Search Results

22 Iulai 2022 Ua le fa’atali le Komiti a le Kolisi Telosia i Moamoa se’i ‘ausia le 3 miliona tala Samoa ona fa’atoa fa’atino lea ma amata le galuega e pei ona fuafuaina mo le toe fa’aleleia o fale a’oga ma le falesa i le nofoaga lea o lo’o a’otauina ai fesoasoani ma tiakono i Moamoa ale Ekalesia Katoliko i Samoa. I le feiloa’iga a le ‘au tusitala male Komiti o sailiga tupe a le a’oga lenei Telosia i Moamoa i le taeao o le Aso Faraile 22 2022 na fa’amanino ai e le taitaifono ia Tuioa’opo Andrew Ah-Liki le fa’amoemoe ua mae’a ona ta’oto mo le fausia o fale mo le a’oga lenei i Moamoa. O le vaiaso ua tuana’i i le aso 16 Iulai 2022 na fa’ataunu’uina ai se TV Foni (TVTHON) a le aoga Telosia i Moamoa aua se seleni mo lea fa’amoemoe. Na fa’ailoa e le laulau a fono i le taeao nei i le ‘au tusitala ma fa’asalalauga le aofa’i o se seleni sa mafai ona aoina ma i lenei fa’amoemoe saili tupe. O le aofa’iga atoa o le seleni na maua mai i le faamoemoe i le aso To’onai e $507,000. 00 , ma o lo’o maitauina pea e le komiti o lo’o aga’i pea lava le fesoasoani a le atunu’u aemaise o ‘aiga ma taga lotu mo le fa’amoemoe. E ui lava e lei taitai ona ausia le seleni e manaomia ae ua fa’aalia e le ta’ita’ifono e le fa’atalia ai na amata o le galuega i le taimi lenei e fa’aaoga ai le seleni ua maua mai ile sa’iliga tupe. O le fa’amuamua lava a le Komiti e pei ona fa’ailoa e Tuioa’opo, o le manino lelei o le tala o le tupe i seleni na foa’i iai le mamalu o le atunu’u. E iai lava le fa’amoemoe e le gata ma muta ai i’i le sailiga fesoasoani lava a le Komiti ma le Aoga Telosia aua le fausiaina ma le toe taumafai e fa’alelei nei nofoaga mo alo ma fanau o lo’o sa’ili fa’alumaga aua le upu folafola a le Atua aemaise o le tautuaina o le Ekalesia Katoliko i Samoa ma le lalolagi atoa. Na fa’aalia fo’i e le ta’ita’i fono ma le laulau, e talia lava so’o se fesoasoani e pei o seleni o mea’ai ma tulaga i mea manaomia mo mea faufale aua le galuega. O lo’o silasila le ta’ita’ifono ma lana Komiti i nisi auala e mafai ai ona fa’aaogaina lava le Kolisi ma latou o lo’o aotauina ai ina ia mafai ona fesoasoani fo’i ise isi auala e maua ai se ala ga seleni e mafai ona fai fo’i ma sao ale Ekalesia mo le faamoemoe lenei. O le Kolisi lenei a Telosia i Moamoa na fa’avaeina mai i le tausaga e 1877, ma o lea ua fa’amauina le atoa ai o le 144 o tausaga o le matua o lenei Kolisi ma ua fa’amauina ai fo’i le to’atele o tamalii i fesoasoani ma tiakono ua mafai ona a’otauina ma i’u ma i lenei Kolisi.

