitai e lei talia e lenei alii fautuaga ma o lea na mafua ai loa ona tulai mai se fese’eseaiga ma vevesi ma i’u ai loa ile faaoolima o nei alii e toafa ile taulealea ua maliu. O le moliaga faaleoleo ale itu tagi ole fasioti tagata pa'ivalea.

15 Iuni 2022 I le taunuu ai o Fiamē i le Palemene o Niu Sila i le taeao ananafi, na valaaulia ai e Fiamē ia Ardern ina ia malaga mai i Samoa e auai i le fa’amanatuina o le Tutoatasi o Samoa i le masina fou, ma na ia toe faia foi lea valaaulia ile lautele ina ua feiloai male au faasalalau. Ina ua uma ona faafeiloai Fiamē, na faailoa e Ardern le taua o lena fonotaga o le a talanoaina ai mataupu e pei o suiga o le tau ma le tele o isi mataupu taua oloo talanoaina ile Pasefika. O le fa’atupulaia o Saina i totonu o le Pasefika o se tasi lea o mataupu e mautinoa o le a talanoaina e taʻitaʻi e toʻalua i a latou talanoaga. O talanoaga a le Palemia o Samoa ma Ardern e tele lava ni mataupu taua o lo’o talanoa ia, o nisi o ia mataupu e aofia ai le galulue faatasi o atunuu e lua i tulaga tau i turisi, aʻoaʻoga ma isi vaega tau tamaoaiga. Mai le aso 1 o Aukuso, o le a si'itia ai faigamalaga i Samoa mai le malaga ta'i vaiaso o lo'o i ai nei mo pasese i malaga i aso uma i le fa'ai'uga o le tausaga. O lana fe’au i tagata Samoa o lo’o aumau i Niu Sila, o le a fa’ataunu’uina le fa’amanatuina o le fa’amanatuga i le silia ma le 12 masina ina ia lava le taimi e toe fo’i mai ai. Ina ua fesiligia ni mana’omiaga e Samoa mai ia Niu Sila, tali Fiamē “E le’i faanatinati e fai se lisi o faatauga”.

15 Iuni 2022 E leai se fuafuaga a Samoa e fai se so’otaga tau militeri ma le atunuu o Saina, o le saunoaga lea a le Palemia o Samoa le afioga ia Fiamē Naomi Mata‘afa. O lo'o i Niu Sila le tamaitai Palemia mo lana asiasiga ma lana malaga fa’avaomalo talu ona avea o ia ma taitai ole malo o Samoa mai ile tausaga na tea nei 2021. O lana asiasiga ua talafeauga ma le fa’amanatuina o le 60 tausaga o le faiga paaga a Niu Sila ma Samoa aemaise foi ole 60 o tausaga talu foi ona tutoatasi Samoa. I se talanoaga a le aufaasālalau ina ua mae‘a se la feiloaiga ma le Palemia o Niu Sila Jacinda Ardern i lenei vaiaso, na saunoa ai Fiamē: “E leai lava se talanoaga i le va o Samoa ma Saina e uiga i le militeri”. Na ta'ua e Fiame, o le'a talanoaina e malo o le Pasefika ia mataupu e uiga ia Saina i le Fono a Atumotu o le Pasefika e tatau ona faia mai ia Iulai ile aso 12. "O le mataupu e tatau ona iloiloina i le lautele" o lana tala lea. Na ta'ua e le tamaitai palemia o Niu Sila ia Adern o lo’o i ai le agavaa i le itulagi e feagai ai ma faafitauli tau le saogalemu ma e mafai ona foia faatasi e malo ma atunuu ole pasefika e iai ma Samoa. “E iai a tatou feagaiga mo vaega e manaomia ona faamuamua i le lotoifale o le Pasefika,” o le toe fa’aaopoopo lea a le Palemia o Samoa ia Fiame Naomi Mataafa i lona talitonuga e mafai ona tutu faatasi atunuu o le pasefika e talanoaina ni mataupu ogaoga ma maaleale. I le saunoaga a Fiame na ia ta'ua ai, o le aso faamanatu o le Feagaiga Faauo (Treaty of Friendship) na sainia e atunuu e lua o le a fetaui ma le tatalaina atoa o tuaoi o Samoa i le aso 1 o Aukuso 2022.

