Search Results

12 Setema 2022 Ua fa’alauiloa nei le fusuaga a le ali’i lakapi lauiloa Samoa ia Sony Bill William ma Mark Hunt i le masina o Novema ile aso 5 ole tausaga lenei 2022. O le vaiaso lea ua tea na faailoa mai ai lenei fusuaga, e le tau fa'ailoa le alii o Sony Bill i le lakapi iuni ma le lakapi liki aemaise foi o le fusu, e faapena foi le alii Samoa lenei o Mark Hunt sa fusu i le UFC, PRIDE ma le kickboxing association. O lo’o ua fesili ai nei le to’atele po’o lea tonu le fa’amoemoe o lenei fusuaga aua o i la’ua uma nei oni a lo lava a Samoa ae o lo'o aumau i atunuu i fafo. O Mark Hunt o se Samoa e aumau i Ausetalia, ua ia umia nisi o fusi tetele o paga mamafa o le ta'aloga Kick Boxing i le lalolagi. O Sony Bill William o se alii Samoa foi o lo'o aumau i totonu foi o Ausetali, sa ta’alo i au lakapi a le All Blacks aemaise o le au lakapi liki a le NiuSila i le tele o tausaga, ma e le gata i lea ol e ta’aloga foi o le fusu.

6 Setema 2022 O se taimi muamua lenei ua afifio ai le malo i le motu tele o Savaii e fa’amanatu ai le tuto’atasi e pei ona iai lenei taeao ina ua malaga atu le faigamalo e fa’atino le sisiina o le tagavai o le sa’olotoga o Samoa i Saleologa. O le polokalame lenei ua aloa’ia ai le fa’amanatuina e Samoa atoa o le tuto’atasi o le atunu'u mai i pulega fa’akolone. O le afioga i le Ao o le Malo o Samoa ia Tuimalealiifano Va’aleto’a Sualauvi 2, Sui o le Fono Sui Tofia ia Le Mamea Ropati Mualia, afioga i le tama’ita’i Palemia ma le Kapeneta aemaise o fa’auluuluga o Matagaluega ese’ese a le malo lea o lo’o ua malaga fa’atasi i Salafai e fa’amanatu le tuto’atasi i le motu tele. O le taeao nei i le Aso Lua 6 Setema 2022 o le’a mau ai nei i le tala fa’asolopito a Samoa ma Savaii le taeao na sisiina a’e ai le tagavai o Samoa o lona sa’olotoga i le afioaga o Salelologa. Na amata le sauniga fa’apitoa i le malae o le Kolisi o Sagato Poseko i Salelologa i le sauniga lotu, ona soso'o ai lea ma le sisiina o le tagavai o Samoa na sisiina e le tama’itai Palemia ia Hon Fiame Naomi Mata’afa ona fa’agasolo ai lea o fa’afiafiaga ese’ese fa’aleaganuu e pei ona lautogia ai Kolisi, Mafutaga tina ma tamaitai, alii ma faipule ma afioaga taitasi o Savaii. I tausaga ua mavae sa aga’i tasi mai lava Samoa ‘atoa i Upolu e fa’atino ai le fa’amanatuina o le tuto’atasi e ala i fa’afiafiaga ma isi polokalame aemasie o le sisiina o le fu’a i luma maota o le Fale Fono a Samoa i Mulinu’u. O le tausaga lenei 2022 ose tausaga fo’i ua fa’amauina ai le ‘atoa ai o le tausaga e fa’amanatu ai pea e Samoa le tuto’atasi, lea na amata mai i lea so 1 Iuni 2022 ua iai fa'amoemoe e mae’a lona fa’amanatuina i le masina o Me o le tausaga fou 2023. O lo'o fa’agasolo nei fa'afiafiaga ma polokalame ese’ese o le Tutoatasi i luma maota o le malo o Samoa aemaise fo’i o tua i nu'u ma afioa’aga ua molimauina ai tapenaga ese’ese ua talafeauga ma le toe fo’i mai ai o tagata ina ua toe tatala aloa’ia alava’a ile masina o Aukuso.