21 Iulai 2022 A’o feagai Samoa ma le mata’ituina o le faama’i po’o le siama o le koviti-19 ua fa’ailoa mai nei fo’i e le matagaluega o le soifua maloloina nisi o vairasi o lo’o pipisi ma ta’ape solo i totonu o Samoa i lenei vaitau ole tausaga. I se fa’amatalaga a le afioga i le ali’i Ofisa Sili lagolago a le Matagaluega o le soifua maloloina ia Dr Tagaloa Robert Thompsen na ia fa’amanino ai ma fa’amaoni nei itu’aiga o siama olo’o ua a’afia ai Samoa i le taimi lenei. O siama po’o vairasi nei e fa(4) e aofia ai le, Influenza A, Influenza B, Respiratory Syncytial Virus ma le Koviti -19. O āuga o ituā’iga fulū nei e lua(2) Influenza A male B e iai le, vevela o le tino (fever), fa’apalupē/ivā, tigā le fa’a’ī, tale, tafe le isu, mafatua ma vaivai le tino, tigā maso ma le tigā o le tino po’o le tino gagase. I le saunoaga a Tagaloa, o nei siama po’o vairasi o lo’o tele ina a’afia ai fanau ma tagata matutua ma ona o le tulaga o lo’o iai fo’i Samoa i suiga ese’ese o le tau, o le isi lea auala ua pipisi atili ai le fulū lenei i le mamalu o le atunuu. O le isi siama/vairasi o lo’o pipisi nei o le Respiratory Syncytial Virus po’o le siama lea e a’afia ai ala manava o le tagata soifua, ma e tele ina a’afia ai pepe ma tagata matutua. O āuga o lenei siama po’o lenei fa’ama’i, tafe le isu, lē manogi se ‘ai, tale, mafatua, vevela le tino(fever) ma le pa’ō ole mānava(wheezing). I tulaga o puipuiga lava ia fa’asoifua mālōlōina i tua i maota ma laoa, o lo’o maualuga fautuaga mai i le Matagaluega o le Soifua Mālōlōina ina ia togafiti e pei o le togafiti ina o le Koviti -19 ma ia mautinoa le tausisia pea o fautuaga masani, ia lava le mālōlō, nofo lelei i le fale ma ia to’aga e taumafa le vai āuli.

21 Iulai 2022 O le taeao ole Aso Tofi 21 Iulai 2022 na faia ai se sauniga i le ofisa o le soifua mālōlōina i Moto’otua e tau’a’aoina ai le fesoasoani mase foa’i a le faalapotopotoga o le UNFPA i le fa’apa’aga ma le Matagaluega o Tinā ma Tama’itai atina’e o nu’u ma aga-feso’ota’i. O lenei foa’i o se tali i le talosaga a le Matagaluega o le soifua Mālōlōina e tauala atu lea i le Matagaluega o Tina ma Tama’ita’i. O le fa’amoemoe maualuga o le faigāmeaalofa lenei a le fa’alapotopotoga a le UNFPA e tauala atu i le Matagaluega o Tinā ma Tama’ita’i ol e fesoasoani lea ini vaega e fa’aaogaina e tinā ma tama’ita’i i lenei taimi a’o feagai ai ma le Koviti 19. O vaega o lenei foa’i e aofia ai oloa e fa'aaogaina e tama’ita’i ma tina aemaise o nisi o vaega e fa'aaoga mo le puipuiga fa'asoifuamaloloina e nisi o i latou e iai a'afiaga tumau o le soifua. Na avea le tamaita’i Ofisa Sili o le Matagaluega o Tinā ma Tama’ita’i ia Dr Mema Motusaga e momoli le agaga fa’afetai ile ofisa o le fa'alapotopotoga ole UNFP e fai ai ma sui o le mālō o Samoa aemaise o le Minisita o le Matagaluega. Na talia aloa’ia e le Matagaluega o le Soifua Mālōlōina lenei fesoasoani tele ma le foa’i a le UNFPA o le’ā mafai ona fesoasoani ai i nai tama’ita’i ma tinā i Samoa o lo’o matuā mana’omia nei vaega mo i latou aemaise o puipuiga lava mai i le fa’ama’i o le Koviti 19. O le UNFPA o se fa’alāpotopotoga lenei a mālo ‘aufa’atasi e fesoasoani i tulaga o oloa mo le soifua mālōlōina ma fanautama (sexual and reproductive health) . O le fa’amoemoe o lenei fa’alapotopotoga ina ia fa’aleleia atili tulaga o le ola mālōlōina o tinā ma tama’ita’i ma’i tō ma tulaga tau i feusua’iga mamā.

