Search Results

Ua amata le nofoa’iga fou a le alii Komesina fou o leoleo le tofa ia Auapaau Logoitino Filipo i le sainia ai o se fesoasoani tele a le malo o Iapani ma Samoa i sana faapaaga faavaomalo. O le amata o le vaiaso nei ile Aso Gafua 12 o Iulai 2022 na sainia ai lenei feagaiga e tauala mai i le amepasa o Iapani i Samoa ma na taliaina lea e le alii Minisita o leoleo le afioga ia Faualo Harry Schuster. O le fesoasoani e tusa lea ma le 150 miliona tupe YEN pe e tusa lena ma le 3 miliona tala i le tupe Samoa. O le fesoasoani lenei ose vaega o le faapaaga a Iapani ma atunuu tai pei o Samoa i vaega o atina’e ma agafesoota’i lea e i ai la le fesoasoani mo va’a petolo a leoleo. O le fa’amoemoe o le vaa lenei o le leo i na lea o gataifale o Samoa ma le fa’amalosia ole mata’ituina o le saogalemu ma le malu puipuia o gataifale o le atunuu ma tua’oi ma atumotu laiti o le pasefika mai i le ono sao mai ai oni faiga faasolitulafono. O le fesoasoani lenei a Iapani ose isi fo’i o vaega o foa’i mole matagaluega o leoleo lea pei ona faatalia ai fo’i le ofo ale malo o Ausetalia i se isi va’a mo leoleo e sui tulaga i le Nafanua lea na pa’uilia i gataifale o Salelologa i le tausaga 2020.

O atugaluga o matua ua fa’aalia nei ona ole fuafuaga fou a le ofisa o aoga male malo e uiga lea i le faia o Satelite mo fesootaiga faaonaponei i totonu o aoga uma ile atunuu. O le mafuaaga lena ua a’e ai se manatu i le ofisa o le pule fa’atonu le afioga ia Lematua Gisa Fuata’i Purcell ina ia faamanino lea vala mo matua ma le atunuu, ole faamoemoe mo satellite o se faiga lea ua manatu le matagaluega o a’oga ina ia mafai ona fesoasoani lea i fanau a’oga i a latou sa’iliga mo alaga’oa i upega o faamatalaga. Saunoa le afioga i le pule fa’atonu, o le fa’amoemoe lenei o le’a i ai lava ona pa puipui i itulau (websites) e mafai ona fa’aaoga ma tatala i lea auanaga e le mafai ona tatala faasoloatoa olona uiga o le’a iai lava pa puipui e mata’ituina ai ma fa’amama ai nei fesootaiga. O le atugaluga o matua, e faapea o le’a avea lenei faiga ma avanoa e ono mafai ai e fanau ona agai i luga ma matamata i nisi o ata le talafeagai i taimi lea o a’oga. Na tali le pule fa’atonu, e leai se fa’avae o nei faamatalaga ma nei faasalalauga. O le mea mautinoa lava oloo ua matua malu puipuia lava ma fa’amamaina le auaunaga lenei o le’a faamoemoe mo a’oga ta’itasi i le atunuu aua lava fanau. O le fa’amoemoe lenei ua tuuina atu nei i le kamupani Samoa ua faaigoaina o le Blue Wave Wireless lea sa igoa i le NetVo. O le Blue Wave Wireless ose kamupani latoue te faia auaunaga tau i fesootaiga faaonaponei.