6 Setema 2022 O le aso ananafi na fa'afeiloaia ai le Komesina o Sulufaiga o Niu Sila Misa Peter Boshier i le ava ‘o le feiloa’iga ‘e le Komesina o Sulufaiga o Samoa, Luamanuvao Katalaina Sapolu ma lona Ofisa i le maota o Turisi i Matagialalua. O loʻo auai fa’atasi mai ma lana vaega o Atinaʻe Faʻavaomalo ma tulaga tau faufautua ini su’esu’ega. O le sauniga o le ava na auai ai fa'auluuluga o ofisa autu ma pa'aga a le Ofisa o Komesina o Sulufaiga e aofia ai le Komisi o Tagata Faigaluega a le Malo, Matagaluega o Atinae a le Malo, Matagaluega o Leoleo ma le Toefuataiga ma le Ofisa o le Failautusi o le Fono Faitulafono. O le Ofisa o le Komesina o Sulufaiga i Samoa o lo'o galulue fa'atasi ma le Ofisa o le Komesina o Sulufaiga i Niu Sila e ala i galuega o lo'o faatino e Ofisa e lua i le taulimaina o fa'asea, faia o suesuega ma le unaia o pulega lelei i totonu o ofisa a le Malo. O le ‘auga o le asiasiga e le gata ina ia saga una’ia ai le sao o le Komesina o Sulufaiga i le fa'amautinoaina o pulega lelei, ae ia fa'amalosia le so’otaga galulue i le va o Ofisa e lua, ma fa'amalosia le galulue so’oso’otau’au o ofisa o lo'o va’ava’aia i le fausiaina o faiga mautu o le atunu’u. Na faafeiloaia e le Komesina o Sulufaiga ia Sapolu le afioga i le Komesina o Sulufaiga i lana saunoaga ma faafetaia le aumalaga. “Ou te faafetai atu mo lo outou afifio mai i Samoa ma tulimatai atu i le aafiaga o le siitia ai o galuega ‘autu a le Komesina o Sulufaiga a Samoa ma le sao i le fa'amautinoaina o le malosi o pulega i totonu o tatou lava faiga” Saunoaga Afioga Luamanuvao Katalaina Sapolu a le Komesina o Sulufaiga. E atoa le vaiaso o le malaga a le Komesina o Sulufaiga a Niu Sila e aofia ai ma se asiasiga faaaloalo i le Palemia o Samoa, le Fofoga Fetalai o le Palemene ma le Minisita o Leoleo. O isi galuega o le’a aofia ai foi ma le tuuina atu o le lagolago i le Ofisa o le Komesina o Sulufaiga e faatino ai aoaoga fa'avae o suesuega mo Ofisa So'ofaatasi a le Komesina o Sulufaiga a ofisa lautele. O Misa Peter Boshier sa avea ma Komesina o Sulufaiga Sili o Niu Sila talu mai le 2015. O ia foi o le sui peresitene lona lua o le International Ombudsman Institute (IOI). O lo'o ia umia le suafa matai Samoa o Misa mai Falelatai lea na fa'aeeina i le 2000. O le a toe taliu le aumalaga i Niu Sila i le Aso Toonai 10 o Setema 2022

6 Setema 2022 Ua sola nei le ‘au netipolo a le Mighty Originals i le vaega feifiloi ma le siamupini o le tausaga lona o le ta’amilosaga netipolo a le Kalapu o le United Soulz i le tausaga nei 2022. O lenei ta’amilosaga na amataina i le 2021 ma na fa’aigoaina o le Teuila Netball Tournament e faipa’aga ai ma le Asosi Netipolo a Samoa ( Samoa Netball Association ). O lenei ta’amilosaga na ‘amata i le aso 2 o Setema ae mae’a ile aso 3 o Setema 2022. E 24 ‘au netipolo feifiloi (Mixed) na resitara ‘ae e 9 ‘au netipolo a tama’ita’i(women) i le sini ‘autu “Equal Opportunity” ( Avanoa tutusa ). O le ta’aloga netipolo o se ta’aloga ua na’o tama’ita’i ae peita’i i le finauina ma le talanoaina o nisi o mata’upu i avanoa tutusa o tagata ‘uma na manatu ai fa’alapotopoto o lenei ta’aloga i le lalolagi, ua alagatatau ai fo’i ona avea le netipolo o se ta’aloga fo’i mo le itupa o ali’i. Na tatala le fa’amoemoe a le kalapu netipolo a le United Soulz i le afiafi o le Aso Faraile i se sauniga na saunia lea e le fa’afegaiga o le Ekalesia Fa’apotopotoga Kerisiano i