Search Results

19 Me 2022 Tusitala: Vaai Nah Folasa Ua fa’amaonia mai nei e le matagaluega o leoleo le molia ai ose tama mai Vaitele i se gaioiga sa fa’atino i lona atali’i ma tu’uina i luga o upega tafa’ilagi (facebook). O le amataga o le tausaga nei 2022 na tupu ai lenei ituaiga o sauaga, ina ua saisai e lenei tama lona atalii i le nofoa ma otegia. O ata nei i luga o upega tafailagi na mafua ai ona ona silafia e le fa’alapotopoto ole Toomaga mo e Puapuagatai(Samoa Victim Group) ma aga’i loa se galuega lavea’i. Na fa’aulu tagi ma ripoti e nisi o le atunuu lenei soligatulafono i le matagaluega o leoleo na afua ai loa ona aga’i le ofisa o leoleo ma fa’atino latou suesuega ma lokaina mai ai lenei tamā e fa’atali ai le taimi ole fa’amasinoga. O ituaiga sauaga nei e lē māmā i le matagaluega o leoleo aemaise fo’i o ni isi o fa’alapotopotoga o lo’o finauina le taofia o nei faiga e aafia ai fanau. PC: Facebook Video

Ua i lima nei o leoleo le taule’ale’a na faao’olima i le alii Saina fai pisinisi i le vaiaso na te’a nei. Fa’amaonia mai e le sui komesina o leoleo le susuga ia Auapa’au Logoitino Filipo, o lea ua maea ona fai moliaga o lenei taule’ale’a ma ua taofia ai nei fo’i e leoleo. Saunoa Auapaau, o le taulealea lenei sa agai e faatau i le faleoloa ole Saina i le Aso Toona’i, na fautuaina ele tama Saina ia fai le talifofoga ma faailoa ai e le’o mafaina ona faatauina se ROVER(fagumalosi) e tusa ai ma le manaoga i le oloa sa ia aga’i atu e fa’atau mai. Ae peitai na faafuase’ia ona tu’i e lenei taule’ale’a ma pa’u ai le tama Saina i tua. Ose ata na tuu ane i luga ole facebook na mafua ai ona iloa ele matagaluega o leoleo ma faagasolo ai loa latou gaioiga i le taofia mai ai ole alii lenei ua molia.

18 Me 2022 I le fono usu ale palemene a Samoa i le Aso Lua 17 Me 2022 na fa’aalia ai se lagona fa’anoanoa a le fofoga fetalai le afioga Hon Papali’i Li’o Ta’eu Masipa’u i nisi o sui usufono o i latou e mana’omia ona iai i lea aso fono e pei ona fa’atulaga i galuega a le palemene. O le fa’anoanoaga a le fofoga fetala’i ina ua mae’a fa’atu se lafo a le ta’ita’ifono ole Komiti o tulaga aloa’ia ma amioga tauoloa ina ia talosagaina ai se faatagana a le fono aoao faitulafono mo se taimi fa’aopoopo e fa’aauauina ai galuega a le komiti. O le fonotaga lenei ale palemene e le’o iai i le kalena o aso fono a le palemene ae peita’i ona o se lafo sa fa’atuina e le taitaifono ina toe lipoti mai ai i totonu latou iloiloga i le mataupu o lo’o a’afia ai nisi o sui ole maota, o le ala lena ua fa’ataunuuina ai lenei fonotaga e pei ona i ai le aso Lua 17 Me 2022. O le aso 24 o Me e toe tauaofia ai le palemene ma ole’a mafai ai ona toe lipoti mai ai i le palemene galuega a lenei Komiti e tusa ma le mata’upu o lo’o fa’atalanoaina. O le talitonuga a le fofoga fetalai o le mata’upu sa tu’uina atu i le komiti lenei ose mataupu taua i tulaga o amioga tauoloa i totonu o le palemene, ma sa tatau ona silasila toto’a ai sui o lo’o a’afia i lenei mataupu ina ia fa’ataunuu lo latou vala’auina e ala i le auai i fonotaga taua nei. “O le fa’anoanoaga a le nofoa o le lē amana’ia o le mamamlu o le palemene, se’i vagana o ni gasegase ma fa’alavelave tutupu fa’afuase’I ona fa’alavelavea lea o lo tatou auai i galuega faia a le palemene, ai nisi lava tuatuagia sa tatau lava ona fa’amuamua lo tatou valaauina” Fofoga fetalai. O le lē mafai ona auai o sui nei e tatau ona auai e pei ona manaomia ele Komiti na ala ai ona toe tolopoina galuega mo le aso fono a le pelemene i le Aso Lua. O le mata’upu o lo’o nafa ma le komiti lenei, o le tagi a le Sui Palemia e fa’asaga i sui faipule o Lepa le Afioaga ia Tuilaepa Sailele Malielegaoi ma le faipule ole itumalo o Faleata 3, le tofa ia Lealailepule Rimoni Aiafi. O le aso 24 o Me 2022 i le 9.30am ua toe tolopoina ai le isi fonotaga ale palemene a Samoa. Photo credit: Live from Parliament