12 Iulai 2022 Ua fa’amaonia mai nei e le afioga i le Minisita o Va’alele le tofa ia Leatinuu Wayne So’oialo le filifilia ai le o le afioga ia Fauoo Fatu Tielu e avea ma Pule Sili o le Samoa Airways mo se taimi e le tumau. O le filifilia ai e le Kapeneta o le afioga ia Fauoo o se taunuuga lea o le fa’aiuga mai i se fautuaga a le Komiti fa’atonu fou o lo’o ua iai nei a le Samoa Airways, ma o lea sa faia ai loa lenei fa’aiuga i le aso Tofi 7 o Iulai 2022. I le masina o Iuni na fa’amaonia ai ele Kapeneta le filifilia ai fo’i o le Komiti fa’atonu o le Kampunai Va’alele a Samoa lea ua se’ei ai nei ni isi o tamalii ua loa oi le tautua i tulaga tau i pisinisi i le atunuu. Ae peita’i o le masina fo’i ua tuanai na maua ai le mae’a ai fo’i o le Konekarate a se tasi sa avea ma pule sili o le Kamupani va’alele le afioga ia Seiuli Alvin Tuala, ma o lea ua tofia ai nei e le komiti fa’atonu fou le tumau o lo’o iai nei a le Kamupani Va’alele le afioga ia Fauoo e sui tulaga mo lenei taimi e tauaveina tofiga o le pule sili o le Samoa Airways a’o tapena ai le toe tatalaina lea o tua’oi fa’avaomalo a Samoa i le masina o Aukuso o le tausaga nei 2022. O le afioga ia Fauo’o Fatu Tielu e le fou ia te ia lea tofiga fa’a-pulesili i le ofisa o Vaalele a Samoa e pei ona sa galue muamua ai fo’i i le tele o tausaga ua mavae. O Fauoo Fatu Tielu o se tamalii Samoa e iai ona agavaa faa-su’etusi ma o lo’o ia umia ina nisi o fa’ailoga maualuluga ma i Iunivesite i Samoa aemaise o ni isi o Iunivesite maualuluga i atunuu mamao.

08 Iulai 2022 O le aso ua faailoa ai le aso mulimuli mo le mataaga o le Matareva Beach Fale i le afioaga o Matautu, Lefaga e pei ona agiga i upega o fa’amatalaga o le Facebook. I se tusitusiga fa’alaua’itele i le itulau o le facebook o lo’o fa’aalia ai se lagona fa’anoanoa a le pulega a le Matareva ona o le faaiuga ua o’o iai le tapunia o lenei pisinisi mo turisi ona oni mata’upu lava fa’alotoifale o le nu’u. Ao lumanai ai le toe tatala o tua’oi fa’avaomalo a Samoa i le masina o Aukuso, ua ose tulaga faigata lea i lenei falemata’aga ona o le’a le mafai ona toe fa’aauauina lana tautua e ala i le apitaga mo tagata. O lagona misia a le pulega ma le fale apitaga na fofola ane i luga o le itulau o le Facebook ia latou paaga e pei o tagata Samoa ma aiga aemaise o fa’alapotopotoga eseese a le malo sa masani ona fai malologa atu i le matagofie o le oneone ma le gataifale o Matautu, Lefaga i le Matareva Beach. O se molimau mai fo’i a le lautele o tagata o le atunu’u i a latou fa’amatalaga i le Facebook i le misia ma le fa’afetaia o le tautua a lenei fo’i fale mo turisi ia ma so’o se tagata lava sa mafai ona agai iai aua nai malologa. Ua faalauiloa fo’i i le fa’asalaulauga fa’alaua’itele a le Matareva le tapunia ai o auaunaga e fa’atonu ai le latou nofoaga(booking engines) e pei o le facebook, upega tafailagi(website) ma le Instagram. O le aso 1 o Aukuso 2022 ole’a aloa’ia ai ona tatala tuaoi ma faigamalaga faavaomalo o Samoa mo so’o se atunuu e fia asia mai Samoa. E o’o ma i le taimi lenei ua molimauina le tele o fa’alauiloa a faletalimalo mo a latou fa’apitoa, o fa’afiafiaga, o tau o auaunaga o se vaega lea o le sauniuni male nofo tapena o Samoa e fa’afeiloa’i le tagata tafafao ma aiga.