Samoa (E.F.K.S) i le nu’u o Fugalei. Na fa’aautu le lauga a le fa’afeagaiga i le mau e fa’apea, “E le’o le fitafita, e le’o le malosi ae o le agaga o le Atua e mafaia ai mea uma”. Na mae’a loa le sauniga ona tu’u lea o le avanoa i le lauga na a’ami, le afioga i le tama’ita’i pule sili o le Asosi Netipolo a Samoa ia Rosemarie, na vi’ia e le tamaitai pule o le Netipolo Samoa taumafaiga a le United Soulz ina ia fa’alauiloa atili le tasi nei o ta’aloga i le atunu’u aemaise o lona fa’amoemoega ina ia titina le fa’ailoga tagata ua maitauina ua a’afia ai ma le lalolagi o ta’aloga. O le tama’ita’i tausala o Samoa i Los Angeles po’o le Miss Samoa L.A. sa ia togiina le polo i le mama ina ia tatala aloa’ia ai le ta’amilosaga lenei, o le tausala nei a Samoa mai Amerika o se tasi o alo o le atunuu na ia foa’i fo’i i lenei fa’amoemoe ma ua iai lona fa’amoemoe mo le tauvaga Miss Samoa i lea so Faraile 9 Setema 2022. Na fa’atumulia le nofoaga i le faleta’alo o le Multipurpose i Tuana’imato i matua, ‘aiga ma uō sa maimoaina ma lagolagoina lenei ta’amilosaga. I le aso Faraile po’o le aso muamua lea ole ta’amilosaga na fa’agasolo ai ta’aloga mole vaega o tama’ita’i (womens division) ae o le aso lona lua i le Aso To’onai na faia ai loa ta’aloga mo le vaega feifiloi (mixed) ma taualuga ai loa i le laugatogi. Ina ua mae’a le ta’amilosaga o lenei tausaga ua toe puipuia ai nei ‘ele Mighty Original le latou manumalo ile talitā ile 2021 ma e fa’apena fo’i ile ‘au a tamaita’i lea fo’i na toe manumalo ai le ‘au a tama’ita’i St Marys ole Mighty Marys. Fa’ai’uga ole ta’amilosaga. Mixed Division: 1st. Mighty Originals 2nd. Pink Thunder Women Division: 1st. Mighty Marys. 2nd. B.T.S Na fa’afetaia ‘ele Peresetene male komiti a lenei ta’amilosa nisi o pisinisi ma kamupani sa lagolagoina le fa’amoemoe ua mafai ai ona taualugaina ma le manuia.

5 Setema 2022 E so’o se mea lava e iai lava ona mafuaaga ma ni fa’aosofiaga e mafua ai ona tupu. Na talanoa atu le Bluwave TV i se tasi o alii talavou Tusiata i le aoga tusiata a Leulumoega ise tasi o ana galuega na ia tusia ma vali ina ai le ata o le tama’itai palemia o Samoa le afioga ia Fiame Naomi Mata’afa. O le susuga ia Ameto o se tama talavou ua iai le taleni o le tusi ata, ina ua fesili atu iai le tatou ala ata, pe o lea se mafuaaga na fa’aosofia ai o ia e tusia le ata o Fiame Naomi Mata’afa. Na ia fa’apea mai, na ala ona maua manatu e fia tusia le ata o Fiame, ona o lona manatu i le tala a Samoa, ‘E AU LE INA’ILAU A TAMA’ITA’I’ ma o le mafuaaga tonu lea na manatu ai e n ate fia tusiaina le ata o le palemia o le malo tuto’atasi o Samoa aemaise o Fiame o le Palemia tama’itai muamua lenei talu ona tutoatasi Samoa i le tausaga e 1962. O le naunauta’iga foi o lenei talavou, ina ia maua sona avanoa e fia feiloa’i atu ai i le tama’itai palemia o Samoa. O se tulaga e manatu le tatou ala ata, o tulaga faapenei e atagia ai le o’o lea i loto o tagata le tula’i mai ai o Fiame e avea ma Palemia aemaise ai lava o fanau talavou. O ata ma vali e mafai ona fa’amatala mai ai ni lagona o se tagata soifua e le mafai ona tautala iai, e faapena ni lagona natia o lenei taule’ale’a ua ia fa’amatala mai ai lenei ata. O lea ua fa’agasolo fa’afiafia o le 60 tausaga o Samoa ma o le vaiaso lenei e faamanatu ai foi faa’fiafiaga ma polokalame o le Teuila ae o lea ua fa’amanatu fa’atasi ma le tutoatasi o Samoa e pei ona iai lenei tausaga 2022.

