Search Results

30 Me 2022 O se va'aiga e le'i va'aia muamua i le tuto'atasi o lenei tausaga 2022, le maua ai lea o le avanoa e sisiina ai e le Tama'ita'i Palemia o le malo tuto'atasi o Samoa le fu'a poo le tagavai i le aso Lulu 1 Iuni 2022 ile fa'amanatuina o le tuto'atasi. Ua ose fesili ua fesiligia ai nei lenei faiga talu mai ona tutoatasi Samoa i le avea ai 'ose Palemia ma se tagata fa'apitoa e na te sisiina le tagavai o Samoa, aua o lea tulaga e pei ona masani ai i tausaga ta'itasi e na'o le Ao mamalu lava ole Malo e na te fa’ataunuuina le sisiina o le fu'a. Ae peita'i i se faamatalaga a le failautusi o le Komiti o tapenaga mo le tuto'atasi 2022 ia Agafili Shem Leo na ta'ua ai o lenei faiga 'ua ose fa'aaloalo ua tu'uina atu mo le Palemia o Samoa ona o ia lea ua tofia nei o se ulua'i tama'ita'i Palemia o Samoa talu lona tutoatsi i le tausaga 1962. O le tua'a o Fiame Naomi le afioga ia Mata'afa Faumuina Mulinuu II o le ulua'i Palemia lea o Samoa i le 1962, o ia lea sa ia tuuina i lalo le fu'a o le tuto'atasi muamua lava a Samoa i lena tausaga. E iai le manatu o le to'atele ua ose tulaga fo'i ua talafeagai le fa'aaloalo mo le tamaitai Palemia e sisiina le fu'a ole tutoatasi o lenei tausaga i le atoa ai o le 60 o lona sa'olotoga. O le Aso Lulu 1 Iuni 2022 o le'a fa'ataunu'uina ai le faamanatuina o lenei aso taua i se sauniga laitiiti i le malae o Ti'afau. Ua iai le fa'amoemoe ua na'o i latou lava ole'a valaaulia e mafai ona auai ona o le puipuiga mo le faama'i o le Koviti 19.

30 Me 2022 E le’i manuia taumafaiga a le Manu Samoa taitoafitu i le isi vae ole ta’amilosaga lakapi tatoafitu i Lonetona ile fa’ai’uga o le vaiaso. E ui ‘ina e le’i saofagā atu le ‘au ‘ale atunu’u ile sa’iliga siamupini o le ipu ‘autū ae sa maua le avanoa e sa’ilia ai ma le ‘au a Fiti le pine ‘apamemea po’o le tūlaga tolu i lea ta’amilosaga. I le ta’aloga o le semifinal ma Fiti na manumalo ai Fiti i le 31 i le 26 a le Manu Samoa, o se taaloga finau ina ua toe osofa’i malosi le ‘au a le atunuu i le ‘afa mulimuli ae peita’i fa’aalia e le pulega ua fai sina tuai. O se ta’amilosaga na va’aia le fīnau o le ‘au a le atunu’u le Manu Samoa, o ta’aloga i pulu(pool) e le’i iai fo’i se malolo a le Manu Samoa i ana ta’aloga ma ‘au o Spain, I le sa’iliga o ni ‘au e sa’ili siamupini mo le ipu ‘autū po’o semifinals na feto’ai ai male ‘au mālosi a Ausetalia, peita’i sa le’i manuia ‘ina ua manumalo ai Ausetalia i ‘ai e 28 ile 14. I le mae’a ai o le vae lenei i Lonetona o lo’o tumau ai pea le tulaga o le Manu Samoa i le tulaga 10. I le vae lenei i Lonetona na maitauina ai le maualuga ua iai le ta’a’alo a tama na fili atu lava i Samoa(locals), ma ose fiafia tele lea ua fa’aalia ai finagalo o tagata Samoa ona o le filifiliga a le faia’oga o lana ‘au talu ona amata mai le taamilosaga lenei o le lakapi ta’ito’afitu a le Lalolagi i le tausaga lenei 2022. O le ‘au lakapi a Ausetalia ua manumalo nei i le taamilosaga lenei o le taitoafitu i Lonetona ae olea ua toe tasi ai nei le isi taamilosaga o lo’o totoe mo le tausaga lenei 2022 lea faamoemoe e faia i le aso 27 male 28 i le Los Angeles i Amerika.