08 Iulai 2022 E ui ua tapunia le Kolisi Maualuga o Vaipouli i le motu o Savai’i, ae le’o avea lena ma tulaga e vaoia ai pea le lagolago a alo ma fanau aemaise o tamalii na a’otauina i lea Kolisi i fa’amoemoe mo a’oga i Samoa. I le taeao o le aso Faraile 8 o Iulai 2022 na feiloa’i ai le tama’ita’i Palemia o Samoa Hon Fiame Naomi Mata’afa ma le pule o le Iunivesite Aoao o Samoa le afioga ia Aiono Ekeroma e tau’a’ao atu iai le meaaalofa tupe a tama ma teine tuai o le Kolisi o Vaipouli o lo’o aumau i Ni Sila. O lenei meaalofa tupe e tusa male $10,000 Samoa ma sa fa’aauala mai lea i le tamaitai Palemia o le Malo o Samoa i lana malaga sa faimalaga atu ai i Niu Sila. O le fa’amoemoe o lenei seleni, ina ia fesoasoani lea i se avanoa sikolasipi mo alu ma fanau mai Savaii o lo’o aotauina i le Iunivesite i Salafai. Na fa’afetaia e le afioga i le pule o le Iunivesite alo ma fanau po’o tama ma teine tuai o Vaipouli ona o lenei fesoasoani mo a’oga a alo ma fanau o lo’o mafai aoga i le lala ale NUS i Savaii. O le Kolisi o Vaipouli o le aoga maualuga muamua lava lea i Samoa na fa’avaeina i le tausaga e 1921 i Salafai, ma na tapunia lenei Kolisi ile tausaga e 2012, e ui o lea ua tapunia ae o lo’o maopoopo lava le asosi o teine ma tama tuai a le a’oga e o’o mai i le taimi nei.

08 Iulai 2022 Ua nofo saini nei le ali’i pule o le faleta'alo a Samoa ia Moefaauo Polailevao Moananu i le ofisa o leoleo i Aso Faraile uma, se'i o’o i le aso 26 o Iulai e tulai ai i luma o le fa'amasinoga ina ua molia ai e le matagaluega o leoleo i lona so’otaga i se fa’alavelave na tulai mai i le vaiaso ua tuana'i. O lenei fa'alavelave sa tulai mai i le aso 2 Iulai lea na iai se fe’eseesea'iga i luga o le auala ma se tasi o malu ole malo, ina ua ia taumafai e tipi le taavale o lo’o fa'afoeina e le leoleo. Ae peita'i na toe tuliloa atu e le ta’avale a le malu o le malo ma fautuaina ai i lana aveta'avale. Sa le'i fautuaina le alii pule sili ma ia fa'ao’olima ai i le alii ave ta’avale lenei. E le gata i lea ae ina ua sailiili atu fo'i e leoleo le ta’avale o le alii pule sili, sa maua ai se laau malosi(fana) o lo'o i totonu o le ta’avale ma o lenei ta'avale o se ta’avale a le malo o lo'o ia fa'aaogaina. Sa tu’uina atu se imeli tusitusia a le tatou ala ata i le alii pule sili, e o’o mai i le taimi nei e le'i maua mai lava se tali i nisi o fesili.

07 Iulai 2022 PC: SQA Facebook Page. Ua fa'amavae le sa avea ma pule sili ole Pulega o Tusipasi ma Fa'ailoga Taualoa le afioga ia Leali'ifano Easter Manila Silipa ae ua fa'ase'e atu i se isi o ana va'alauina i le filifilia ai lea e avea ma Fa'atonu sili ole a'oga fa'amatata ese'ese a Ausetalia le A.P.T.C. Na fa'afeiloa'i aloa'ia e le APTC le latou fa'atonu sili fou e ala ise 'ava o feiloa'iga. O le tofia ai o Leali'ifanoa avea ma Fa'atonu Sili ole APTC ua le gata o le lala i nei Samoa ae o le a'oga fo'i i le malo o Toga. O le tausaga e 2020 na tofia ai Lealiifano e avea ma Pule Sili o Pulega o Tusipasi ma Fa'ailoga Taualoa a Samoa O le afioga ia Leali'ifano, o lo’o ia umia fa’ailoga mauāluluga e aofia ai le Master of Arts Governance mai le Iunivesite o le Pasefika i Saute (University of the South Pacific), o le Postgraduate Diploma in Arts Governance ma le Bachelor of Arts degree in History / Politics.