O le taeao nei ole Aso Lua 17 Me 2022 na usuia ai le fono ale palemene o Samoa, ma ua faatautoina ai i le avea ai ma sui usufono ale palemene lona 17 a Samoa. O le tamaitai faipule mai Alatau i Sisifo ia Aliimalemanu Alofa Tuuau, o le sui faipule tamaitai mai le itumalo faapalota o Aleipata Itupa i Lalo ia Faagasealii Sapoa Feagia’i male sui tamaitai mai le itumalo o Anoamaa 2 le afioga ia Toomata Nora Leota Sapoa Feagia’i. O tamaitai nei toa tolu na filifilia mai ina ua maea le faamasinoga i le mataupu o le 10 epei ona iai le vaiaso ua tuana’i. Ua faamauina ai nei le se’e atu o nofoa o tamaitai i le 7 ae ua siitia foi male numera o nofoa ole palemene ile 54 . O Alataua i sisifo ua lua ai nei ona sui faipule, o lo’o iai le afioga ia Seuula Ioane male afioga ia Aliimalemanu Alofa Tuuau, o le itumalo palota o Aleipata itupa i Lalo oloo tulai mai ai le afioga ia Faleomavaega Titimaea Tafua lea o lea mafai ona galulue faatasi ai male tina ia Faagasealii Sapoa Feagiai ae mo le itumalo palota o Anoamaa 2 ua toalua ai nei foi ona sui, le afioga ia Fonotoe Nuafesili Pierre Lauofo ma le tina ia Toomata Nora Leota.