Ua fa’ailoa mai nei e le matagaluega o Tiute ma Tupe Maua a Samoa le taofia tumau ai nei o le toe gaosiaina o 'ava malosi o le ROVER, SAMI, BOOM, RICE, KING, NIU VOKA, 'OLI'OLI, TALOFA PLUM MA ISI i totonu o Samoa. I le faasilasila mai i le Matagaluega o lo’o faapea mai: 1. E tusa ai male malosi'aga o le Pulega Faatonu i lalo o le Tulafono o Ava Malosi 2020, ua taofia ai nei le gaosia , tufatufaina ma le faatauina atu o 'ava malosi ua ta'ua i lalo e afua atu i le taimi ma le aso o lenei faasilasilaga. E afua lenei taofiaga ona ua faaiugafonoina e le pulega Faatonu le taofia ma le faaleaogaina ai o laisene mo le gaosiaina, tufatufaina atoa ai male faatauina atu o 'ava malosi nei. O isi ava malosi e pei ole pia ole SILI ma le MONI o lo’o taofia le tumau nei lona gaosiaina, atoa ai ma le tufatufa ma le faatauina atu i tagata lautele. Ae peita'i o le ava malosi o le Vailima Export Larger lea e faaigoina e le toatele o le POVI ma le Pia ole TAULA STRONG ua toe faatagaina nei lona toe faatauina atu e pei ona amata mai i le aso 28 o Me 2022. O se solitulafono ia le le usita'ia ai e kamupani gaosi ava malosi o le faasalalauga e ala i le gaosiaina o 'ava malosi ua taofia tumau nei e pei ona ta'ua i luga. O le nei mataupu na afua mai ina ua faailoa atugaluga a isi o fa’alapotopotoga aemaise ose valaau a le Faamasinoga ina ia sailiili nei ava malosi ona o le tele o mau faalavelave solitulafono na tulai mai ai ile amataga o le tausaga nei aemaise o tausaga ua mavae.

27 Me 2022 Tusitala: Vaai Nah Folasa O le aso Faraile 27 o Me 2022 na faataunuuina ai le talomua a le afioaga o Gagaifolevao, i fa'aaliga o fua o faatoaga, o atinae lafumanu ma togalaau o fualaau'aina. O se tapenaga sa maoa'e foi lona tapenaina e le afioaga, e lagolago ainle fa'amoemoe sa fa'amaite ele matagaluega o fa'atoaga ma faigafaiva. O le polokalame lenei o le talomua sa toe faamaite e le faigamalo ua iai nei e tauala mai o le afioga ile Minisita o Faatoaga ma Faigafaiva ia La'aulialemalietoa Polataivao Fosi Schmidt. O le faamoemoe ale matagaluega o Faatoaga ma Faigafaiva ina ia una'i pea le atinaega o atinae fa'atoaga mole soifua manuia o tagata ole atunu'u. Ae le gata o le galueaina o laueleele mo faatoaga, ina mafai ona faamoemoe lava o tatou tagata ile 'oa o le eleele aua le fofoga taumafa ae o se tupe maua foi mo manaoga. O fa'atoaga ose tasi lea o fa'amoemoe maualuga lava o lo'o iai nei i manulautī a le faigamalo ua tulai mai nei i le foe o Samoa. Sa molimauina le tulaga agai i luma o atinae o le afioaga o Gagaifolevao, maitauina foi le ola finau i so'o se itū, auā na le gata ina fa'atino ina le fa'aaliga mo fai fa'atoaga ae na maua foi le avanoa sa'oao ma tamaitai e faatino ai a latou fa'alelegāpepe o measina lalaga a Sāmoa e ala i ie vaivai Samoa. I le mae'a ai le faaaliga a le aufai fa'atoaga a Gagaifolevao na fa'amatuu atu ai foi e le matagaluega o Fa'atoaga ma Faigafaiva ni meaalofa o mea faigaluega ina ia fesoasoani ai i le au faifaatoaga mole fa'aauau ai pea ona faatinoina o le faia o atinae tau i fa'atoaga. O le fa'amoemoe lenei mo le Talomua a Gagaifolevao na auai le afioga ile alii Minisita ole matagaluega o Faatoaga ma Faigafaiva ma nisi o sui faipule ole palemene a Samoa.