07 Iulai 2022 E tusa ai ma le poloketi a le Malo o lo’o fa’atamo’e nei e le Ofisa o le To’omaga mo e Puapuagatia, o lo’o fa’ataua ai le sao o le itupa o ali’i i le tafiesea lea o sauaga fa’asaga i tina ma tamaitai. O le nei poloketi ua fa’amatu’uiina atu ai e le Malo i’le To’omaga le tinoitupe e $500,000 e fa’atinoina ai. E pei ona fa’ailoa e sui o le To’omaga, o lea ua vaevaeina le polokalame i vaega e tolu. E tofu lava foi le kulupu o ali’i ma anavatau e fa’aautuina iai faatinoga o lea latou faia, ae o le fa’atupeina o alagaoa o lea fa’aaogaina o le matafaioi lea a le To’omaga e pei ona iai le seleni mai ile Malo. 1. Taitai/matai o Nuu. 2. Aumaga. 3. Tupulaga talavou. O le fa’amamafa ua nao le itupa o alii ina ia taimua i le taofia o sauaga i tina ma tamaitai. I le lua vaiaso talu ai, na feiloai ai sui o afioaga taitasi i pulenu’u ma le saofaiaga a matai mai afioaga e valu na filifilia, ma talanoaina ai ni poloketi latou te faatinoina i totonu o a latou afioaga e fa’alauiloa ai le manaoaga ole tete’e atu i sauaga, ae i le taimi e tasi e fa’amanuiaiina ai afioaga. O le fa’aiuaga o lea feiloaiga na o latou filifiliina ai se autu e faapea, “E LE SAUA TAMALII”. O le Aso Lua o le vaiaso nei na aloaia ai le feiloaiga a taiulu o le saofaiga a aumaga mai afioaga e lima na mafai ona filifiliina e aofia ai afioaga mai Upolu ma Savaii ma poupouina ai foi ni poloketi latou te fa’aaogaina e tofu sao a ile amanaiaina o le itupa o tina ma tamaitai. Faimai le autu na autasi iai le saofaiga a aumaga, “O LA MATOU TAUTUA TUAVAE E MALU AI A MATOU FEAGAIGA”. Peitai o le aso na auai mai ai sui o tupulaga talavou mai alalafaga e lima na filifilia ma vailiina ai le atoponapona e saili ai le tofa ma le moe po’o fea e agai iai le lagolagosua a tupulaga talavou alii e tetee ai i sauaga oloo aafia ai tina ma tamaitai. O lea la ua faamoe le toa seia aulia le isi feiloaiga aloaia a tupulaga talavou ona fausia lea o sa latou anavatau. O nei fa’amoemoega uma ua so’oso’otauau ai le Malo, Toomaga mo e Puapuagatia fa’apea afioaga ina ia tu’uitiitia le fuainumera o tina ma tamaitai e a’afia i sauaga eseese.

07 Iulai 2022 Ua gagana se tasi o tamalii o Samoa sa avea ma Ofisa Sili a le Fa’alapotopotoga mo Fa'aputuga tupe o le Manuia o Samoa(SNPF) ia Papali'i Moala Panoa i nisi o tupua sa natia i lona vaitaimi a'o avea ma ofisa sili o pulega. O le masua mai ai o le afioga ia Papali'i ona o ni tu’uaiga sa faasaga ia te ia mai ile ta'ita'i o le vaega fa'aupufai a le HRPP po'o le sa avea fo'i ma Minisita o le NPF ma palemia i lena vaitau. O se tasi o nei tupua ua fa'ailoa e le susuga ia Papali'i ole fa'aaogaina ai lea o fanua a le NPF e fai ai fa'ailoga a le lulu (raffle) sa'ili tupe a le Ekalesia Katoliko i Si'usega po’o le falesa fo'i lea o lo’o lotu ai le