15 Iuni 2022 I le taumafaiga lava ina ia una'i le lelei o faitautusi a alo ma fanau o Samoa o le 'auga lea ma le faamoemoe ua tauala ai se foa'i a le ofisa o le Amepasa o Amerika i le faletusi o le Nelsons Library. I se sauniga na faia i le taeao o le Aso Lulu ile faletusi o le Nelsons Library na taua’ao ai se fesoasoani a le malo o Amerika e tauala mai i le latou Amepasa i Samoa nei. O lenei foai e aofia ai nofoa e 20, o masini Komepiuta e 5, o cameras aemaise o tusi faitau. O le faamoemoe o lenei fesoasoani e pei ona taua e le sui o le ofisa o Amerika ina ia fa’aauau pea taumafaiga mo le una'i lea ole faitautusi o fanau. I lenei fesoasoani ua fa’amatu’u atu nei i le matagaluega o Aoga taaloga ma Aganu’u. I le mae'a ona taua’ao olenei foai na maua foi male avanoa e faia ai ni sainiga lima o maliliega mo le fausia ai ose isi faletusi ile motu o Savaii i Salelologa. Na momoli le faafetai a le ofisa o aoga ile malo tele o Amerika e tauala atu ile Amepasa ona ole fesoasoani fa’aauau mo le fa’aleleia lea o faitautusi a fanau. I le faletusi a le Nelson e iai le tulimanu ile pito i luga e faaigoaina o le Americans Corner, ma o lenei auaunaga e maua fua le auaunaga mo initaneti e leai se totogi.

14 Iuni 2022 O le taeao o le Aso Lua 14 Iuni 2022 na fa’ataunu’uina ai le laugatogi mo le tauvaga o le TVET Competition mo Kolisi maualuluga uma o Samoa i le faletalimalo o le Taumeasina Island Resort. E tolu ni vaega lautogia na vaevaeina ai lenei tauvaga mo fanau aoga i Kolisi Maualuluga, o le vaega muamua o le tusiga tala i le Gagana Samoa ma le Gagana Peretania i vasega 12 male vasega 13. O le vaega lona lua, o le tauvaga Tiktok mole tausaga 12 ma le tausaga 13 ma le vaega mulimuli o le vaega lea mo faailoga fa’apitoa. O le autū o lenei tauvaga e fa’apea “O le Lumana’i, o Faiva Alofilima po’o Matātā ‘Ese’ese / TVET Skills for a Brighter Future” I le saunoaga a le Minisita o Aoga Taaloga ma Aganuu ia Seuula Ioane ia fofola ai le taua ma le fa’amoemoe o lenei tauavaga mo alo ma fanau aemaise lava o Kolisi maualuluga o Samoa ina ia faalauiloa ma faatauaina tomai ma agavaa o lo’o aoaoina ai alo ma fanau i so’o se mataupu i totonu ole potu aoga. "O le ‘auga ma le fa’amoemoe o lenei polokalame fa’atauvaga, o le fa’alauiloaina ma le fa’atāuaina o tomai ma agava’a o lo’o mafai ona tapu’e, ao’ao’ina ma ausia e alo ma fanau e ala i matā’upu tau matātā ‘ese’ese o lo’o ao’ao’ina i totonu o ‘āoga. " Seuula Ioane Tuuau. "E lē toe fa’ailoaina ma fa’amatalaina le tele o fa’amanuiaga ua va’aia ma o tatou molimauina mai agava’a ma tomai lea o lo’o ao’ao’ina i matā’upu o matātā ese’ese, e pei o le Kamuta, Musika, Tusiata, Kuka & Su’isu’i aemaise o le Faifa’ato’aga fa’apea Ta’aloga ma fa’agatama lea ua iloa ai Samoa i le lalolagi. O le tatou matāfaioi fai fa’atasi, e tauala atu i le Matāgaluega ia si’itia ao’ao’ga ma le fa’atāuaina o matā’upu i matātā ‘ese’ese i totonu o ‘Āoga. O le lu’itau fo’i lea mo i tatou uma. E tofu i tatou ma le pitolā’au e fa’atino ina ia mautinoa e taunu’u lenei fa’amoemoe i le manuia, auā alo ma fanau, o le lumana’i lea o Samoa. E le gata i le Mālō, le Matāgaluega ae fa’apea mātua ma ‘āiga ina ia lagolagosua i fanau iā latou ‘āoga." O le tauvaga lenei na tatala lava le avanoa i Kolisi uma e fia tauva ma auai i vaega lautogia eseese, na iai ni isi o Kolisi maualuluga sa lei mafai ona aua molea tauvaga. I fa’asoa a ni isi o fanau, e tele se taua o lenei polokalame faatauvaga mo latou e filifili ai mataupu talafeagai lelei ma le manaoga o lo’o iai, ae e le gata i lena o le taua e mafai ai ona va’ava’ai atili ai i ni isi foi o itu eseese e faamautu ai pea le aveina o nei mataupu faamatata eseese.