20 Iulai 2022 O le asō, le aso Lulu 20 Iulai 2022 ua tu’umalo ai le afioga i le ti’akono ia Kasiano Le’aupepe. E le toe tau fa’ailoina lenei tama o le atunu’u, e pei ona silafia o le afioga ia Kasiano sa avea o ia ma ta’ita’ifono o le fono o Ekalesia So’ofa’atasi a Samoa i le tele o tausaga ua tuana’i ina ua fa’apena ona tu’umalo le susuga i le faife’au toeaina sa tula’i mai i le foe i lena taimi ia Oka Fau’olo. E tele nisi o tulaga e manatua ai le susuga i le Tiakono ia Kasiano i le atunuu, i le tausaga fo’i 2021 ao vevesi Samoa i le fagapalota ma le sa’iliga o sona malo sa tula’i ai fo’i le ta’ita’ifono ma vala’au mo se Samoa tutufa’atasi ma ia maua le filemu. I nai vaiaso ua tuana’i na filifilia ai le taitaifono fou o le fono a Ekalesia so’ofaatasi i Samoa lea na tofia ai le faifeau malolo manumalo ia Aisoli Iuli e sui tulaga ia Tiakono Kasiano Leaupepe. E avea fo’i lenei taimi e momoli atu ai fa’amaisega i ‘aiga ma fanau ona o le tu’umalo o le susuga ile ti’akono ia Kasiano Leaupepe.

20 Iulai 2022 PC: Facebook Page. O lo’o iai se fa’ailoga fesili telē pe taunu’u le tu’uga fautasi na ‘atofaina mo le Teuila pe e leai. Na feiloa’i le Komesina o leoleo le tofa ia Auapa’au Logo’itino Filipo ma le ‘Autusitala ma na ia fa’ailoa ai lea tulaga. E tapunia le aso e muta ai resitara mo fautasi e na’o le 3 fautasi ua uma na totogi resitara mai i le to’a 7 o fautasi na siilima ma faailoa lo latou initalesi mo le tuuga o le tausaga nei i le faamantuina o le teuila ma le tuto’atasi o Samoa i lona 60 tausaga. E silia ma le fa’alua ona feiloa’i le matagaluega o leoleo, o le komiti o le tuto’atasi ma sui o nu’u ma afio’aga sa mananao e tutu’u a latou va’a fautasi i lea fa’amoemoe ae peita’i ua mae’a ane le aso o resitara e na’o le tolu lava fautasi na totogi resitara. E $60,000 le tupe Samoa na fa’aagaga mo faailoga tu’uga fautasi, peita’i ona o le tulaga ua iai se le mautonu ona o le toa laiti o va’a ua lesitala ua iai le manatu o le’a toe tu’uina atu lea fa’amoemoe ile Komiti o le Tutoatasi o le 2022 mo se latou iloiloga pe e toe tatala avanoa mo le resitara ae pe ‘olea iai se isi faai’uga e toe fai mo le fa’amoemoe o tu’uga fautasi nei.

20 Iulai 2022 Na talimalo le atunuu o Iapani i le malaga ale afioga i le Minisita o Galuega Tetele o ia foi o le Minisita o Va’a a Samoa. O le faigamalaga a le Minisita o Vaa ma le afioga i le pule sili o Vaa a Samoa aemaise o nisi o o tagata faigaluega i va’a, o lenei malaga o le fa’amautuina lea o le fa’amoemoe mo le va’a fou a Samoa o le’a suitulaga mo le vaa o le Lady Naomi o lo’o ia tautuaina le va o Upolu ma Amerika Samoa. O le aufaigaluega na malaga fa’atasi ma le Minisita ma le Alii Pule o va’a, ua fa’apena ona nonofo ne i nai vaiaso i Iapani ina ia fa’atinoina ni toleniga ma a’oa’oga mo le silafia i le fa’aaogaina o le va’a fou a Samoa ua fa’amoemoe o le’a malaga mai i se taimi o lenei tausaga i le masina o Aukuso i Samoa. O le faamoemoe maualuga lava ia mae’a ane nei vaiaso o a’oa’oga nei mo le aufaigaluega a Samoa i luga o va’a ua mafai ona masani ile faaaogaina o lenei va’a. I le talanoaga a le BluTV NZ ma le afioga i