Ua faalauiloa fuafuaga mo le tutoatasi a Samoa I lona 60 tausaga mole aso 1 o Iuni 2022 e pei ona faaalia i se pepa o faamatalaga mai i le afioga ile tama’tai palemia o Samoa Hon. Fiame Naomi Mataafa. “Ua ta’oto le fuafuaga a le Komiti o Tapenaga mo le Fa’amanatuina o le 60 Tausaga o lo tatou Mālō Tuto’atasi i lenei tausaga, ma o le a fa’atino le Polokalame mo le tausaga atoa, e afua atu i le Aso 1 o Iuni 2022, e o’o atu i le Aso 31 o Me, 2023. O lenei fuafuaga, o le a atagia ai le manulautī a le tatou Mālō, o le aofia uma o le atunu’u atoa i le fa’amanatuina o lo tatou 60 tausaga.” I lenei fuafuaga ua iai le faamoemoe ole’a le mafai ona faataunuuina sauniga masani ole tutoatasi ona ole mataituina pea o tulaga oloo iai poloaiga o vavao ona ole faamai ole Koviti 19. Ae peitai ua maea ona faaataoto fuafuaga e tuuina atu ai I Ekalesia, faalapotopotoga , nuu ma afio’aga le tapenaina o faafiafiaga mole faammanatuina ole tutoatasi lea e faamoemoe e tausaga atoa e amata atu ilea so 1 o Iuni seia aulia le masina o Me 2023. “O le a ta’oto sauniga fa’apitoa masani o le Tuto’atasi, e gafa pea ma le tatou Mālō, ma e fuafua uma lava i le talafeagai ma aiaiga ua fa’ata’oto mo Poloā’iga o vavao mo le Koviti - 19, aemaise le tulaga faigatā ua o tatou i ai nei. Peita’i, ua manatu le Komiti e tāpā mai le mamalu o le atunu’u, aemaise Ekalesia, Fa’alapotopotoga ‘ese’ese, e fa’apea fo’i i afio’aga ma alalafaga, ni polokalame ua latou fuafuaina mo le fa’amanatuina o le 60 Tausaga o lo tatou Tuto’atasi. O ia polokalame e mo’omia ona fa’atulaga i totonu o le tausaga atoa e afua atu i le Aso 1 o Iuni o le tausaga nei, se’ia o’o atu i le fa’ai’uga o Me, 2023. E i ai le fa’amoemoe, o polokalame uma o le a mafai ona aoina mai i le atunu’u, o le a aofia uma i le kalena mo le fa’amanatuina o le 60 Tausaga o le Tuto’atasi ma e feso’ota’i atu i le tatou Sini Autū, “Folau ma le Fa’atuatua”. Saunoa le tamaitai Palemia, ua manatu le malo ole’a le iai ni faamanuiaga tau seleni mo ni polokalame ole’a aofia ai ile kalena, ae olona faamoemoe ia mafai ona tuu faatasia ni polokalame mole atunuu atoa ile faamanatuina olona 60 taimane e amata atu ile masina o Iuni. “O lea fo’i ua mae’a ona tu’ufa’atasia le Fa’ailoga ma le Sini Autū (Logo ma le Theme), e pei ona i ai i le pito i luga o lenei tusi. Mo lona fa’aāogaina, e tatau ona resitala ma totogi le tau i le Matāgaluega o Tupe, a’o le’i fa’aāogaina, e tusa ai o aiaiga o meatotino a lo tatou Mālō ua resitalaina fa’atulafono. E fa’agataina le tu’uina mai o nei polokalame uma i le Aso Tofi, 30 Iuni, 2022.”

Ole aso Faraile 6 o Me 2022 na faia ai se sauniga e tauaaoina ai pine mole au siisii uamea mamafa a Samoa I Tuana’imato, ole afioga ia ile Perestene ole SASNOC ia Talalelei Pauga sa ia tau’a’aoina nei pine I alo ma fanau a Samoa sa tauvava ilea taamilosaga faavaomalo ile tausaga ua mavae. E ui ile tulaga faigata ma luitau oloo feagai pea male lalolagi o ta’aloga ona ole faama’I ole Kovit-19, ae sa lei avea lena ma ala e taofia ai tauvaga mole au si’isi’I u’amea mamafa. Ole tausaga 2021 ile masina o Setema mai ile aso 24 ile aso 26 na faatautaia ai se tauvaga ale itulagi le Oceania sa faataunuuina lava ile faaogaina ai o malosi’aga o feso’otaiga faaneionapo. I le mae’a ai olenei tauvaga ma ua fa’amanuiaina ai Samoa I pine auro e 6, 2 pine siliva male tasi le pine apamemea. I le maea ai lava ole tauvaga nei ale Oceania, ua faamautinoa ai nei foi le saofagā ai o Samoa mole tauvaga I ta’aloga laiti ale pasefika lea e talimalo ai Saipan aemaise o taaloga ale Commonwealth lea e faia I Peretania ile tausaga lenei. E 6 pine auro a Samoa na maua ilea tauvaga ale Oceania, e toa lima ali’I male tamaita’I e to’atasi. O I latou nei: ALI’I 67kg GOLD MEDAL Nevo Ioane 73kg GOLD MEDAL John Tafi 96kg GOLD MEDAL Don Opeloge 102kg GOLD MEDAL Jack Opeloge 109kg GOLD MEDAL Petelo Lautusi TAMA’ITA’I 87+kg GOLD MEDAL Feagaiga Stowers E lua pinesiliva na maua lea e Imoasina Pelenato ile vaega ole 87kg ma le tama’ita’I o Iuniara Sipaia ile mamafa e 87+kg ae ole susuga ia Avatu Opeloge sa mauaina le pine apamemea ile vaega 76kg.