Opinion Post The Human Rights Protection Party (HRPP) is a Political Party that has stood at the helm for almost 40 years. Since its formation, Samoa has only ever known three leaders since it’s Independence in 1962 and all are from this Party; the late Vaai Kolone, the late Tofilau Eti Alesana (former Prime Minister - 1982 - 1985 and 1988 -1998) and former Prime Minister Tuilaepa Dr. Sa'ilele Malielegaoi (Prime Minister - 1998 -2021). In light of current events, former Prime Minister and leader of the HRPP, Tuilaepa, has been suspended indefinitely alongside HRPP secretary, MP Lealalepule Rimoni Aiafi, for having breached Parliamentary Privilege or contempt of Parliament. This opinion piece won’t go into the “when” and “what” occurred for these two political veterans and leaders of HRPP to have been suspended, but one of the many questions that comes to mind is, what's next for HRPP? another question is, do they remain the status quo? Or are they considering a change of leadership and approach? Perhaps they are considering a change of political tactics? The New Zealand National Party, for example, has had a few changes in leaders, style and approach. The Newshub-Reid poll in early May this year showed a significant surge in support for the National Party. The second survey indicated that the Māori Party could decide who runs the Government after the next New Zealand election. There is no doubt that the Opposition Party Leader, Christopher Luxon has brought a significant change in focus and attitude within the National Party, a change that was much needed. Change is sometimes good, but a delay in change is normally because of fear, maybe Tuilaepa still hasn't found someone who is capable to lead, due to his fear of the party failing. Whatever happens next, the new Government needs a strong opposition to continue to keep them accountable, prevent autocratic leadership and uphold democracy.

27 Me 2022 Tusitala: Vaai Nah Folasa Ua aloa'ia nei le fa'amatuuina atu o le ta'i $200,000 ose vaega ole $1 miliona tala na folafola ele vaega faaupufai ale Faatuatua ile Atua Samoa ua Tasi mo itumalo fa'apalota e 51. O le faamoemoe o lenei poloketi o le faamalosia o le atina'ega ole soifuaga lautele o tagata o le atunuu aemaise lava o itumalo ta'itasi. I le saunoaga ale tamaitai Minisita o Tupe ia Hon Mulipola Anarosa Ale Molioo ile tatalaina o lenei faamoemoe, na ia taua ai le maualuga a le va'ai a le faigamalo ua iai nei ile soifua manuiia o tagata ole atunuu. E 18 itumalo fa'apalota ua mae'a ona faamalieina vaega manaomia mo lea faamoemoe, poo itumalo nei ua maea ona resitaraina i le poloketi lenei $1 miliona mo atina'e ale malo. E $10.5 miliona le faitau aofa'i o le seleni mo le vaega muamua o lea poloketi lea ua faamatuu ai le $200,000 mo itumalo faapalota taitasi. Saunoa le tamaitai Minisita ua iai le faamoemoe o lea faagasolo ole'a faaauau le vaega 2 o lenei poloketi ile maea ai ona faatalanoaina i le tala faatatau ole tupe 2022.