le Minisita aemaise o le alii pule o le Kamupani Vaa a Samoa, na fa’ailoa ai ma fa’amautinoa ai o le va’a ole la ua taula ne i totonu o le laumua o Hiroshima i Iapani. O lenei va’a e pei ona fa’ailoa e le Alii Pule o Vaa a Samoa, o le va’a lenei e tele a nai vaega ma ni suiga e ese mai ai i fausaga o le Lady Naomi lea e tautuaina i le taimi nei Samoa Tuto’atasi ma Amerika Samoa, o le va’a fou ua fa’atotogaina i masini fa’aona po nei, o ona nofoa e mafai ona fa’amoe ae fai ai faiga malologa pe’a fia ta’oto ao aga’i le faigamalaga, ua iai foi ni ‘aisa tetele e mafai ona teuina ai ni pailate o oloa tu’u’aisa ma e lautele toe umī te isi. E to’alua kapeteni ma inisinia olo’o auai i le taimi lenei i lea a’oa’oga o lo’o faia i totonu o Iapani. FUAFUAGA MO LE VA’A TUAI-Lady Naomi Ina ua fesiligia e le BluTV le afioga i le alii pule ma le Minisita o Galuega le tofa ia Olo Fiti Afoa Va’a, po’o lea se fuafuaga mo le va’a tuai o lo’o iai i le taimi lenei le Lady Naomi. Na fa’amanino ai e le ali’i pule, o faiga fa’avae lava ua masani ai tulaga o meaalofa faapenei, e iai lava ona aiaiga mo le fa’atauina atu lea e le malo o Samoa o va’a tuai nei mo i latou e iai le mana’oga e fia fa’atauina va’a nei. O le manu laiti a le atunuu, o tupe e maua mai i le fa’atauina o va’a nei e iai le fa’amoemoe e teuina ma fa’aputu e mafai ona toe fa’atau ai se isi va’a a Samoa i le lumana’i pe afai lena o le’a le mafai ona toe tallia ina se talosaga i nisi o atunuu mo ni tatou va’a. O lona uiga, o le fa’amoemoe atoa o lenei faiga ina ia mafai ona maua mai se isi seleni a le kamupani va’a a Samoa mo le lumana’i manuia a le kamupani. Na fa’aaopoopo le afioga i le Minisita, ‘afai ae le taulia le va’a lenei o le Lady Naomi mo se fa’ata’ita’iga; o le’a iai loa le fa’amoemoe ina ia fa’amagoto i le moana ia tusa ai lava ma faiga fa’avae o mea nei o va’a.

20 Iulai 2022 Ua amata nei su’esu’ega a le matagaluega o leoleo is e tino maliu o se tamā na maua i le afio’aga o Vaigaga i le fa’ai’uga o le vaiaso na te’a nei. Na fa’amaonia mai e le afioga i le ali’i Komesina o leoleo le tofa ia ‘Au’apa’au Logo’itino Filipo i sana feiloa’iga ma le ‘au tusitala i le vaiaso nei ma na ta’ua e le ali’i Komesina, o le tama e i le va o le 60 tausaga le matua o le soifua. I le saunoaga a le Komesina o leoleo ma falepuipui, na maua e le ofisa o leoleo se ripoti ma i nisi o le tagata o le nu’u o Vaigaga, le taeao lea o le Aso To’ona’i ma fa’apena ai loa ona aga’i iai le matagaluega o leoleo ma silasila iai. O le tino o le tama nei ua fa’apena ona ta’oto nei i le falemaliu i le maota gasegase o Tupua Tamasese Mea’ole i Moto’otua e fa’atali ai ona togafitiga fa’apitoa mo le sa’ilia o lona maliu lilo. E iai le fa’amoemoe e ono fa’atuai le faatinoina o nei togafitiga ona o le tulaga faigata e le’o iai se foma’i fa’apitoa i Samoa na te faia nei itu’aiga siaki ma togafitiga i se tagata na maliu e le’i iloa lona mafuaaga. O le tausaga ua tuana’i ile 2021 na iai fo’i se tasi o mata’upu fa’apenei i se tino na maua i se ma’umaga i le nu’u o Moamoa lea fo’i sa agai iai le ofisa o leoleo ma fai ai fo’i a latou su’esu’ega masani.