14 Iuni 2022 Na asia e le Minisita o le Soifua Maloloina afioga Tafito Toogamana Selesele faatasi ai ma susuga i alii fomai o le matagaluega ia le nofoaga o le Goshen Trust poo le nofoaga lea o lo’o tapu'e ai soifua o i latou iai ni aafiaga o le maafaufau i Moamoa. O le asia ai e le alii Minisita o lea nofoaga ona ose talosaga a le tamaitai pule aemaise o le Komiti faatonu o le fa’alapotopotoga i le mo’omia ai lea o se fesoasoani a le Malo mo le toe fa’aleleia lea o lenei nofoaga aua i latou o lo’o nonofo ai. I le taeao o le Aso Lua 14 o le masina o Iuni na auai ai le Minisita, ma sa tomua lava lana saunoaga i le fa’afetai lea i le tamaitai pule ona ose talosaga na tu’uina atu mo le manaomia ose fesoasoani. O le talosaga a le fa’alapotopotoga a le Goshen Trust ua taatia nei i luma o le laulau a fono ale Matagaluega ma o lea ua iai le faamoemoe e taumafai le alii Minisita e fa’aleoina i luma o le palemene. Na saunoa le alii Minisita, ua iai le faamoemoe e faamatuu atu se vaega tupe i totonu o le talafa’atatau o le tupe a le matagaluega e fesoasoani ai ile faalapotopotoga. O le nofoaga lenei e le gata ose mapusaga e mapu ma sulufa'i, ma tausi ai i latou ua iai ni aafiaga o le mafaufau ae o se nofoaga foi e mafai ona toe tapu'e ai o latou mafaufau aemaise o le soifua. I le saunoaga a le Minisita ua ta'ua ai e le mama i le vaai a le Malo lea tulaga, ona ose tasi nei o fa’alapotopotoga o lo’o iai lona sao taua mo alo ma fanau aemaise o le mamalu o le atunuu ua a’afia i nei a’afiaga o le mafaufau e mafai ona faia iai nisi o galuega fesoasoani e toe faafoi le mafaufau i le malosi. Na faafetaia e le Minisita o le Soifua Maloloina le tamaitai pule ia Moana aemaise o le pulega ona ole galulue malolosi ma le leai ose faalogologotina i le tausiaina male vaavaaia o nei tagata. O le asiasiga ale Minisita ma le mamalu o le vasega o foma'i ina ia mafai ona silasila lelei le matagaluega i vaega tonu lava e tatau lava ona fesoasoani iai le Malo, ua fautuaina ai e le matagaluega le faalapotopotoga mo le tuuina atu ose tusi talosaga aloa'ia e talosagaina ai lenei faamoemoe po’o lenei poloketi mo le Goshen Trust.

13 Iuni 2022 PC: Qantas Facebook. Ua fa'amautinoa mai nei e le Kamupani Vaalele a le Qantas lana faigamalaga muamua ua faamoemoe nei mole aso a taeao 14 Iuni 2022. E pei ona ripotia ai e le tatou BluTv le talia ai lea ose faamaoniga a le Matagaluega o Galuega poo le tatou Malo o se talosaga a le Kamupani Vaalele ina ia mafai ai ona fa’aauau lana auaunaga i le va lea o Ausetalia ma Samoa. Ae peita'i o lea ua fa’alauiloa mai nei le faamaonia ai o le amatalia ai o malaga mo le vaalele ole Qanatas ile aso 14 o Iuni 2022. O le malaga muamua ua faatulaga mo le aso 14 Iuni 2022, o le malaga mai lea i Brisbane ma Sydney i Apia(Samoa) ona toe malaga atu ai lea o le Qantas i mai i Apia(Samoa) agai atu i Sydney, Ausetalia. O le isi malaga e sosoo ai ua fuafuaina i le aso 21 Iuni 2022 malaga mai i Brisbane ma Sydney e agai mai i nei i Samoa, ae o le malaga mulimuli mole masina lenei o Iuni ua fuafuaina i le aso 28. O le masina i Aukuso ua faamoemoe e o'o atu iai ua amata ona toe fo’i lava i le tulaga masani o faigamalaga leai se tapulaa e pei ona faatulaga ai le toe tatala aloaia ai o faigamalaga faavaomalo o Samoa.