Na fono faauluuluga o iunivesite e lua i Samoa e soalaupule ni vaega e mafai ona latou galulue faatasi ai. O Pule o le Iunivesite Aoao o Samoa (NUS) ma le Iunivesite o le Pasefika i Saute (USP) e talitonu o iunivesite e lua e mana'omia le galulue fa'atasi e fa'afetaui mana'oga tau a'oa'oga o Samoa ma le itulagi Pasefika. “O fa’ato’aga e pito sili ona taua i le atina’eina o le tamaoaiga o Samoa. O le Iunivesite Aoao o Samoa e iai lona tipiloma I tulaga o fa’atoaga. O le galulue faatasi ai male USP ole’a fa'ailoa ai tomai i a'oa'oga maualuluga I tulaga tau i fa'ato'aga ma o le’a fausia ai foi agava'a o tagata faigaluega ma le fa'atupulaia o le tamaoaiga i le vaega o fa'ato'aga”, o le saunoaga lea Polofesa Aiono Alec Ekeroma o le NUS. Na faaopoopo mai e Polofesa Pal Ahluwalia o le USP e faapea “O le tulaga lava ia o Faatoaga ma vaega o taumafa o lo'o nofo lena tomai atoa ile USP, ma o matou naunau e galulue fa'atasi ma le NUS, e le taumate e manuia uma ai iunivesete e ala i le fa'amalieina o mana'oga fa'ato'aga, fa'aleleia o le soifua manuia lautele ma ola, ma le fa'amautinoaina o lo'o maua e tamaiti a'oga tomai latou te mana'omia i le taimi nei ma le lumana'i. I le avea ai o se iunivesite, o matou tuuto atu i le fa’ateleina o lo tatou auai i le faaleleia o taunu’uga faaleaoaoga faaitulagi e maua ai aoaoga loloto MA feso'ota'iga e mafai ai e a tatou iunivesite ona tupu, atiina ae, ma maua ai ni taunuuga sili atu mo le itulagi." O lenei faamoemoe ua manatu faauluuluga o Iunivesite nei ose vaega taua lenei mo aoaoga ina mafai ona galulue faatasi nei Iunivesite e lua ia vaavaai I auala fou mole galulue faatasi ai ile lumanai aemaise lava ole una’ia lea ole ola sailiili o fanau a Samoa aemaise ole Pasefika.