19 Iulai 2022 O le Aso 12 o Aukuso o le tausaga nei ua iai le fa’amoemoe e tuuina mai ai se fa’aiuga a le fa’amasinoga i le mataupu ua molia ai nei se tama 51 tausaga le matua o le soifua i lona faia o ni amioga mataga po’o fesusuaiga fai faamalosi i lona afafine (stepdaughter) po’o le tama a lona toalua o lo’o ua la nonofo nei ma i lana toalua muamua. O le tausaga 2022 na ta’ua e le itu e leoleo i fa’amaumauga, o le tausaga lena sa amata ai ona fai e lenei tama nei uiga mataga i lenei tamaita’i. E lē māmā i le silasila a fa’amasino a le fa’amasinoga maualuga lenei mataupu aemaise o lo’o a’afia ai fanau tama’ita’i talavou e i lalo ifo ma le 21 tausaga le matutua. E iai ni isi o moliaga fa’aopoopo i le tama, e aofia ai le tau fa’amata’u i le tamaitai e fa’aaoga ai se au’upega ae fa’ataunuu ona mana’o, faia o feusua’iga ma se tamaitai e i lalo ifo ma le 21 tausaga le matua ma le faia fa’amalosi o feusua’iga. E leo se mataupu e fou i le faamasinoga nei mataupu ma o lo’o molimauina fo’i i fa’amaumauga a nisi o fa’alapotopotoga e pei ole To’omaga moe ua Puapuagatia le sulufa’i pea o fanau i lenei nofoaga mo se lavea’i ona ua le malu i o latou lava ‘aiga. O lo’o galulue pea le malo o Samoa ma ana pa’aga i fa’alapotopotoga ma isi paaga fa’avaomalo ina ia soloia nei faiga le alofa o lo’o avea pea ma se to’atugā i ‘aiga.

18 Iulai 2022 O le taeao o le Aso Gafua 18 o Iulai 2022 na faia ai se sauniga fa’apitoa i le Fale Samoa o Turisi i Matagialalua e aloa’ia ai le fa’amavae atu o le Team Samoa mo ta’aloga o le Commonwealth lea e fa’amoemoe e tuuva’a mo Peretania i le aso Tofi 21 o Iulai 2022. E le’i mafai ona auai tama ma teine ta’a’alo i lea sauniga ona o le puipuiga lava mai i le ono a’afia o se isi i le siama ole Koviti 19 aemaise o le pepesi o le Flu o lo’o iai nei Samoa. E maualuga le puipuiga a le komiti o taaloga nei o le Commonwealth ona nei toe a’afia mai se tasi i le fa’ama’i ‘ona le mafai ai lea ona malaga ma tausinio i lenei fa’amoemoe o lupe. O le afioga i le Ofisa Sili o le pulega a le S.A.S.N.O.C ia Tuala Mathew Vaea na avea ma fofoga o le taeao e fa’afeiloa’i le mamalu o le ‘au vala’aulia, pulega a le S.A.S.N.O.C, lagolago autu po’o Sponsors ma afioga i Minisita o le Kapeneta na auai. O le afioga i le Sui Palemia ia Tuala Iosefo Ponifasio Tevaga na fai o ia ma lauga ‘a’ami e fai ma sui ole malo o Samoa e molimoli se fa’amanuiaga i alo ma fanau o le atunuu o le’a tauina le taua. Na fa’afetaia e le Sui Palemia le sao o alo ma fanau o Samoa lea na auai atu i taaloga laiti a le Pasefika na faia i Saipan i le Northern Marianas ile 3 vaiaso ua tuana’i, ma sa ia fa’amalosi’au fo’i ile Team Samoa ua agava’a mo taaloga nei o malo o le Taupulega . E 38 sui ta’a’alo a Samoa mo lea fa’amoemoe faatasi ai male pulega e 22 ona maua ai lea ole aofa’i ole aumalaga e 60 o le’a mafai ona malaga mo nei ta’aloga tele mai i le aso 28 o Iulai ilea so 8 o Aukuso ole tausaga nei lava 2022. O le filifiliga ole Team Samoa na filifilia ma ii tama ma teine i totonu lava o Samoa aemaise o ni isi o lo’o nonofo i atunuu e mamao. E fitu ta’aloga o le’a ta’a’alo ai Samoa e iai le ta’aloga afeleti, fusu, pi’i, Judo, ‘a’au, lakapi ta’ito’afitu male si’isi’i u’amea ‘a’asa. E iai lava le talitonu ale pulega e pei ona sa ta’ua ele Peresetene ia Pauga Talalelei Pauga, ole’a maua se ‘ai a Samoa mo nei ta’aloga lea ole’a tausinio ai Samoa ma isi atunuu e 72 ole lalolagi. O le ‘au nei a Samoa ua fai si leva ona tolegi a’o feagai ai fo’i Samoa ma ona vavao ma tapu ole Koviti 19 ae