13 Iuni 2022 Ua fa'atalosagaina nei e le asosi o tama ma teine tuai o le kolisi ole Logoipulotu i Salafai le atunuu mo se seleni ina ia fausia faauma ai le nofoaga mo tagata matutua ua amata lona fausiaina i Salafai i le nofoaga sa iai le aoga o le Logoipulotu. I se faatalanoaga a le komiti o lenei poloketi ma le BluTv ile faaiuga o le vaiaso, na ta'ua ai e lenei komiti le faamoemoe mo le motu i Salafai ina ia faamautu ma tausi ai nisi o tagata matutua mo le motu tele o Savaii. Na fa'aalia e patele Mosese Vitolio Tu'i, na amata ona toe faamaopoopo lenei asosi o tama ma teine tuai a le Logoipulotu i le tausaga 2017 ma o le poloketi muamua lenei sa talanoaina e lenei asosi ina ia iai se vaega e fausia i lea nofoaga e manatua ai pea lenei Kolisi e ui ua leva ona tapunia. O le nofoaga lenei o lo’o ua fausia nei ma ua faaigoaina o le MAPUIPULOTU mo tagata matutua. O lenei poloketi e ono o’o atu lona faatupeina ile $1.5 tala Samoa. O le taimi lenei o lea ua faagasolo galuega e faaaogaina ai ni isi o foa'i mai i nisi o paaga aemaise o ni isi o sa'iliga tupe fa'aauau oloo faatinoina pea ele Asosi. Saunoa le failatusi o lenei faamoemoe le susuga ia Moelagi Jackson, talu ai ona o le ta'ape o fanau ma i latou uma sa aotauina i lenei Kolisi ua tapenaina ai e le komiti se auala e mafai ai ona faatinoina le foa'i i upega o faamatalaga. Afai e te fia 'a'ao foa'i molea fa'amoemoe ia aga'i ane ile tuatusi. https://givealittle.co.nz/cause/logoipulotu-college-alumni-for-mapuipulotu-home?fbclid=IwAR2L57ze0NfJdp-q746r8LRKP-QBMfF_bb97L9Ap7_VEEfVFESTQG-T43WM Ma ole'a faamauina ai fo'i ma lau foa'i.

13 Iuni 2022 PC: Facebook Ua i luma nei o le matagaluega o galuega ma atinae tetele se talosaga a le Kamupani Vaalele o le Quantas mai Ausetalia e mafai ai ona maua se avanoa e lele mai ai ile alava'a lea mo Samoa pe'a toe tatala tuaoi fa'avaomalo o Samoa i le masina o Aukuso. I le talosaga a se tasi lenei o kamupani vaalele tele i Ausetalia ua atagia ai le fa'aono lua ai o vaalele mai i Ausetalia o lea tausia lea alava'a fa'avaomalo pe afai lena e talia nei talosaga, aua o le taimi nei e nao le tasi le va'alele mai Ausetalia o lo'o iai ana malaga mo Samoa ua nao le kampunai vaalele o le Virgin Australia. Ua fa'alauiloa foi pasese pa'u mo vaalele nei i Ausetalia e tapena ai le taimi o le toe tatalaina o faigamalaga fa'avaomalo a Samoa, e le gata o pasese pa'u ae ua tatalaina foi ma avanoa mo le talosagaina o VISA mo faigamalaga. I nai vaiaso ua te'a sa iai foi ni fonotaga a le au faipisinisi tetele i le itulagi lenei ina ia fa'atalanoa ma faamautuina ai vaalele o le'a mafai ona kavaina fagaimalaga i le va o Ausetalia ma Samoa ma nisi o atunuu o le pasefika.