susuga ia Tuila'epa. "Vili mai Tuila'epa a'o o'u pule i le NPF, Papali'i oute mana'o...ete iloa fanua lae i Aleisa mai ia Sale'imoa..lea na 'ou tago tender e fa'atau atu i tagata...ae vili mai Tuila'epa. Papali'i, olea fia fai le lulu a la'u ekalesia, aumai se 15 'eka e fai ai la'u lulu. Ona fai atu le iai ae fa'afefea le tau, ae faimai se'i uma ona totogi lea."fa'amatalaga lea a Papali'i i luga o ala fa'asalalau ise feiloa'iga male 'au tusitala. Na ta'ua e Papali e ui i sona le mana'o ia fa'ataunuu lea tulaga ona o lona fefe ae sa fa'apena lava ona fa’amaonia (approve) e le fono fa’atonu ale NPF i lena taimi. "Ave le 15 'eka o fanua e fai ai prizes o le lulu a Si'usega ae le'i totogia". Na ta'ua e Papali ina ua mae'a le lulu a Siusega, na agai atu tagata i lona ofisa e tapa o latou fanua, ae peita'i sa ia fa'ailoa atu iai e tatau ona toe aga'i ia Tuila'epa ina ia totogi muamua fanua ale NPF. Na faailoa fo'i e Papali'i e fa'amalolo lava ia mai ile tofiga Ofisa Sili o pulega e le'i totogiina lava nei fanua sa fa'aogaina ma e nate le'o iloa ile taimi lenei po'o ua totogi pe leai nei fanua. "Na tuli a a'u ma le NPF e le'i totogia a nei fanua, pe totogi a la pe leai...o lea le mea ua privilege ai Tuila'epa e fa'aaoga fanua a le NPF e fai ana su'ega tupe?". E maualuga i le taofi o le pule talu ai a le NPF, e le tatau ai lava ona fa'aaogaina fanua a le NPF po'o le malo e fai ai ni su'ega tupe ase tagata se to'atasi po’o so’o se isi lava e galue ile malo o Samoa. O lenei mataupu o le'a sa'ili'ili ma tuliloa pea ini fa'amaumauga po'o ua totogi nei fanua e pei ona ta'ua e le susuga ia Papali'i.

06 Iulai 2022 Ua maea fa’amaonia e le Komiti o Fa’atonu a le Kamupani o Pulega mo Fa’aputugātupe Teufa’afaigaluega o Mavaega Tausi a Samoa fa’apea le Tausi Mavaega le $7.50 miliona tala mo le toe tufatufaina atu i le aufai’iunite mo le tausaga fa’aletupe lea ua māe’a ia Iuni 2022. E tusa ma le 4,300 sui-faiiunite o lo’o fa’afaigaluega a latou seleni i totonu o le Fa’aputugātupe, o le ā fa’amanuiaina i lenei tufatufaga. O se taimi muamua lenei ua ausia ai e le Fa’aputugātupe se tufatufaga ua sili atu ma le $7.50 miliona tala ma ua fa’amauina o se matāti’a fou lenei la’asaga. E 8 sene i le iunite o le a agavaa ai sui-faiiunite uma mai lenei tufatufaga. E 9.25% le aofaiaga atoa o faamanuiaga fa’aopopo i teugātupe mo le aufaiiunite, e afua mai lea ile 4.52% na maua mai i pasene o tufatufaga; fa’aopo’opo i ai ma le 4.73% o le si’itia o le tau aogā o le iunite. O le aso 8 o Iulai o le ā mafai ai e le aufaiiunite ona tala i tua a latou tufatufaga, po’o o le toe tului i totonu o latou teugātupe, ma e a’agata lea avanoa i le aso 7 o Oketopa 2022. O lo’o tatala fo’i auaunaga fa’a-tekonolosi i luga o tatou upega tafāilagi po’o le UTOS mobile app e fai