12 Me 2022 Ua toe fa’aauau nei le iai pea o Samoa i Poloaiga o fa’alavelave tutupu fa’afuase’i e pei ona sa fa'amautinoa mai nei ise poloa’iga mai I lana afioga ilea o ole Malo tutoatasi o Samoa le afioga ia Tuimaleali'ifano Va'aletoa Sualauvi II. E tusa ai ma lenei poloaiga ua fa’apea mai: “ O a’u o Tuimalealiifano Vaaleto’a Sualauvi II, ole ao ole malo Tutoatasi o Samoa, ina ua uma ona felogona’ male Kapeneta e ala ile FK(22) 16 ua fa’amalieina tu’utu’uga e fa’apea, ose fa'alavelave tupu fa’afuase’i mamafatu ua o'o mai e avea ma ala ole’a ono lamatia ai le saogalemu po'o le olaga tau le tamaoaiga, soifua maloloina male tamaoaiga o Samoa, ma olea UA OU FA’AALIA MANINO atu ai: O le taimi nei oloo iai Samoa ile laasaga 2 po'o le lanu moli, ma oloo tele lava nisi o sa ma vavao ua tatala talu ona maea le toe teuteuina ole laasaga 2 lenei. O le taimi nei oloo iai Samoa ile laasaga 2 po'o le lanu moli, ma olo'o tele lava nisi o sa ma vavao ua tatala talu ona maea le toe teuteuina ole la'asaga 2 lenei. Ua iai foi se fa'amoemoe mole malo o Samoa ole’a mafai ona tatala ana tuaoi fa'avaomalo ile masina o Aukuso male masina o Setema. E o’o mai ile taimi nei ua oo atu ile 11,045 le aofai o tagata Samoa ua aafia ile koviti 19 talu ona a'afia le atunuu ile faamai, ae ua 82, 612 suega poo test ua maea ona fai. O lo'o fautuaina pea e le matagaluega ole soifua maloloina le tausisia pea o puipuiga fa'asoifua maloloina e pei ole fai ole talifofga, nonofo vava ae maise ole fai o tui puipui.

11 Me 2022 Ile lauga fa'alauaitele ale Minisita o Pisinisi Alamanauia ma Leipa ia Leatinu’u Wayne Fong ile Palemene ile vaiaso ua tuanai, na ia fa’ailoa manino ai se tulaga fa'aletonu olo'o mata’ituina nei ele matagaluega ia’i latou olo'o galulue I galuega fa'avaitaimi i Niu Sila ma Ausetalia. O le fa'afitauli nei olo'o tulai mai ona ole le usitaia ai e tagata galulue nei o aiaiga ma tulafono e tatau lava ona mulimulitai iai. Faailoa ele alii Minisita e silia ile 300 tagata galuluega i galuega fa'avaitaimi ua fa'afo’i mai i Samoa ona ole solia o tulafono o konekarate lea e aofia ai ma tina po'o tamaita’i ua faananau a’o iai i luga o galuega nei. E le gata o ia tulaga ua maitauina nei i avanoa nei, ae ole agai foi luga o nisi o mataupu e pei o faiga aiga fa'apouliuli o tagata galulue lava a Samoa, ae o isi ua toe saili ai taitoalua i atunuu nei ae tatia’i taitoalua ma fanau olo'o i Samoa ona ole fa'amoemoe ina ia maua ai le sitiseni ma visa nofomau i na atunuu. O fa’afitauli nei na a’e ai se manatu ile malo ina ia tau fa'atuatuai le fa'agasologa ole polokalame lenei lea ua taofia le tumau ai ona ole manatu ale malo ina ia tau saili ni auala e fofo ai lenei fa’afitauli mo avanoa nei I galuega fa'avaitaimi.

Ole aso ua faamuta ai le faauluina o suafa o sui tauva mole itumalo Gagaifomauga 2 ile faigapalota laitiiti ile masina o Iuni. Ile pepa o faamatalaga mai ile ofisa komesina o Faiga Palota ua faamaonia mai ai e toa lua sui ole vaega faaupufai e Puipuia Aiatatau a Tagata, Toatasi sui ale Faatuatua ile Atua Samoa ua Tasi ma le toalua sui tutoatasi. O sui ale HRPP ua faamaonia mai ole Tofa ia Sooalo Mene male Tofa ia Sooalo Poka, ole afioga ia Lomia Tauloa Moafanua Siaaga olea tauva ile fu’a ale Faatuatua ile Atua Samoa ua Tasi. O sui tauva tuto’atasi olea tauvava ai Falesaopule Vaialia Iosua ma Foisala Lilo Tuu Ioane. Ole aso 16 ile aso 20 o Me olea tuu mai e mafai ona toe ave ai tua se suafa o ni sui e toe fia faaui I tua, ole aso 1 Iuni 2022 olea faia ai le palota muamua ae aso 3 o Iuni 2022 olea faataunuu ai loa le faigapalota laitiiti a Gagaifomauga 2.