2 Setema 2022 PC: G.O.S FB Page. Ua ta'oto le polokalame a le malo o Samoa i le fa'amanatuina o le Teuila ma le atoaga o le 60 tausaga o le tutoatasi lea lava o lo'o fa'amanatuina se'ia o'o atu i le 2023. O le polokalame ua fa'ata'atia nei e amata ona tatala aloa'ia lenei fa'amoemoe i le sauniga lotu o le'a faia i le Maota EFKS i Sogi, e fa'atinoa ai Pesepesega fa'aleagaga mo le fa'amanatuina ol e 60 tausaga o le tuto'atasi o Samoa. A mae'a le sauniga i le Aso Sa ona tolopo lea seia aulia le Aso Gafua 5 o Setema 2022 e 'amata ai le polokalame o le vaiaso o le Teuila. O le'a maua le avanoa e fai ai fale'aiga ma fa'aaliga mea taulima aemaise o ta'aloga mo fanauiti ma e aso atoa lea polokalame i tua ane o le fale Samoa o Turisi i Matagialalua. O le 9.30 e fai ai Ta'aloga fa'asamoa ma Ta'aloga malie, o le 5pm i le afiafi o le'a fa''atinoa ai siva fa'amalositino o le'a nafa lea ma le Matagaluega o le Soifua Maloloina ona po ai lea ole Aso Gafua i Tauvaga Siva Samoa e pei o Maulu'ulu, Sasa ma Fa'ataupati i le po muamua lea. O le polokalame lava lea o le aso muamua o le'a fa'apena ona iai aso uma o le vaiaso, ae o lea fo'i ua maea foi ona fa'atulaga polokalame mo le motu i Savaii lea e amata lea ile Aso Lua 6 o Setema 2022, e pei ona fa'atulaga mai i le polokalame, e amata i se savali fa'aaloalo e faia lea i Don Bosco i Salelologa ma fa'asolo ai foi lea oa latou fa'afiafiaga fa'a Samoa. O le Aso Faraile o le aso lea e taualuga ai fa'afiafiaga o le Teuila ma o le'a fai ai fo'i ma se solo tele lava o ta'avale teuteuina, o le mae'a ai o ta'avale teuteuina ona taualuga lea i le laugatogi i le 10am i le taeao ona po ai lea i le 7pm o le'a faia ai le Koneseti tele a le Punialava'a i luma maota o le Malo i Ele'ele Fou. O le Aso To'ona'i ole'a fa'atino ai loa le sailiga o se tausala o Samoa 2022-2023 talu mai ona taofia i le 2019 ona o le fa'ama'i o le Koviti 19 e faia lea i le fale Ta'alo numera 1 i Tuana'imato. O le Teuila ose aso fa'apitoa lenei na faia fa'apitoa mo turisi ma tagata maimoa mai fafo ae o lenei tausaga ua iai se suiga ua tu'ufaatasi nei ma le fa'amanatuina o le 60 tausaga o Samoa ona talu ai o le fa'ama'i sa tele ai vavao ma le mafaia ai ona malaga mai tagata. O le ala lena ua manatu ai le faigamalo ina ia umi se taimi e fa'amanatu ai ia maua le avanoa e fa'amanatu fa'atasi ai ma tagata Samoa o lo'o agai mai i le atunuu.