27 Me 2022 Ua toe 4 nei aso ona taunuu lea i le aso ua faamoemoe e faamanatuina ai le iupeli taimane ile 60 tausaga talu ona tuto'atasi a Samoa. Ua amata ona faalauiloa le tele o faalauiloa mo le faamoemoe ole tuto'atasi o lenei tausaga e pei ona feagai ai ma le komiti fa'afoe o tapenaga o le tuto'atasi. Ua mae'a ona faalauiloa e le afioga i le tama'ita'i palemia fuafua ua faaiugafonoina e le Kapeneta, lea ua autasi ai ina ia faamanatuina lea faamoemoe mo le tasi le tausaga e amata atu i le aso 1 o Iuni 2022 seia o’o atu i le aso 3 o Me 2023. Ua tuu atu nei i paia o nuu ma afioaga, itumalo, fa’alapotopotoga ma Ekalesia ina ia tapena lava a latou faafiafiaga mole tuuina i luga ole Kalena ole tutoatsi o lenei tausaga. Ua mae'a fo'i ona faamanino e le tamaitai Palemia, e le'o iai se tupe fa’aagaga a le malo e mafai ona tuuina atu i so se au fa'afiafia. E le gata o lea ua tapena le komiti mo tapenaga i sauniga ma faafiafiaga ma isi polokalame ole a faatinoina ae ua tapena foi le komiti lenei i le mautinoa ona malu puipuia o vaega o lo’o faalauiloaina ai lenei tuto'atasi. O se tasi la o vaega ua faamamafa ai le taulai a le Komiti, o le fa’aaogaina lea faasolitulafono ole fa'ailoga poo le LOGO o le faamanatuina ole tutoatasi i le tausaga nei 2022 e ni isi e ono fa’aaogaina ini auala e maua ai le seleni ae aunoa ma le uia o ni auala faaletulafonoina. O lea ua faalauiloa mai ai nei e le Komiti ni tau o lea mafaia ai ona faatauina lenei fa'ailoga mo fa'alauiloa o pisinisi ma le au gaosi oloa. O tagata uma ua faamoemoe e fia fa’aaogaina lenei fa'ailoga(logo) ma le sini autu(theme) o le tuto'atasi mo ni fa'alauiloa ma pisinisi, e tatau lava ona tapa se laisene e faatinoina ai. E lua vaega ua vaevaeina ai le faia o laisene mo lea fa'ailoga, ole vaega muamua o Laisene mo fa’amoemoega tetele, o lenei laisene e ono maua e kamupani uma ma pisinisi faapea tatagata taitotasi, pe afai latou te gaosia ni oloa e fa'aaogaina ai lenei fa'ailoga ini auala e ono maua ai seleni. O oloa nei e aofia ai 'ofu, le lavalava, pulou, fu'a, pine, fatuga ma siva, ma isi fa’amoemoega uma. O totogi la mo tagata ta'ito'atasi e $300, mo le au faipisinisi e $2500 mo faipisinisi i totonu lava ole atunuu, ma le $5000 mo faipisinisi i fafo atu o ole atunuu ae mo fa’alapotopotoga e $500 (kalapu ma isi faalapotopotoga tuma'oti) O le vaega lona lua o laisene mo faalauiloa e tatau ona fa’amatuuina atu i fa'alapotopotoga pe a fai e mananao e fa'aoga le autu ma le logo. O nei fa'alauiloa uma e aofia ai ta'aloga, pese. faamanatuina o aso fa'apitoa, fa'afiafiaga ma isi polokalame e fa'atatau lava i le faamanatuina o le 60 tausaga le Malo o Samoa. O laisene nei mole silafia, e leai se totogi ma ole a tuuina atu i luga ole faautautaga tatau a le komiti o tapenaga o le tutoatasi(Matagaluega o tupe, Matagaluega ole palemia male Kapeneta) O lo’o mamafa le silasila ale Komiti i le malu puipuia o nei meatotino a le malo aemaise ole mulimulita'i ai i tulafono o fefa'ataua'iga.