ai filifiliga a le aufaiiunite, pe asiasi mai fo’i le tatou ofisa autu mo se fesoasoani. E tele lu’itau na feagai ma le Pulega i lenei tausaga fa’aletupe ua mavae atu, peitai sa galulue punoua’i lava le tatou Kamupani o Pulega ina ia ausia ni fa’amanuiaga lelei mo le aufaiiunite, e ui lava i tulaga lamatia ua iai nei le tamaoaiga o le lalolagi ona o le Koviti19. O le tausaga fa’aletupe foi ua mavae atu, na fa’atino ai foi e le Fa’aputugātupe ni teugātupe teufa’afaigaluega e le gata i Samoa nei, ae fa’apea foi i isi Atunu’u o le Pasefika, ina ia maua ai pea ni auala ese’ese e maua mai ai tupe faasili mo le a’aputugātupe. I le va’aiga mamao, o nei vaega ese’ese e fa’afaigaluega ai seleni e mautinoa le siitia ai o tupe maua mo aufaiiunite i le lumanai. O lo’o fa’aauau pea ona galulue malosi le Pulega ina ia mautinoa le tumau pea o le fa’atuatuaga a le aufaiiunite e ala lea i auaunaga lelei ma talafeagai, fa’apea ai ma le si’itia o tupe maua mai le Fa’aputugātupe. O le toe fa’asoa atu o tupe fa’asili mo le aufaiiunite i tausaga taitasi o le pine fa’amau lea o le fa’anaunautaiga a le Fa’aputugātupe ina ia galue mo le manuia o le aufaiiunite. E avea le Ofisa Sili o le Kamupani o Pulega, Tevaga Viane Tagiilima e fai ma sui o le Komiti o Fa’atonu ma le Tausi Mavaega e fa’ailoa le agaga fa’afetai i le mamalu o le aufaiiunite fa’apea pa’aga masani a le Fa’aputugātupe, mo le fa’atuatuaina o le tatou Pulega e fa’afoeina a outou teugātupe, a’o feagai ai Samoa ma le lalolagi i lenei vaitau faigāta. E fa’amautūina pea le naunautaiga o le Pulega ma le aufaigaluega, e galulue punouai, ina ia malu puipuia pea teugātupe teufa’afaigaluega a le aufaiiunite, fa’apea le tapu’eina o avanoa lelei e teufa’afaigalue ai a latou seleni. O le Fa’aputugātupe Teufa’afaigaluega o Mavaega Tausi a Samoa, o se Fa’aputugātupe tumaoti e pulea e le aufai’iunite ma ua tu’uina atu le fa’atuatuaga i le Kamupani tau Mavaega Tausi, e va’aia ma tausia uma ana aseta. O nei vaegātupe e teufa’afaigaluega i ni auala ese’ese e maua mai ai ni seleni fa’aaopo’opo, e pei o Tupe teu fa’avaitaimi i faletupe, nonōgatupe malupuipuia i le Malo o Samoa ma sea i totonu o kamupani tumaoti i Samoa nei ma le Pasefika. O le anava fa’aagafeso’otai a le fa’aputugātupe, o le manuia lea o tagata uma; ia saunia ni auala faigofie ma taugofie e teufa’afaigaluega ai seleni a so’o se tagatanu’u Samoa. Ae o lana anava fa’apisinisi, ina ia ausia ni tupe faasili mo ana aufai’iunite mai ana teugātupe ua maea ona ilo’ilo totoa. Mo nisi faamatalaga e uiga i lau teugatupe teufaafaigaluega i le UTOS, faamolemole fa’afesootai mai le tatou ofisa i le +685 29916 poo o le +685 26949. E mafai foi ona imeli mai i le info@utos.ws po’o le feso’otai mai foi i luga o le tatou Facebook Page – Unit Trust of Samoa.