sa fa’aauau lava pea toleniga ale Team Samoa i ta’aloga nei e fitu. O le Aso 14 o Iulai 2022 lea na malaga ai le ‘au ta’ito’a fitu lakapi a Samoa, ae mulimuli atu le isi vaega ole Team Samoa ilea so 21 Iulai 2022. Ole lisi la nei ole Team Samoa e pei ona fa’alauiloa mai ele pulega: SPORTS ATHLETES OFFICIALS Athletics 1. Alexander Meli Rose 2. Donny Masele Tuimaseve 3. Jeremy Raponi Dodson 4. Johnny Key 5. Kelvin Tuiala Savaiinaea 6. Kolone Paul Peter Alefosio 7. Nuuausala Sialataua Malota Tuilefano 8. Pesamino Iakopo 9. William Angliss HuntNonu Ah Chong Sam Chong (Coach) Dane Michael Miller (Assistant Coach) 10. Leiataualesā Jerry Brunt (Manager) Aquatic – Swimming 1. Brandon Lloyd Schuster 2. Lushavel Yvonne Petina Stickland 3. Olivia Jennifer Borg 4. Thomas Kokoro FrostSuzanne Schuster (Coach) Boxing 1. Ato Leau Plodzicki-Faoagali 2. Jancen Poutoa 3. Marion Faustino Ah Tong 4. Mikaele Lemisio (Coach) 5. Jesmario Ah Tong (Assistant Coach) Judo 1. William Tai Tin. 2. Derek Sua (Coach). Men Rugby Sevens 1. Faafoi Falaniko 2. Iafeta Mahony Purcell 3. Levi Nifo Milford 4. Melani Matavao 5. Motu Opetai 6. Neueli Molesi Leitufia 7. Owen Niue 8. Paul Junior Scanlan 9. Steve Onosai 10. Taunuu Niulevaea 11. Uaina Sione 12. Vaafauese Apelu Maliko 13. Vaovasa AfaMuliagatele Brian Pala Lima (Coach) Tausa Faamaoni Lalomilo (Assistant Coach) Hari Junior Moses Narayan (Analyst) Yon Garcia Cobos (Physiotherapist) Tuala Patrick Patty Isitolo Leota (Manager) Weightlifting 1. Don Opeloge. 2. Feagaiga Stowers. 3. Jack Hitila Opeloge. 4. John Lautafi Tafi. 5. Petelo Tuiloma Lautusi. 6. Vaipava Nevo Ioane. Tuaopepe Jerry Wallwork (Coach). Ele Opeloge (Assistant Coach). Toafitu Perive (Assistant Coach). Hiti Don Opeloge (Manager). Wrestling 1. Maulalo Willie Salumalo Alofipo. 2. Taitaifono Adam Eti Tamati. Gaku Akazawa (Coach). CGA Delegation: President: Pauga Talalelei Pauga Secretary General: Sifuiva Maureen Epati Tuimalealiifano Team Management Officials 1. Sulā Tagifano So’onalole-Sam Chong—Chef de Mission 2. Leasi Ioane Galuvao – General Team Manager 3. Elizabeth Evans - Physiotherapist 4. Henrietta Aviga Mercier—COVID-19 Officer 5. Kosetatino Tuionetoa— Masseur

15 Iulai 2022 E tusa ma le 40 futu le tele o se konetaina na fa’atumuina i nofoa fa’ata’avalevale(300) ma nisi o oloa fa’afoma’i na taua’ao atu i le Malo o Samoa mai i le fesoasoani a le Ekalesia a Iesu Keriso o le Au Paia o Aso e Gata Ai. O le fesoasoani nei a le Ekalesia e leo se mea fou i le fa’apa’aga a le Ekalesia Aoao ma le malo o Samoa ma o le tele o nei meaalofa o tulaga lava o mea manaomia mo le falemai, e pei ona iai vaega fa’aleoleo mo nofoa fa’ata’avalevale, pusa o talifofoga ma isi oloa fa’asoifuamaloloina. O le alii sui ofisa sili o Pulega ole Soifua Maloloina ia Atoa Dr Glenn Fatupaito sa fai ma sui o le malo o Samoa e talia lenei fesoasoani tele a le Ekalesia ilea so Faraile 8 Iulai 2022. O le fa’apaga lenei ua o se fesoasoani tele lava lenei mo tagata o Samoa e le’o mafai ona gafatia le fa’atauina o nofoa fa’ata’avalevale mo i latou o lo’o manaomia ina ma isi vaega taua e fesoasoani i fanau. Saunoa le alii sui ofisa sili, o le’a silasila le matagaluega mo le fa’asoasoaina tutusa lelei o nei fesoasoani mo tagata o lo’o manaomia ina. O le alii foma’i ia Dr Ainuu o ia lena o lo’o fa’auluulu iai tulaga ma le vaega o Welfare a le Ekalesia i Samoa ma Amerika Samoa sa ia fa’ailoa ma fa’amautinoa atili lenei fa’apa’aga vavalalata e fesoasoani ai le Ekalesia i soifua maloloina o le atunu’u atoa.