27 Me 2022 Ua toe o ni aga ona fa’amanatu lea e Samoa lana tutoatasi i lona 60 tausaga. O le sini autu o lenei tausaga o le ia 'FOLAU MALE FAATUATUA'(Sails with faith). O lenei sini autu o lo'o fa'amatalaina ai le tau ole faigamalaga a Samoa i lenei 60 tausaga, lea ua tatou iai nei male agai atu i le lumana'i. I lenei tausaga ua faalauiloa ai e le LAVA HOTEL le 5 aso o le fa'amanatuina o le tutoatasi i le faletalimalo mo tagata o le atunuu, o le fa'amoemoe ina ia aumai faatasi tagata o Samoa e fiafia faatasi ma maua ai le agaga o le 60 tausaga o le saolotoga o Samoa mai i pulega fa'akolone. O lenei fa'amoemoe ole'a maua ai le avanoa e auai ai aiga , o fanau, uo ma e masani e maimoa i faafiafiaga ole a tapenaina aemaise o ana taumafataga. Talu ai ona ua le mafai ona fa’ataunuuina faafiafiaga masani e pei ona iai i le faamanatuina o lenei faamoemoe i tausaga taitasi, ua a'e ai se tofa mase finagalo i le pulega o le LAVA HOTEL ina ia faatinoina lava a latou faafiafiaga mo le atunuu e faamanatu faatasi ma fiafia faatasi ai i le aulia ai e Samoa o lana Iupeli Taimane i le aso 1 Iuni 2022. Ta'ua e le fa'atonu o le faletalimalo a le LAVA ia Pepe Christian Fruen, o lenei faamoemoe o lo’o o gatasi lava ma fuafuaga a le tatou malo ona o tulaga ma'aleale fo'i o lo'o iai le mataituina o le Koviti 19. E le gata i lea ae o ni taumafaiga ina ia faalauiloa atili le tatou atunuu ma ana tapenaga i le fuafua ai mo le toe tatalaina lea o a tatou tuaoi fa’avaomalo i le masina o Aukuso. "I le fa'amanatuina o le tatou tuto'atasi i le aso 1 o Iuni 2022, ua galulue fa'atasi nei le Lava Hotele ma le aso o faletalimalo i Samoa(SHA) male Pulega o Tagata Maimoa(STA) ina ia fa’ataunuuina se aso fa'apitoa e ta'ua o le "WATERFRONT INDEPENDENCE DAY CELEBRATION" i le nofoaga o Malaefatu i Sogi. O lea la faamoemoe ole a mafai ona maua ai le avanoa mo nisi o au faipisini laiti faatau oloa ilea nofoaga e faatau ai meaai ma isi lava auaunaga mo fanau ae ole faigofie ai foi ona maua ole avanoa e agai ane ai i le faltalimalo mo isi auaunaga o taumafataga ma fa'afiafiaga ilea lava aso" saunoa ai Pepe Christian Fruen. Na ta'ua e Pepe, o le faamoemoe lea ole WATERFRONT INDEPENDENCE DAY CELEBRATION ile Malaefatu i Sogi e tasi lava le aso, ae peita'i ua a'e le manatu a le Lava Hotel ina ia faaauau mo le vaiaso atoa, ina ia mafai pea ona maua ai le agaga ole faamanatuina ole 60 ole tutoatasi o si o tatou atunuu. O le aso 31 o Me ole a amatalia ai lenei faamoemoe ini faafiafiaga fa'ili i le faletalimalo ona faasolo atu ai lea i le Aso Lului 1 Iuni 2022 i nisi o sauniga o faafiafiaga eseese se'ia oo lava ile afiafi. Na faafetai e le afioga ia Pepe Christian Fruen le lagolagosua a ni isi o kamupani ma faalapotopotoga ole a mafai ai ona faataunuuina lenei faamoemoe taua.