2 Setema 2022 I le fa’amanatuina pea e Samoa o le 60 tqausaga o lona tuto'atasi ua fa'alauiloa ai nei ma le toniga fou a le ofisa Komesina o Ausetalia i Samoa nei e pei ona fa'alauiloaina lea i le Aso Tofi 1 o Setema 2022. O le mamanuina o lenei toniga na saunia ma tusia lea ese ulugalii tusiata a Samoa ia Lalovai Peseta ma Nikki Mariner o le fale tusiata o le Manamea Art Studio fa'atasi ai ma le lagolago a le tama'ita'i mai i Kuiniselani, Ausetalia ia Elaine Chambers o le Hegarty of Cultural Edge Designs, an Indigenous Australian, o le lolomiina o lenei toniga sa saunia lea e le Pacific Jewel Gift Shop and Gallery. O le mamanu atoa o lenei toniga ma lona lanu na fa’amatalaina e le Komesina o Ausetalia ia Emily Luck, " O lo'o ta'u mai ai se tala o le feso'ota'iga vavalalata lea o tagata, o le felagolagoma'i o le isi i le tasi, o le amana'ia o se faigamalaga sa o tatou malaga mai ai aemaise o se sini o olo'o ua fa'ata'atia o lo'o ua taula'i iai" O le lanu moana e pei o se fa'aaloaloga lea e fa'afetai ai le vasa po’o le sami ona ua mafai ona feso’ota’i i tatou uma o tagata o le Moana Vasa Pasefika . “O le fa’a-Samoa o lo’o talanoa mai e uiga i lo tatou so’otaga ma le eleele ma le sami, o tatou puna o le ola,” o le saunoaga lea a le susuga Peseta. “E talanoa foi e uiga i malutaga ma puipuiga, ma lo tatou tiute o le puipuia o nei punaoa e le gata mo i tatou lava, ae mo a tatou tupulaga i le lumanai,” o le fa’aopoopo mai lea a Ms Mariner. E pei ona faʻamatalaina e le tamaitai o Ms. Chambers-Hegarty, o le mamanu o loʻo faʻatusalia ai le so'otaga o Nuu ma nofoaga o faʻapotopotoga. O li'o o lo'o fa'atusalia ai setete o Ausetalia ma Samoa, fa'atasi ai ma laina feso'ota'i e fa'ailoa ai le malosi o so'otaga o la tatou faigapa'aga. Na momoli le fa'amalo a le tamaitai Komesina a Ausetalia ona o le tomai o lo’o i le au tusiata na mamanuina lenei toniga fa'atasi ma ona uiga taua i le so’otaga vavalata a Ausetalia ma Samoa. Ma ua momoli mai ai foi ma fa'amanuiaga a le malo o Ausetalia e tauala mai lea i le Amepasa i le fa'amanatuina e Samoa o lona 60 tausaga talu ona tutoatasi mai i faiga fa'akolone.

2 Setema 2022 Ua ta'oto nei fa'ai'uga a le fa'amasinoga sili a Samoa e pei ona fofoga ina lea e Tafaoimalo Leilani Tuala Warren i le Aso Faraile 2 o Setema 2022. O le susuga ia Afua Daryl Mapu sa galue o se Sui Komesina o le Ofisa o Komesina o Faigapalota ae na molia ma taofia e leoleo ina ua maua i se osofa'iga a leoleo i lona fale ni laau malosi, fuala'au fa'asaina ma isi oloa e fa'aogaina e ula ai le 'aisa i le tausaga ua tuanai i lona lava maota i Nuu Fou. O le osofa'iga a leoleo na taofia fa'atasi mai ai i la'ua ma se tasi fo'i o tamaitai sa faigaluega i le ofisa o faiga palota ia Marie Fanueli. O lenei fa'aiuga ina ua maua i iloiloga a le fa'amasinoga le fa'amaonia ai o mau i lona umia ai o nei fualaau fa'asaina, pulufana ma la'au malosi. I le amataga o le mataupu lenei, i le aso na alu ai le osofa'iga a leoleo i Nuu Fou i le maota a le ua molia le susuga ia Afualo, na maua atu ai e leoleo Daryl Mapu ma le isi tama'itai ua molia fa'atasi ia Marie i le fogafale i luga ol e maota o Daryl ma o lo'o maua ai ma fana, o pulufana, o paipa e faaaoga ula ai le 'aisa i luga o le moega. I le mae'a lelei ai o sa'ili'iliga a fa'amasino sa silasila ai ripoti ma molimau a itu uma e lua o lea mata'upu ua matua mausali ai le fa'aiuga, o le susuga ia Afualo ua mautinoa lava o ia lava e ona ina nei fualaau, fana ma pulufana sa maua lava i lona lava fale.