15 Iulai 2022 A’o fa’agasolo ai le fonotaga a ta’ita’i o malo o le Pasefika i Fiti i lenei masina ma lenei vaiaso. Ua maua ai fo’i le avanoa e talanoa ma faasoa atu ai ta’ita’i o le pasefika i fanau i totonu o Fiti, e pei fo’i ona maua le avanoa e fa’afofoga i saunoaga a nai fanau o lo’o latou aumai ai so latou manatu i tulaga o lo’o maualuga i mataupu o fonotaga lenei i tulaga o fesuiaiga o le tau. E le gata i lena ae o se avanoa fo’i ua fa’alauiloa ai se itulau mo fanau i luga o upega o feso’otaiga ina ia mafai ona iai se so’otaga o fanau i le taumafaiga lava ina fa’atalanoa auala e puipuia ai le lanumoana o ogasami o le pasefika ma i suiga m’aaleale o le tau. O le tatalaina ai o lea itulau po’o le upega tafailagi sa fa’apena ona tapenaina ma saunia e le atunu’u talimalo o Fiti aemaise ona sui lagolago e pei o le fono faufautua mo le fa’afaileleina o fanau i atina’e eseese mo le lumana’i manuia. O lea fa’amoemoe sa auai ai le sui o Samoa le afioga i le tamaitai Minisita o Tupe ia Mulipola Anarosa Ale Molio’o. O lo’o fa’agasolo fa’atalanoaga i nisi o mataupu fa’alotoifale i le taimi lenei aemaise o so’otaga valelei o atumotu laiti ole pasefika ma atunu’u tetele o le lalolagi.

O le malaga fa’atasi ai o le ta’ita’i o le atunuu le afioga i le tama’ita’i Palemia o Samoa ose faiga fa’avae fou lea ua amataina i le nofoaiga fou a le faigamalo ua iai nei. O lenei faiga fa’avae fou sa amataina mai ina ua talosagaina e le ta’ita’’i o le itu agai ia Tuila’epa Sailele Malielegaoi se leoleo i na ia mafai ona aua faatasi ma ia i lana si’iga ma’i sa auai atu ai i Niu Sila i nai masina ua tuana’i. Ua manatu ai loa le faigamalo fou ua alagatatau ona faatu lenei faiga faavae fou mole puipuiga lava o tatou ta’ita’i pe’a malaga atu i ni faatasiga faavaomalo i fafo atu ma Samoa. O lenei faiga faavae fou o le’a le gata ai i lenei taimi e i ai le fa’amoemoe e tatau lava ona fa’aauau atu ai pea i i si fo’i faigamalo o le’a agai mai. Ona o le tulaga o vesiga faapolokiki talu ona mae’a faigapalota o le tausaga 2021 sa tula’i mai ai le tele lava o mau feseesea’iga o manatu ona o suiga o faigamalo, ma o se tulaga lea ua manatu ai e tatau lava ona malu puipuia o tatou ta’ita’i pe’a malaga ese atu ma Samoa. O le malaga muamua ale tama’ita’i palemia i le malo o Niu Sila lea na mua’i fa’ataunuuina ai lenei faiga faavae fou e pei ona malaga faatasi ai male alii leoleo sinia aua lava le puipuiga.