26 Me 2022 Source: CNN Ua logo le lalolagi atoa i le faalavelave na tula'i mai i le malo tele o Amerika ina ua faatinoina se gaioiga fa’asolitulafono a se alii talavou 18 tuasaga le matua i totonu o se aoga maualalo ma ta fanaina ai ni tamaiti aoga e 19 ma le toa 2 faiaoga. Na amata mai lenei gaioiga faatupu faalavelave i le fanaina e lenei alii 18 tausaga o lona tina matua(grandma) ma o lo’o taofia nei i le falema'i lenei tina ma ni ona manu'aga tuga. I se ripoti a le ala faasalalau ale CNN, o lo’o ta'ua e auala mai i uluai suesuega a le vaega o leoleo i Amerika, e na'o le toatasi lava le alii talavou sa faatinoina lenei faiga. O le alii lenei na molimauina lona faa'aupegaina i au upega malosi ma sa agai atu i potu a'oga ta'itasi ma faatino ai lea gaioiga o le ta fanaina o fanau aoga. Na maliu lava lenei alii ina ua ta fanaina e leoleo. I le mae'a ai o lenei gaioiga ua lagalaga ai lava manatu ma finagalo o le lalolagi i le tatau ona toe silasila o le malo o Amerika ina fai ni teuteuga i tulafono o la'au malosi.

26 Me 2022 Na feiloa’i le Konesula fou filifili o Samoa, le susuga ia Fata Brian Kaio ma le Kovana sili o Amerika Samoa, Hon. Lemanu Peleti Mauga ma le lutena kovana Lt. Kovana, Hon. Talauega Eleasalo Ale i le fonotaga aloa’ia i le Aso Lua 17 Me 2022 i le Ofisa o le Kovana e fa'ailoa ai le amatalia o galuega fa'apa'aga o faigamalo e lua. Na tatala e le afioga i le ali’i kovana ia Lemanu i le saunoaga fa’afeiloa’i ma toe ta’ua ai le so'otaga o tua’a ua leva i le va o Samoa e lua. Na taula'i talanoaga i le toe fa'aauauina o Talanoaga a Samoa e Lua i le taumafai e si'itia le tulaga o le galulue fa'atasi i vaega tau atina'e e pei o fa'ato'aga, femalaga'iga o tagata faigaluega, fefa'ataua'iga ma auaunaga ma isi. O le Tali atu i puipuiga o le Koviti 19 ma le felagolagoma'i mai itu uma e lua a'o amata ai ona tau talatala malie tapula'a ma tatala tuaoi o se vaega taua lena na asia i le taimi o talanoaga. O le galuega fou a le Ofisa o le Konesula o se tautinoga a le Malo o Samoa i le avea ai ma sui o lea talanoaga ma le taua o le mafutaga i lea fonotaga. Na fa’afetaia e Fata le lagolagosua a le Ofisa o le Kovana ma Lt. Kovana i lenei talanoaga i mataupu o lo’o manaomia ai le galulue faatasi o Samoa e lua. Ua suitulaga Fata ia Fonoti Manogiamanu Etuale Ioane lea ua 3 tausaga o tautua i lea tofiga. PC: Facebook: Talanei News America Samoa

26 Me 2022 Ua mae’a se feiloa’iga ale Pule Sili o le Pulega o Tusipasi ma Faailoga Tauoloa (SQA), Lealiifano Easter Manila-Silipa ma le Peresetene po’o le Fa’aao (VCP) o le Iunivesite o le Pasefika i Saute (USP), Polofesa Pal Ahluwalia e talanoaina manaoga masani ma le aloaia o polokalame o nei Iunivesite e lua i le atunuu. “O lo'o talia e le USP le fa'amaoniaina o polokalame a le USP Samoa Campus e le tasi o lala o le Pulega o Tusipasi ma Faailoga Tauoloa i le fa'atauaina e le Iunivesite o le Pasefika i Saute le taua o le fa'alauiloaina o ana polokalame i totonu o le atunu'u. Ua sauni le USP ia galulue fa'atasi ma le vaega a le SQA e fa'amaonia ana polokalame i le taimi e tatau ai mo le manuia o fanau a'oga ma le atunu'u,” o le saunoaga lea a Polofesa Ahluwalia. Ua mae’a ona fa'afouina e le Iunivesitē lana resitala i le avea ai o le Iunivesite o le Pasefika i Saute ose Iunivesite e nate tuuina atu ni a'oa'oga maualuluga ma le SQA i tausaga ta'itasi. Na faafetaia e le Ofisa Sili o Pulega SQA le Peresetene o le Iunivesite a le Pasefika mo lana tautinoga i le tulaga lelei o aoaoga i totonu o le Pasefika ma lana vaaiga mamao i tagata Pasefika ina ia mafai ona maua agavaa mautinoa mo le fa’aauauina o aoaoga ma galuega i tua atu o Samoa ma le Pasefika. O le SQA ma le USP e ala i le Pule Sili ma le VCP o le a faʻaauau pea ona galulue faʻatasi ma talanoaina auala fou e faʻamalosia ai le faʻamautinoaga lelei o polokalame o aʻoaʻoga maualuluga i Samoa ma le Pasefika.