01 Setema 2022 Ua iai ni tala salatua ua maua ma ta'ua ai le malaga ta'amilo 'ale vaega fa'aupufai ale Fa'atuatua ile Atua Samoa ua Tasi sa malaga atu ai i atunuu i fafo i le masina ua tuana'i ma feiloa'i ai ma ana tagata lagolago e le gata o Niu Sila ae fa'apea fo'i i Amerika. Ina ua maua le avanoa e fesiligia ai e le polokalame ale Blutv o le Tautai A'e i le afiafi o le aso Lulu 31 Aukuso 2022 le afioga i le ta'ita'ifono o le vaega fa'aupufai ia La'aulialemalietoa Polataivao Fosi Schmidt sona finagalo ina ia fa'amalamala le vala lea i le fa'afofoga a Samoa ma se'i tali atu ai ini tuua'iga ua fa'apea mai, o le malaga lenei a le F.A.S.T ose vaega o lana campaign-fa'atosina mo leisi faigapalota o lo'o lumanai i le 2026. "O le malaga lenei ua leva na fuafua ma taupule, ae sa tu'u lava e fuafua po'o fea le taimi talafeagai". Laaulialemalietoa O le malaga lenei e pei ona saunoa La'auli, o se malaga fa'afetai i le 'au lagolago ale vaega fa'aupufai i atunu'u i fafo e tusa ai male lagolago i taimi ao lei amataina le palota male taimi ole faagasolo ai o fa'amasinoga.ai mai o le vaega fa'aupufai e ta'ita'i le malo lea na ala ai ona umi se taimi. O le malaga lenei e pei ona saunoa La'auli, o se malaga fa'afetai i le 'au lagolago a le vaega fa'aupufai i atunu'u i fafo e tusa ai ma le lagolago i taimi a'o lei amataina le palota ma le taimi o le fa'agasolo ai o fa'amasinoga. O le fa'amoemoe atoa o le malaga lenei e pei ona saunoa le ta'ita'ifono ina ia toe momoli atu le agaga talisapaia i le atunuu i le lagolago i le pati lea ua tu ai nei le faigamalo fou. Talu ai ona o fa'asalalauga ua fa'aalia ai e fa'apea ua amata ona fai faiga fa'atosina a le FAST, e matuai te'ena le afioga i le ta'ita'ifono lea manatu ma na ia fa'ailoa e le mafai ona nini fa'atasi ni mea fa'alemalo ma ni mea fa'apati. O le malaga lava sa alu, o se malaga lava a le vaega fa'aupufai a le Fa'atuatua i le Atua Samoa ua tasi e pei ona sa fuafuaina mai i le tausaga ua mavae pe'afai ae mae'a le faiga palota tele a Samoa. Ua fa’ailoa fo’i e le afioga i le ta’ita’ifono ia La’auli, e toe tasi le malaga ta’amilo a le vaega fa’aupufai lea o lo’o totoe. O le malaga lea i le atunuu o Ausetalia lea ua fuafua ma fa’amoemoe i le masina o Oketopa o le tausaga nei.

01 Setema 2022 O le ta o le itula e 10am i le taeao o le Aso Lulu 31 o Aukuso 2022 na toe vala'auina ai le mata'upu ile va o le ali'i fa'asalalau mai i Ausetalia le afioga ia Tiumalu Maifea ma le vaega fa'aupufai a le Fa'atuatua ile Atua Samoa ua Tasi (F.A.S.T). O le mata'upu lenei o le tagi a le vaega fa'aupufai a le F.A.S.T e fa'asaga ia Tiumalu ona oni fa'asalalauga sa ta'ua ai le suafa o le failautusi a le FAST ia Va'aaoao Alofifo ma le afioga i le ta'ita'ifono ia Laaulialemalietoa Polataivao Schmidt aemaise i lea o se fa'asalalauga e fa'asaga lea i le fa'amasinoga ona o le manumalo ai o le vaega fa'aupufai a le F.A.S.T i le faigapalota talu ai i le 2021. Na taunu'u le mata'upu lenei i luma o fa'amasino o le fa'amasinoga fa'aitumalo ma soligatulafono, o le Aso Lulu 31 o Aukuso lea la na toe tauaofia ai le fa'amasinoga mo folasaga mulimuli a leoleo aemaise oa latou mau. O folasaga mulimuli nei a loia ia fa'amautinoa ai ni mau ua fa'amaonia ma ni mau e leai ni fa'amaoniga fa'aletulafono. O lo'o molia le afioga ia Tiumalu i moliaga o le CRIMINAL LIBEL i tulaga o le fa'aleagaina o se ta'uleleia o se tagata e aunoa ma ni mau e fa'amaoni ai pe lagolagoina ai e moni nei tu'ua'iga e fa'asaga i se tagata se to'atasi pe to'atele fo'i. I le mae'a ai o fa'afinauga a le itu a leoleo ma le itu a loia o le olo'o molia ua tu'uina mai ai ma le aso e lau ina ai le fa'ai'uga o lea mataupu i le aso Faraile 9 o Setema 2022.