Na lapata’ia e le Matagaluega o le Soifua Maloloina i Samoa tagata o lo’o Malaga mai i Samoa nisi o aiaiga o le fa’anofoesea, pea taunu’u mai i Samoa ina ia tatau ona usita’ia ma mulimulita’ia. O le vaalele na taunuu mai ile Aso Toonai 14 Me 2022 ma nisi vaa o le’a mulimuli mai ua fautuaina ai le tatau ona agai sa’o e fa’anofo’esea i maota ma laoa. Ua fautuaina e le Matagaluega o le Soifua Maloloina le to’atasi ole tagata e aga’i i le malaeva’ale e fa’atali va’a pe pikiina mai le tagata malaga olo’o malaga mai, ina ia taofia ai le maua o le avanoa mo tagata to’atele e fa’apepesi ai le fa’amai o le Koviti 19. Mo pasese uma o va’a o lo’o agai mai i Samoa ua fautuaina malosi: Ia fa’anofo’ese lava i le fale mo le 7 aso e amata mai i le aso na taunu’u ai i Samoa, i le taimi lava lena i totonu o le 7 aso. E mana’omia lava le faia o siaki masani ma su’ega (testing) o le Koviti 19 i se falema’i po’o se nofoaga mo su’ega o lo’o lata ane, i le 3 aso i totonu o le 7 aso lea ole fa’anofo’esea ma e tatau foi ona faao’o lava ripoti i le matagaluega ole soifua maloloina aua fa’amaumauga taua. O le lē usita’ia ai o nei tulaga mana’omia ma nei aiaiga ole’a mafai loa ona fa’asalaina ai ise fa’asalaga tupe e amata atu i le$2,000 agai luga. O le fa’amoemoe ma le popolega ale Matagaluega o le Soifua Maloloina ina ia mafai pea ona tau tu’u itiitia le ono sasao o le faamai i le atunuu. Ua talosagaina ai e le Sui ofisa Sili a le matagaluega le afioga i le alii foma’i ia Dr Glenn Atoa Fatupaito le atunuu lautele ina ia fa’ataua pea puipuiga fa’asoifua maloloina ma fautuaga ua tu’uina mai.

O le aso To’ona’I 14 o Me 2022 na mama ai tua se kilipi ose vitio(video) mai ise tasi o faleoloa ase tama mai Asia(Saina) I Malifa ina ua fa’ao’olima ai ai se alii talavou. I lenei ata epei ona tuuina ane ese tasi I upega o feso’ota’iga, na maua ai o se alii na aga’I atu e fai lana fa’atau, ae peita’i na toe savali mai I luma ile fata ma na maitauina se finauga male tama Asia lenei. Ina ua toe aga’I atu lenei tama I luma ile fata ina ua mae’a ona pikiina mai se oloa I luga ole fata ae fa’ao’olima ai loa lenei taule’ale’a. Ae peita’i ile taeao lenei na maua ai ele BluTV Samoa se faamaoniga mai ise tasi o ana pa’aga faamoemoeina mai ile Ofisa o Leoleo, ma faailoa mai ai olea ua taofia nei e leoleo lenei ali’i ma molia aemaise o tulaga masanai I su’esu’ega fa’aletulafono ilea mataupu. E le’o se taimi muamua lenei ua tula’I mai ai nei tulaga I Samoa, oloo maua lava ma molimauina nei faiga I nisi e faaoolima ia’i latou mai ile Atu Asia I totonu o Faleoloa ma a latou pisinisi oloo I Samoa nei.