25 Me 2022 O sauaga i fanau o lo’o ua maitauina pea o se tasi lea o mataupu ogaoga o lo’o tulai mai i le atunuu. Ua molimauina e Samoa le nofoaga o le Toomaga moe ua Puapuagatia i le toomaga ai o fanau ma soo se isi ua le malu i aiga ona o sauaga eseese o lo’o feagai pea ma i latou i aso uma lava. O le ala lea ua tulai ai nisi o afioaga e lagolagoina le fa’amoemoe ma le faalauiloa, na avatau foi a lenei faalapotopotoga e tatau ona iai ose fesoasoani muamua e ofoina atu i e ua puapuagatia i Sauaga a’o lei o’o atu ise tulaga maaleale. E iai se polokalame fa’alauiloa a le Toomaga mo e ua Puapuagatia o lo’o galulue ma fa’apaaga ai ma le UNICEF i tulaga tau i puipuiga mai i Sauaga. O le manulauti ma le faamoemoe autu o lenei polokalame ina ia mafai ona maua le malamalama i aiga ma soo se isi i aafiaga o fanau ona ole feagai ai pea ma sauaga ma iai mafai ona maua le silafia i auala e mafai ona tali vave atu ai ia laveai se ua aafia. O le afioaga o Toamua o se tasi lenei o nuu ua tulai e lagolagoina lenei faamoemoe a le Toomaga moe Ua Puapuagatia. O Toamua ose tasi lenei o nuu o lo’o auai faatasi ma isi foi nuu e 7 o lo’o i lalo o lenei polokalame fa’alauiloa a le Toomaga o lo’o unaia ai puipuiga mai i soo se ituaiga o sauaga o lo’o aafia ai le fanau. I le taimi o polokalame nei tau aoaoga na mafai foi ona faasoa ai matua ma ni isi o le afioaga i le taua o le polokalame lenei mo le lautele o le nuu aemaise lava o le silafia i aafiaga ogaoga e ono lepeti ai le soifua manuia o fanau, ae o le itu pito sili ona taua o le mafai ona maua o le malamalama i auala ma fofo eseese o so’o se ituaiga sauaga. O molimau ma faasoa mai i sui auai o nei aoaoga, o aafiaga e afua ai ona faatino nei sauaga e mafua mai ona o le tagofia o fualaau faasaina aemaise ole ‘ava malosi. O le polokalame mo le puipuiga o fanau i totonu o Samoa, ose vaega o le faiga fa’apaaga faifaipea a le SVSG ma le UNICEF Pasefika. O se faigapa'aga na amata talu mai le 2015, ma ua fa'alautele e aofia ai le fa'aleleia o agava'a mo tagata faigaluega uma a le SVSG i le puipuiga o tamaiti, ma faiga fa'avae ma paaga a le Samoa Victim Support Group, fa'apitoa i le fa'afoeina o mataupu tau puipuiga o tamaiti. O afioaga e fitu na fa’ata’ita’iina mo le polokalame o le puipuiga o le atunu’u 2021-2022 e aofia ai Toamua, Fasitoo-tai, Fagalii, Luatuanuu, Solosolo, Siumu ma Samalaeulu i Savaii.