31 Aukuso 2022 O le Aso Gafua 5 o Setema ole'a fa'ataunuuina ai lenei tuiga tele ia Samoa mo i latou e le'i faia tui puipui ole Fiva Taifoi tele mo Samoa atoa e puipui mai ai i le fa'ama'i o le fiva taifoi. O le Aso Gafua 5 o Setema o le'a fa'ataunuuina ai lenei tuiga tele ia Samoa mo i latou e le'i faia tui puipui ole Fiva Taifoi. O le tuiga lenei e 'amata atu i tamaiti laiti ua atoa le 9 masina le matutua e fa'agata mai i tagata matutua ua 'atoa le 45 tausaga le matutua. Ua faia lenei tuiga ona ua maitauina le si'itia pea ole aofa'i o tagata ua a'afia i lenei fa'ama'i aemaise lava fanau laiti. O le tui puipui ole fiva taifoi ose tasi o auala e mautinoa ai le tafiesea o lenei fa'ama'i ma malu puipuia tagata o Samoa mai ile fiva taifoi. O le fiva taifoi ose fa'ama'i pipisi e mafua mai ile siama e nofo ma ola i ala fe'au mamao ma lapisi o tagata soifua ma meaaola. O le siama e mafai ona fe'avea'i e iniseti ma manu ninii fa'alafua, e a'afia ai fo'i ma taumafa ma vai e fa'aaoga e tagata pe'afai e le tausisia taiala ma alafua ole tumama lautele. Ua iai nei le fa'amoemoe ole'a savalia ai e le matagaluega nuu ma alalafaga o Upolu e amata atu ile aso Gafua a sau nei. Ua faia lenei tuiga ona ua maitauina le si'itia pea o le aofa'i o tagata ua a'afia i lenei fa'ama'i aemaise lava fanau laiti.'atino o nei tui puipui.

31 Aukuso 2022 Ua saunoa manino le ali'i Minisita o Leoleo ia Faualo Lefau Harry Schuster i le vevesi a a'oga na tula'i mai fo'i ile Aso Gafua o lenei vaiaso, e le 'alo lava le tulafono i le molia ai o so'o se tamaitiiti a'oga pe'afai e fa'atupuina vevesi i nofoaga faitele. Saunoa le ali'i Minisita o se galuega fo'i e tatau ona silasila iai faia'oga ma matua ia fa'atonutonu lelei fanau aua nei toe tupu mai nei vevesi i nofoaga faitele. E le'o se taimi muamua lenei ua tulai mai ai pea nei vesiga a a'oga, sa molimauina fo'i i tausaga ua tuana'i nei vevesi ma ose mata'upu olo'o taumafai ai fo'i le matagaluega o a'oga ina ia fo'ia nei fa'afitauli. Na saunoa le ali'i Minisita ina ua fesiligia el e BluTV pe le'o iai se fuafuaga ale matagaluega ina ia fa'atu se ofisa a leoleo i nofoaga fa'atali pasi ina ia mataitu ina tulaga nei oloo tutupu pea i le tele o taimi ma a'afia ai ma tagata lautele. I le tali manino a le afioga ia Faualo, " I la'u maitau i le taimi nei i le tiute a leoleo lae iai taimi nei, o lae lava leoleo..ao le mea lea o le vevesi o tamaiti a'oga. E pei o lea la fuafua e o leoleo e fa'afilemu tamaiti ae o lae lava iai matua ma faiaoga e faia le galuega lea." O leisi popolega a le Minisita e tatau ai i matua ona fa'atonutonu lelei fanau, ona e va'ai fo'i i le alofa i lumanai o nei fanau aemaise pe'afai e tapa se kilia mai i leoleo e ono a'afia ai ona o lo'o iai i fa'amaumauga a le matagaluega. Peitai ua maua nei se fa'asilasilaga ua fa'amoemoe a'oga nei e lua na vevesi o Leifiifi ma Sagato Iosefo i Alafua e fai se feiloa'iga ina ia taumafai e soalaupule lenei mata'upu.