06 Iulai 2022 O le taeao nei o le aso Lulu 6 o Iulai na faia ai se sauniga fa'apitoa i le potu fono a le Kapeneta i le maota o le Malo i Eleele Fou e fa'atautoina ai nisi o Minisita Lagolago fou i ni isi o matagaluega a le malo. O le afioga i le ali'i faipule mai i le itumalo o Gagaifomauga 2 ia Foisala Tu'u Ioane ua fa'atautoina nei e avea ma Minisita Lagolago o le Matagaluega o le Soifua Maloloina e lagolago i le galuega a le afioga i le ali'i Minisita ia Valasi Tafito To'ogamana Selesele. O le isi Minisita lagolago fou o le afioga i le tama'ita'i faipule mai i le itumalo o Anoama'a 2 ia To'omata Nora Leota , ua tofia nei e avea ma Minisita lagolago o Tiute ma Tupe Maua i lalo o le ta'ita'iga a le ali'i Minisita ia Tuala Iosefo Ponifasio. Na avea le tama'itai palemia o Samoa ia Fiame Naomi Mata'afa e fai ma sui o le malo e molimoli le agaga fa'afetai i tofiga ua tofia ai nei sui faipule e lagolagosua ai i galuega a Minisita o Matagaluega nei e lua a le Malo o Samoa. Na toe fa'amanino atili ma fa'alautele atili e le tama'ita'i Palemia vaega Patino o tofiga nei o faipule. O le susuga ia To'omata, o le'a mafai ona galue ise tasi o vaega ma'oti o le matagaluega e tau'ua o TUPE MAUA , o le fa'amoemoe ona o se tasi nei o matagaluega e lua lava vaega tumaoti o lo'o iai e aofia ai TIUTE ma TUPE MAUA. O le afioga ia Fo'isala o le'a mafai ona galue lagolago i vae ma'oti tau i soifua maloloina po'o fa'alapotopotoga ma'oti mo le soifua maloloina ina ia mafai ona fa'amaopoopo mai. O le Matagaluega o Soifua maloloina ua lua ai nei ona Minisita Lagolago e iai le afioga ia Tea Peato ma le afioga ia Fo'isala Tu'u Ioane ae o le Matagaluega o Tiute ma Tupe Maua o lea fo'i ua lua ona Minisita Lagolago e pei ona iai le Tofa ia Laga'aia ma le susuga ia To'omata Nora Leota.

04 Iulai 2022 Manumalo Jai i le fusi o le IBF (International Boxing Federation) i le lalolagi. Ua fa'amanuiaina se tasi o alo fusu a Samoa ia Jai Opetaia i le fusi o e lalolagi i le aupaga o le Cruiserweight e pei ona iai le la fusuaga ma Mairis Briedis i le po o le Aso To'onai i Gold Coast i Ausetalia. O se fusu'aga faigata ma mata'ina i le maimoa o le faitau afe o tagata matamata sa molimauina i luga o upega tafailagi ma ala fa’asalalau eseese. Na manumalo le ali'i o Jai Opetaia ini 'ai mai fa'amasino o lea fusuaga e pei ona ia mauaina ai le fusi ale IBF ma le “THE RING” titles. Na molimauina le televavave ole gaioi a le alii 27 tausaga lenei o Jai Opetaia i le amataga lava o le fusuaga, ae peita'i i le avea o le finau malosi atu o tu'i a le alii o Jai na avea ma se tulaga na toe a’afia ai lona auvae i le ta’amilposaga lona lua. Na amata lava le ta'amilosaga muamua i le ta'e ai ole mata o le alii o Mairis ise osofa'iga malosi a Jai. Ise va'aiga i le taamilosaga lona fa, na amata ai ona samala faalelei ai lava e Jai le alii o Mairis ma i'u ai ina maua tonu le 'auvae o Mairis i le apakaki malosi a Opetaia ma nenefu ai loa ma le vaai a si alii lea na i'u ai ina tifa sese atu ai i le tulimanu a Jai Opetaia. I le fa’amatalaga a le alii fa’asalalau ta’aloga ia Ben Damon na i faapea ai se tala, "Ona folau atu ai lea o le apakaki a Jai ma faatama'ia ai le isu o Mairis, ma 'ua ia leiloa po’o fea ua ia o’o iai": O Jai Opetaia o se uluai ali’i fusu Ausetalia ua ia mauaina le fusi lenei a le lalolagi talu mai le 2017 lea na umia ai e Jeff Horn. Ua amata tilotilo fo'i se tasi o alii fusu o le siamupini o le aupaga ole WBO (World Boxing Organisation) cruiserweight a le lalolagi ia Lawrence Okolie i se la fusuaga ma Jai pe'a toe manuia mai i lona fofoga o lo’o a'afia. O Jai Opetaia o lo’o lagolagoina e le ofisa o tagata maimoa mai fafo po’o le ofisa o Turisi i Samoa (STA).